Məlumdur ki, Azərbaycanda çörəyin qiyməti ucuzlaşıb. 650 qramlıq çörək artıq 65 qəpiyə yox, 60 qəpiyə satılır.
Onu da qeyd edək ki, son aylar Azərbaycanda unun da qiyməti xeyli aşağı düşüb. Əvvəllər 41 manata təklif olunan bir un kisəsi indi 32-33 manata satılır. Qeyd edək ki, qiymətin azalması dünya bazarlarında taxılın ucuzlaşması ilə izah olunur.
Bildirdiyimiz kimi, zavod çörəyinin qiyməti 5 qəpik enib. Ancaq digər çörək məmulatlarının qiyməti stabil olaraq qalır.
“Zavod çörəyinin satış qiyməti 30 qəpik olmalıdır, ancaq indi 60 qəpik olub”
Mövzu ilə bağlı fikir bildirən Liberal İqtisadçılar Mərkəzinin sədri, iqtisadçı ekspert Akif Nəsirli “Bakı-Xəbər”ə açıqlamasında qeyd etdi ki, çörək istehsalı inhisarda olduğu üçün bazarın bu seqmetində rəqabət mühiti yoxdur. Rəqabət mühiti olmadığı üçün çörəyin qiyməti maya dəyərinin aşağı düşməsinə təsir göstərmir: “Maraqlı qüvvələr çörəyin qiymətini aşağı salmaq istəmir. Məlumat üçün deyim ki, hazırda ərzaq buğdasının 1 tonunun qiyməti 200 dollardır. Milli valyuta ilə isə ərzaqlıq buğdanın bir tonunun qiyməti 340 manata təklif olunur. 340 manatlıq buğdadan 800 kq un, 200 kq isə kəpək çıxır. Buğdanın ümumi alınması çəkilən xərci yəni 340 manatı 800 kiloqrama böləndə 42 qəpik alınır. Bir kiloqramın unun qiyməti 42 qəpik edir. Kəpəyin qiymətini əlavə edəndə buğdanın qiyməti daha da ucuzlaşır. Onu da deyim ki, 1 kiloqram undan 2 çörək hazırlanır. 42 qəpiklik undan 2 çörək hazırlanırsa o zaman bir çörəyin maya dəyəri 21 qəpik edir. Daşınma və digər xərcləri hesablayandan təxminən bir çörəyin maya dəyəri 30 qəpik edir. Zavod çörəyinin satış qiyməti 30 qəpik olmalıdır. Ancaq indi 60 qəpik olub”.
Həmsöhbətimiz onu da əlavə etdi ki, bütün çörək zavodları deyil, yalnız “Binə” çörək zavodu qiyməti 5 qəpik endirib.
Günel CƏLİLOVA
