“Biz həm muxtar respublikanın bütün tələbatını “yaşıl enerji” ilə təmin edəcəyik, həm də qonşu ölkələrə “yaşıl enerji”ni ixrac edəcəyik”.
Bunu Prezident İlham Əliyev 2023-cü ilin 6 ayının sosial-iqtisadi inkişafının yekunlarına həsr olunmuş müşavirədə deyib.
Ölkə başçısının sözlərinə görə, bu yaxınlarda Naxçıvan Muxtar Respublikasının gələcək inkişafı ilə bağlı qəbul olunan dövlət proqramı tam icra ediləcək: “Bu, Naxçıvanın uğurlu sosial-iqtisadi inkişafını qısa müddət ərzində təmin edə biləcək proqramdır və əminəm ki, tam icra ediləcək. Çünki bu proqram bizim öz resurslarımıza əsaslanıbdır. O cümlədən mən nə üçün bunu indi dilə gətirirəm, orada Naxçıvanın da Qarabağ və Şərqi Zəngəzur kimi “yaşıl enerji” zonasına çevrilməsi məsələsi mənim tərəfimdən qoyulmuşdur. Naxçıvan Muxtar Respublikasında elektrik enerjisinin böyük hissəsi indi su elektrik stansiyaları vasitəsilə istehsal olunur. Orada günəş və külək elektrik stansiyalarının inşası da nəzərdə tutulur - ola bilər 1000 meqavat, ola bilər 1500 meqavat. Biz həm muxtar respublikanın bütün tələbatını “yaşıl enerji” ilə təmin edəcəyik, həm də qonşu ölkələrə də “yaşıl enerji”ni ixrac edəcəyik”.
Çox güman ki, Naxçıvanda “yaşıl enerji” istehsalı artandan sonra gələcəkdə bunun Ermənistana da ixrac olunması mümkündür.
“Ermənistanla sülh sazişi imzalanandan sonra elektrik enerjisinin bu ölkəyə ixracı da mümkün olacaq”
Sözügedən məsələ ilə bağlı fikirlərini “Bakı-Xəbər”lə bölüşən iqtisadçı alim Əli Əlirzayevin fikrincə, Naxçıvanda “yaşıl enerji”nin çox böyük potensialı var: “Naxçıvanda istifadə olunan elektrik enerjisinin 50 faizi artıq bərpa olunan enerji mənbələrindən alınır. Naxçıvan öz ərazisinin elektrik enerjisini ixrac etmək iqtidarındadır. Bu isə çox böyük nailiyyət deməkdir. Həmçinin, çox ciddi prosesdir. Muxtar respublikanın əlverişli iqlim şəraiti alternativ və bərpa olunan enerji mənbələrindən istifadə üçün geniş imkanlar açır. Naxçıvanda havaların isti olması, günəş aktivliyinin yuxarı olması böyük həcmdə elektrik enerjisi istehsal etməyə imkan verir. Ona görə də bu potensialdan istifadə olunmalıdır. O cümlədən, Naxçıvanda külək enerjisi istehsalı üçün də potensial var. Düzdür, Naxçıvanın elektrik enerjisinə olan tələbatın ödənilməsində su elektrik stansiyaları mühüm çəkiyə malikdir. Ancaq zamanla Naxçıvanın elektrik enerjisinə olan tələbatın tam şəkildə “yaşıl enerji” hesabına təmin etmək mümkündür. Bu, Naxçıvanın inkişafının strateji əhəmiyyət kəsb edən sahələridir. Təbii ki, bununla bağlı ciddi kapital qoyuluşuna, müasir texnologiyalara əsasən günəş və külək elektrik stansiyalarının tikilməsinə ehtiyac var. Bu da yalnız dövlət vəsaiti hesabına mümkündür. Sonrakı mərhələdə “yaşıl enerji” istehsalına özəl sektor da cəlb oluna bilər. Bir sözlə, bütün işlər sistemli şəkildə təşkil olunsa, Naxçıvan həm öz tələbatını “yaşıl enerji” hesabına ödəyəcək, həm də bunu ixrac edəcək. Ermənistanla sülh sazişi imzalanandan sonra elektrik enerjisinin bu ölkəyə ixracı da mümkün olacaq. Münasibətlər düzələndən sonra bunu istisna etmirəm. Nəzərə almaq lazımdır ki, muxtar respublika Ermənistanla uzun sərhədə malikdir”.
Vidadi ORDAHALLI
