Toyuq və yumurta istehsalı ilə məşğul olan şirkətlər ölkəmizə xaricdən məhsul gətirilməsinə etiraz edirlər. Ekspertlər isə bu qənaətdədirlər ki, idxala məhdudiyyət qoyulsa, quş əti məhsulları və yumurta bahalaşacaq.
“Azərbaycan Quş Əti, Yumurta İstehsalçıları və İxracatçıları Assosiasiyası” hökumətə müraciət edib. Belə ki, ölkəyə xaricdən iki-üç manata quş əti gətirilir. Həmçinin, yumurta da xaricdən idxal olunur. Bununla əlaqədar yerli istehsalçıların satışlarının məhdudlaşdığı qeyd olunub. Bildirilib ki, bütün bu məsələlər yerli istehsalımıza mənfi təsir göstərir. Belə davam edərsə, yerli quşçuluq sənayemizi nə gözləyir?
"Azərbaycan quşçuluq təsərrüfatlarının qiymət artımına səbəb olan problemləri son aylarda xeyli kəskinləşib"
Azərbaycan Quş Əti, Yumurta İstehsalçıları və İxracatçıları Assosiasiyasının rəhbəri Mürvət Həsənli hesab edir ki, hazırda toyuq budu və yumurtanın qiymətinin artırılması üçün kifayət qədər əsaslar var. O, bütün bu əsasları bir yerə toplayaraq hökumətə təqdim edib və orada qiymət artımının səbəblərini izləmək üçün artıq işçi qrup yaradılıb: "Azərbaycan quşçuluq təsərrüfatlarının qiymət artımına səbəb olan problemləri son aylarda xeyli kəskinləşib. Bunların hamısı istehsalın azalmasına gətirib çıxara bilər və bu, qiymətləri artırmağın etibarlı yoludur, bundan başqa, çətinliklər əlaqəli sahələrə də təsir edəcək. İndi biz artıq heyvandarlıq sektorunda müəyyən tənəzzülün şahidi oluruq. Təcili tədbirlər görülməsə, hazırda ölkəmizdə artıq möhkəm kök salmış bir neçə sahədə bir anda çökmə baş verə bilər. Biz nəinki seleksiya sahəsində çətinliklər yaşayırıq, həm də ölkəyə broyler əti və yumurtasının kütləvi şəkildə idxalı yerli istehsalçılara problemlər yaradır. Buna görə də quşçuluq təsərrüfatları hökuməti, nəhayət, idxal məhsulları üçün kvota tətbiq etməyə çağırır. Yerli istehsal tələbatı ödəyirsə, məhsulumuz isə ixrac olunursa, biz niyə xaricdən məhsul idxal etməliyik?
Onu da deyim ki, yerli broyler təsərrüfatları ayda 14-15 min tona qədər, ildə isə 180 min tona qədər quş əti istehsal edə bilir. Bu isə daxili tələbatdan çoxdur - bizdə 140-160 min tonu keçmir. Bundan əlavə, yerli quşçuluq təsərrüfatları damazlıq və süfrə yumurtasına olan tələbatı 100 və 140 faiz ödəyə bilər. Amma xaricdən idxal çox vaxt keyfiyyətli olmur. Lakin idxal uzun müddətdir ki, quşçularımızı sevindirmir".
Günel CƏLİLOVA
