"Son 10-12 il ərzində Azərbaycanda digər sahələrin mühüm inkişafı ilə yanaşı, ən çox inkişaf edən sahələrdən biri də tikinti olub. Həm dövlət investisiyalarının, həm yerli və xarici investisiyaların iştirakı ilə aparılan tikinti işləri göz qabağındadır. Biz fəxr etməliyik ki, Bakı və digər şəhərlərimiz xarici qonaqlar tərəfindən yüksək qiymətləndirilir".
Trend-in məlumatına görə, bunu fövqəladə hallar naziri Kəmaləddin Heydərov bu gün sahibkarlarla keçirdiyi görüşündə deyib.
K.Heydərov bildirib ki, statistik rəqəmlərə baxsaq dövlət investisiyaları ilə yanaşı, yerli və xarici investorların qoyduğu investisiyalar hesabına Bakı və digər şəhərlər gözəlləşib.
Nazir qeyd edib ki, əvvəl tikintiyə başlamazdan əvvəl icazənin alınması üçün 245 gün və bəzən də çox vaxt tələb olunurdu: "Möhtərəm Prezidentin tapşırığı ilə aparılan işlər nəticəsində yeni iş sistemi yaradılıb. Sahibkarların onlara verilən kodlar vasitəsilə tikinti işləri ilə bağlı "online" sistemdə məlumat almaq imkanı olacaq. Bu da vaxt itkisini xeyli azaldacaq. O cümlədən, lisenziyaların verilməsinin sadələşdirilməsi sahibkarların işini sürətləndirəcək".
Nazir gələcəkdə tikinti sahəsində İctimai Şuraların yaradılmasının vacibliyini də vurğulayıb.
Kəmaləddin Heydərov deyib ki, böhrandan sonra tikintiyə investisiya qoymaq sərfəlidir. Bu, həm sahibkarlar üçün faydalıdır, həm də yeni iş yerlərinin açılması üçün səmərəlidir. K.Heydərov tikinti materialları istehsal edən şirkətlərə də tövsiyələr verib.
Nazir bildirib ki, tikinti materialları istehsal edən sahibkarlar bilməlidirlər ki, onların istehsal etdiyi keyfiyyətli inşaat materiallarına üstünlük verilməlidir və onlar məhsulları keyfiyyətlə istehsal etməlidirlər.
K.Heydərov bildirib ki, yerli məhsullar o qədər keyfiyyətli olmalıdır ki, xaricdən gələn məhsullara rəqabətdə uduzmasın.
Nazir həmçinin bildirib ki, bundan sonra tikinti sahəsində heç bir maneə olmayacaq.
"Tikinti sahəsində su, kanalizasiya, elektrik enerjisi və təbii qaz üçün texniki şərtlərin alınması ilə bağlı problemlər mərhələ-mərhələ aradan qaldırılacaq" deyə naziri bildirib.
Nazir bildirib ki, bütün lazımi işlər görülməlidir ki, tikinti sahəsində canlanma müşahidə olunsun. K.Heydərov tikinti işlərinin saxlanılması ilə bağlı məsələyə də münasibət bilidirb: "Tikinti işləri ancaq təhlükəsizlik səbəbi ilə məhkəmənin qərarı ilə saxlanıla bilər".
K.Heydərov vurğulayıb ki, tikinti sahəsində yaradılan problemlər süni problemlərdir və bunları açıq söyləyib aradan qaldırmaq lazımdır: "Biz bunu yaxın zamanlarda etməliyik ki, gələcək problemlər olmasın".
Nazir həmçinin bildirib ki, əvvəllər bəzi binalar ekspertizadan keçmədən istismara verilib: "Əvvəllər bəzi sahibkarlar tikdikləri binaları heç bir dövlət qurumu tərəfindən ekspertiza aparılmadan istismara veriblər. Bu binalar heç bir təhlil olmadan istismara verildiyinə görə, həmin binalarda işığa, qaza məhdudiyyət qoyanda sakinlər narazıçılıq edir, bəziləri isə ümumiyyətlə o mənzillərdə yaşamırlar. Xaricə gediblər və beləliklə, dövlət qurumlarına problemlər yaradırlar. Son illər bu hallar müşahidə olunmur, ancaq çalışıb bundan sonra da bu hallara yol verməməliyik və hər kəs öz üzərində düşən işi yerinə yetirməlidir".
K.Heydərov vurğulayıb ki, yerli icra strukturları tərəfindən əvvəllər tikinti sahəsində yol verilən neqativ hallara bundan sonra yol verilməyəcək.
Nazir qeyd edib ki, yaxın vaxtlarda tikinti sahəsində sənədləşmə ilə bağlı elektron sistemin tətbiqindən sonra problemlər aradan qalxacaq.
K.Heydərov bildirib ki, bu sistem bir növ vahid pəncərə rolunu oynayacaq.
