Rusiya Azərbaycanın meyvə-tərəvəz bazasına əl uzadır

Tarix: 06.02.2016 / 01:49
Bölmə: İqtisadiyyat

Rusiya və Türkiyə arasında getdikcə gərginləşən münasibətlər bu ölkələrin iqtisadi müstəvidə də münasibətlərinə ciddi zərbə vurmaqda davam edir. Belə görünür ki, Rusiya Türkiyə məhsullarının idxalı üzərində tətbiq etdiyi qadağanı daha da genişləndirməyə hazırlaşır. Məhz belə bir vaxtda Rusiyanın kənd təsərrüfatı məhsullarına nəzarət orqanı "Rosselxoznadzor"un sədr müavini Aleksey Alekseyenko Türkiyədən idxal edilən bəzi meyvə və tərəvəzlərin bitki sağlamlıq normalarına cavab vermədiyi üçün qadağan ediləcəyini bildirib.

Nəzarət tədbirləri zamanı bəzi meyvə və tərəvəzlərin bitki sağlamlıq normalarına cavab vermədiyini xatırladan A.Alekseyenko konkret hansı meyvə-tərəvəzdən söhbət getdiyini isə açıqlamayıb. Daha əvvəl isə qurum bildirmişdi ki, 7,8 ton pomidorun Rusiyaya idxal edilməsinin qarşısı alınıb. Xatırladaq ki, Rusiya noyabrın 25-də Türkiyənin bu ölkəyə məxsus təyyarəni vurmasından sonra Türkiyədən bəzi ərzaq məhsullarının idxal edilməsini dayandırmışdı. İdxalı dayandırılan məhsullar sırasında isə pomidor, gül kələm, naringi, üzüm, alma, armud, çiyələk kimi meyvə və tərəvəzlər yer alırdı. Moskvanın bu məhsulları almaq istədiyi digər ölkələr Rusiya bazarlarına daxil olmaqda maraqlıdır. Rusiya isə həmin məhsulların əhəmiyyətli hissəsini Azərbaycandan almaqda maraqlı olduğunu bəyan edir. Hətta Rusiya prezidentinin iqtisadiyyat məsələləri üzrə müşaviri Sergey Qlazev Azərbaycan brendlərinin bu ölkədə daha geniş təmsil edilməsinə çağırıb. "Moskva-Baku" portalına müsahibəsində Qlazev Azərbaycan mallarının Rusiyada yaxşı tanındığını vurğulayıb: "Lakin meyvə və tərəvəzlər haqda danışsaq, o zaman bizim piştaxtalarımızda mənşəyi müəyyən edilməyən kənd təsərrüfatı məhsullarının geniş assortimentini görə bilərik. İndi rusiyalı istehlakçılar həmin pomidorlarda "Made in Azerbaijan" brendini görsə o saat biləcək ki, bu, Azərbaycanın məhsuludur, nəticədə ona tələbat artacaq". Yeri gəlmişkən qeyd edək ki, Prezident İlham Əliyev bu günlərdə Azərbaycandan qeyri-neft məhsullarının ixracının təşviq edilməsinə dair əhatəli sərəncam imzalayıb. Həmin sərəncamda ixracla məşğul olan iş adamlarına dəstək verilməsi, "Made in Azerbaijan" brendinin yaradılması və xaricdə tanıdılması kimi mühüm məsələlər yer alır.

Putinin müşavirinin sözlərinə görə isə, Azərbaycanın kənd təsərrüfatı məhsulları öz keyfiyyətinə görə tanındığı üçün onlara tələbat çoxdur: "Əgər xalq tələbatı mallarından danışsaq, bu sahədə Rusiya bazarında tanınmaq lazımdır. Ona görə də brendləşmə bu istiqamətdə atılmış düzgün addımdır". Azərbaycan üçün xüsusilə mühüm və həssas məsələ bu ölkədən olan və Rusiyada işləyən milyonlarla adam üçün transsərhəd keçidlərinin asanlaşmasıdır. Məlum olduğu kimi, Avrasiya İttifaqı çərçivəsində gömrük sərhədləri yoxdur". Rusiya prezidentinin müşaviri qeyd edib ki, Rusiyada işləyən və ticarətlə məşğul olan milyonlarla azərbaycanlı hazırda üzücü sərhəd və gömrük nəzarətindən keçməli olur. Avrasiya İttifaqında isə bu məsələlər həll edilib: "Bu, Azərbaycan üçün birbaşa və mühüm faydadır. Çünki Avrasiya İttifaqı bugünkü reallıqlarda əlavə cəlbedicilik qazanıb". Azərbaycan isə Qarabağ məsələsinin həllindən sonra Avrasiya İttifaqında yer ala biləcəyini bəyan edib. İndilikdə Avrasiya İttifaqına üzv olmadan da Azərbaycan Rusiyaya böyük həcmdə kənd təsərrüfatı malları göndərə bilər. Özü də qeyd olunduğu kimi, Rusiya bu məsələdə maraqlıdır. Beləliklə, şimal qonşumuz ölkəmizdən daha çox məhsul almağı düşünür və bunun üçün lazım olan bütün addımları atır. Xatırladaq ki, hazırda Azərbaycandan Rusiyaya daha çox kənd təsərrüfatı məhsulları satılır. Azərbaycan və Rusiya birgə müəssisələrin yaradılması, logistik mərkəzlərin tikilməsi üzrə intensiv danışıqlar aparır, həmçinin ölkədə kənd təsərrüfatı məhsullarının yetişdirilməsi məqsədilə icarə məsələsi müzakirə olunur.

Hazırda Azərbaycan və Rusiya birgə müəssisələrinin yaradılması, logistik mərkəzlərin tikilməsi fonunda ölkəmizdən Rusiyaya daha çox məhsul göndəriləcək. Moskva iqtisadiyyatın digər sahələri üzrə də əməkdaşlıqda xüsusilə maraqlıdır. Məlum olduğu kimi, Rusiya və Azərbaycan arasında investisiyaların müdafiəsi haqqında hökumətlərarası razılaşma imzalanıb. Bundan başqa, hələ ötən il yük daşımalarının həcmini artırmaq üçün Rusiya prezidenti Vladimir Putin Xəzər dənizi ətrafında dəmir yolu dairəsi layihəsinin həyata keçirilməsini gündəmə gətirib. Layihə Xəzər dənizinin əsas limanlarının birləşdirilməsini nəzərdə tutur. Bu, yüklərin daşınması zamanı vaxt itkisinin və artıq məsrəflərin qarşısını ala bilər. Hesab edilir ki, sözügedən layihə Xəzəryanı ölkələrin iqtisadiyyatlarının rəqabət qabiliyyətliliyinə müsbət təsir göstərəcək. Lakin bu layihə reallaşmadan da Azərbaycan Rusiyaya daha çox aqrar məhsul göndərmək iqtidarındadır.