Azərbaycan Mərkəzi Bankı bağlanan bankların əmanətçilərinə kompensasiya verilməsində vəsait çatışmadığı təqdirdə Azərbaycan Əmanətlərin Sığortalanması Fonduna (ADIF) maliyyə yardımı edə bilər. Trend-in məlumatına görə, bunu Fondun icraçı direktoru Azad Cavadov mətbuat konfransında deyib.
Onun sözlərinə görə, hazırda ADIF-in vəsaitinin həcmi manat ekvivalentində 132 milyona çatır: "Ləğv edilmiş 6 bank üzrə əmanətlərin ümumi məbləği 80 milyon manat təşkil edirdi, lakin "Bank of Azerbaijan"ın əmanətlərinin yoxlanılması zamanı bankda sığorta olunan əmanətlərin həcminin 36 deyil, 24 milyon manat olduğu məlum olub. Nəticədə sığortalanan əmanətlərin ümumi həcmi 68 milyonadək enib. Əlavə etmək istəyirəm ki, qalan banklar hələ müflis elan edilməyib, lakin bu halda da öhdəliklərimizi yerinə yetirmək üçün vəsaitimiz çatacaq".
A.Cavadov qeyd edib ki, yeni qanunvericiliyə əsasən, vəsait çatışmazsa, fond kredit üçün Mərkəzi Banka müraciət edə bilər: "Əvvəlki qanunvericiliyə əsasən, vəsait çatışmadığı təqdirdə fond vəsaitin cəlb edilməsi məqsədilə istiqrazlar buraxa bilər və ya kreditə görə Mərkəzi Banka müraciət edə bilərdi. Lakin yeni qanunvericiliyə əsasən, kredit üçün Mərkəzi Banka müraciət edə bilərik".
Qeyd edək ki, ilin əvvəlindən Azərbaycanda 6 bankın lisenziyası ləğv edilib: "Qafqaz İnkişaf Bankı", "Atrabank", "Gəncəbank", "Bank of Azerbaijan", "United Credit Bank" və "NBCBank".
Azad Cavadov mətbuat konfransında deyib ki, "Bank of Azerbaijan"ın 6 599 əmanətçisi Azərbaycanın Əmanətlərin Sığortalanması Fondundan kompensasiya alacaq. Onun sözlərinə görə, ADIF yanvarın 29-dan bankın əmanətçilərinə kompensasiya verməyə başlayacaq: "Bankın cəmi 7 432 əmanətçisi var, bunun 6 599-u 24 199,448 min manat dəyərində kompensasiya alacaq".
A.Cavadov qeyd edib ki, qüvvədə olan qanunvericiliyə əsasən, sığortalanan əmanətin maksimum həcmi 30 min manatdır: "Əgər hansısa müştərinin 50 min manat dəyərində əmanəti varsa, 30 min manatı fond tərəfindən qaytarılacaq, qalan vəsait isə şirkət-ləğvedici (bankın vəsaitləri hesabına) tərəfindən qaytarılacaq. Kompensasiyaların verilməsi üçün artıq agent banklar müəyyənləşdirilib. Belə ki, kompensasiyaları "Muğanbank"da, Naxçıvan Muxtar Respublikasında isə "Rabitəbank"ın filialları vasitəsilə almaq mümkün olacaq".
Onun sözlərinə görə, kompensasiyaların verilməsinə başlanılması üçün hazırlıq işləri artıq tam yekunlaşıb: "Reyestrlər bu gün banklara veriləcək, vəsaitlər də bu gün banklara köçürüləcək ki, onlar sabahdan ödənişə başlaya bilsinlər. Əmanətlər yerləşdirildiyi valyutada qaytarılacaq. Multivalyuta əmanətləri olarsa, bankın müştərisinə 30 min manatı ötməmək şərtilə sığorta halı zamanı Mərkəzi Bankın rəsmi məzənnəsi üzrə manatla kompensasiya ödəniləcək".
A.Cavadov əlavə edib ki, "Bank of Azerbaijan"da əmanətlərin əsas hissəsi milli valyutada yerləşdirilib.
