Son 10 ildə Azərbaycanda ÜDM 3,2 dəfə artıb. Trend-in məlumatına görə, bunu Azərbaycan Prezidentinin iqtisadi islahatlar üzrə köməkçisi Natiq Əmirov "Azərbaycanda keçirilən iqtisadi islahatlara Amerika ticarət palatasının dəstəyi" mövzusunda dəyirmi masa zamanı deyib.
"Bu dövr ərzində qeyri-neft sektoru 2,6 dəfə, sənaye - 2,7 dəfə, kənd təsərrüfatı - 1,5 dəfə, sərmayə qoyuluşu - 6,5 dəfə, orta aylıq əmək haqqı 5,5 dəfə artıb", - N.Əmirov bildirib.
N.Əmirovun sözlərinə görə, ölkədə aparılan tədbirlər nəticəsində 900 min iş yeri daimi olmaqla 1,2 milyondan artıq yeni iş yeri, o cümlədən 55,6 min müəssisə yaradılıb.
"İşsizlik səviyyəsi 5 faizə, yoxsulluq səviyyəsi 5,3 faizə enib. Azərbaycan iqtisadiyyatına 130 milyard dollardan artıq sərmayə yatırılıb. Mal dövrriyyəsi – 6,4 faiz, qeyri-neft sektoru üzrə - 4,5 dəfə artıb. Bu dövr ərzində 19,4 min sahibkarlıq subyektinə 1,2 milyard manatdan artıq güzəştli kredit verilib", - deyə N.Əmirov bildirib.
N.Əmirov əlavə edib ki, bu kreditlər hesabına 113 min yeni iş yeri yaradılıb. Dövlət büdcəsinin gəlirləri - 14,2 dəfədən çox, vergidən gəlirlər – 7,3 dəfə, dövlət büdcəsinin xərcləri – 13 dəfə, bank qoyuluşları – 24 dəfə, bank aktivləri – 18 dəfə artıb.
Azərbaycan milli iqtisadiyyatın strateji "yol xəritəsi"ni yaradır
Natiq Əmirov bildirib ki, Azərbaycanda orta və uzunmüddətli dövrdə ölkənin dayanıqlı iqtisadi inkişafı üçün ölkə başçısının qarşıya qoyduğu məqsədlərə uyğun olaraq milli iqtisadiyyatın və prioritet sektorların strateji "yol xəritəsi"nin yaradılması üzrə işlərə start verilib.
Onun sözlərinə görə, "yol xəritəsi"nin əsas məqsədləri iqtisadi artımın dayanıqlığını təmin etmək, zəruri iqtisadi infrastrukturun yaradılmasına xidmət edəcək yardımçı sektorların inkişaf strategiyasının düzgün müəyyənləşdirilməsidir: "Strateji "yol xəritəsi" iqtisadiyyatın yeni modelinin inkişafına kömək edəcək".
Manatın məzənnəsinin cari dəyişiklikləri Mərkəzi Bankın təcili müdaxiləsini tələb etmir
Natiq Əmirov qeyd edib ki, hazırda Azərbaycanda manatın məzənnəsində Mərkəzi Bankın təcili müdaxiləsini tələb edən ciddi dəyişikliklər müşahidə olunmur.
O bildirib: "Bizim manatın məzənnəsi üçün "qırmızı xətt"imiz yoxdur. Ümumilikdə iqtisadiyyata zərər vura biləcək istənilən səviyyə (məzənnənin səviyyəsi) "qırmızı xətt" hesab olunur. Belə hallarda Mərkəzi Bank müdaxilə edir".
Prezidentin köməkçisi qeyd edib ki, bazarın tələbatı manatın obyektiv məzənnəsini müəyyənləşdirməyə imkan verir: "Manatın məzənnəsi, o cümlədən idxalın səviyyəsindən asılı olaraq da dəyişə bilər".
Biz bankları qorumalıyıq
Azərbaycanın bank sektorunda korporativ idarəetmə ilə bağlı ciddi problemlər var. Bunu da Prezidentin iqtisadi islahatlar üzrə köməkçisi Natiq Əmirov deyib.
Onun sözlərinə görə, bəzi bank sahibləri bankları mağaza qismində nəzərdən keçirir və kimə kredit verməyi göstətir: "Biz bankları ilk növbədə onların sahiblərindən qorumalıyıq"
N.Əmirov qeyd edib ki, banklar öz kredit siyasətini düzgün müəyyənləşdirməlidir: "Kreditlər və əmanətlər üzrə faiz dərəcələri optimallaşdırılmalıdır".
Banklarda manat likvidliyi niyə çatışmır?
Natiq Əmirov bildirib ki, Maliyyə Bazarlarına Nəzarət Palatası ötən gün fəaliyyətə başlayıb. Onun sözlərinə görə, Palata, Mərkəzi Bank və hökumət banklarda manat likvidliyinin çatışmazlığı ilə bağlı problemlər barədə düşünür: "Lakin təkliflərin çoxu likvidliyin pul kütləsinin emissiyası yolu ilə artırılması ilə bağlıdır".
N.Əmirovun fikrincə, bu metod qısamüddətli - 1-2 gün səmərə verə bilər: "Likvidliyin artırılması üçün ən doğru yol dedollarlaşma prosesidir".
