Azərbaycan Rusiyadan çoxsaylı turistlərin gəlişinə hazırlaşır...

Tarix: 13.02.2016 / 02:25
Bölmə: İqtisadiyyat

Məlum olduğu kimi, Rusiya və Türkiyə arasında kəskinləşən münasibətlər iqtisadi sahəni də əhatə edir və bunun təsirləri Azərbaycana münasibətdə də özünü göstərir. Belə ki, ölkəmizdən Rusiyaya daha çox məhsul ixracına başlanıb və bu həcmin daha da artması gözlənir. Həmçinin məlumdur ki, Türkiyənin Mərkəzi Asiyaya göndərdiyi yüklərin ünvana çatdırılmasında Azərbaycan əsas tranzit məkandır.

Lakin proseslərin gedişi göstərir ki, iqtisadi sahədə proseslər təkcə bununla kifayətlənməyəcək. Cari ildə Rusiyadan Azərbaycana həm də çoxlu sayda turistin gəlişi gözlənir.

Rusiyanın Azərbaycandakı səfiri Vladimir Doroxin "Komsomolskaya Pravda" nəşrinə müsahibəsində də bununla bağlı maraqlı məqamlara toxunub. Onun sözlərinə görə, Rusiya müstəqil dövlət kimi Azərbaycanın imkanlarını bilir və bu ölkə ilə strateji partnyordur: "Rusiya və Azərbaycan arasında münasibətlərin xüsusi dəyəri var və hansısa xoşagəlməz sürprizlər bu münasibətləri poza bilməz. Bu, hazırkı mürəkkəb beynəlxalq şəraitdə çox vacibdir. Azərbaycanın müstəqilliyi illərində biz bir-birimizi anlamağı öyrəndik. Eyni zamanda, əsas qarşılıqlı fəaliyyət heç də neft sektorunda baş vermir". Azərbaycan və Rusiya arasında humanitar, iqtisadi və digər sektorlar üzrə əlaqələrə toxunan V.Doroxin diqqətə çatdırıb ki, Türkiyəyə getməkdən imtina edən rusiyalı turistlər Azərbaycanı seçə bilər: "Əvvəllər 4 milyona qədər rusiyalı turist Türkiyədə istirahət edirdi. İndi onlar Azərbaycanı məmnuniyyətlə seçə bilər. Çünki bu ölkənin turizm potensialı var, bu sahə prioritet istiqamət elan edilib və çox əhəmiyyət verilir. Rusiyalı turistlər Azərbaycanı seçərsə, buna ancaq şad olaram".

Artıq ölkənin turizm obyektləri Rusiyadan gəlməsi gözlənilən çoxsaylı turistləri qarşılaya bilmək üçün indidən hazırlıq işlərinə başlayır. Bununla bağlı olaraq ölkədə fəaliyyət göstərən turizm şirkətləri və otel nümayəndələrinin iştirakı ilə görüş keçirilib. Görüşdə Azərbaycanda gəlmə (incoming) turizmin inkişaf etdirilməsi, xarici turistlərin, xüsusilə də rusiyalı turistlərin ölkəyə cəlb olunması istiqamətində birgə fəaliyyət imkanları müzakirə olunub. Tədbirdə Rusiya turizm şirkətləri ilə əməkdaşlığın gücləndirilməsi və bu ölkədən turistlərin cəlb olunması üçün "Victory Tour", "Millenium Tourism" və "İmprotex Tour"un birlikdə hazırladıqları layihə təqdim olunub. Azərbaycan Turizm Assosiasiyasının sədri Nahid Bağırov məsələ ilə bağlı bildirilib: "Bu gün ölkəmizə xarici turistlərin cəlb olunması istiqamətində zəruri tədbirlər həyata keçirilir. Eyni zamanda, turizm şirkətləri və hotellər bu işdə qarşılıqlı fəaliyyət göstərməlidir".

Ekspertlər hesab edir ki, turizm şirkətləri rus turistləri ölkəyə cəlb edə bilsələr, bu, həm onların daha çox gəlir əldə etməsinə, həm də qeyri-neft sektorunun bu sahəsinin inkişafına böyük təkan verə bilər. Özü də nəzərə almaq lazımdır ki, ölkəmizin müasir və elitar turizm mərkəzinə çevrilməsi üçün bütün imkanlar var və bu imkanlardan istifadə edilərək Azərbaycan turizm baxımından inkişaf etmiş Avropa ölkələrinin səviyyəsinə çatdırıla bilər. Düzdür, son illərdə turizm sektorunun infrastrukturunun inkişaf etdirilməsi ölkəyə gələn turistlərin sayının artmasına səbəb olub. Son beş ilin statistikası göstərir ki, ölkəyə gələn turistlərin sayında artım var. Amma o da faktdır ki, ölkəyə gələn turist sayının artmasına baxmayaraq, hələlik Azərbaycan ölkəyə gələn turistlərin sayına görə bir çox ölkələr, məsələn elə qonşu Gürcüstanla müqayisədə hələ lazımi nəticələr əldə edə bilməyib. Gürcüstana gedən turistlərin sayı Azərbaycana gələn turistlərin sayından təxminən iki dəfə çoxdur. Bu mənada turizm sektorunun inkişaf etdirilməsi və turizm sektoruna daha çox diqqətin ayrılması vacibdir. Eləcə də turistlərin cəlb edilməsi yolu ilə ölkəyə daxil olan sərmayənin həcminin artırılmasına ehtiyac var. Onu da vurğulamaq lazımdır ki, Azərbaycanın turizmin inkişafı ilə bağlı kifayət qədər potensialı var. Ölkəmizin həm tarixi, həm iqlimi və coğrafiyası, həm də yerləşdiyi region imkan verir ki, Azərbaycan turizm sektorundan daha böyük miqdarda gəlir əldə etsin. Turizm prioritet istiqamət olaraq qeyri-neft sektorunun inkişaf etdirilməsi və ölkəyə daxil olan valyutanın həcminin artırılmasına da zəmin yarada bilər. Bu mənada hazırda ilk olaraq Rusiyadan gələn turist sayının daha çox olmasına nail olmaq zəruri sayılır. Çünki bütün bunlar son nəticədə turizmdən daha çox gəlir qazanılmasına imkan verir.