Bu ilin yanvar-may aylarında Azərbaycanın idxalının 30,7%-i MDB ölkələrindən, 19,37%-i Avropa İttifaqı ölkələrindən, 49,93%-i isə digər ölkələrdən həyata keçirilib. Bu barədə Dövlət Gömrük Komitəsi məlumat yayıb.
Məlumata görə, bu rəqəmlər ötən ilin eyni dövründə müvafiq olaraq 29,3%, 15,5% və 55,2% olub.
Maraqlıdır, Azərbaycanın idxalda MDB ölkələrindən asılılığı niyə artır?
“MDB ölkələrində idxalın artmasının bir səbəbi də Azərbaycanın Türk Dövlətləri Təşkilatında təmsil olunan qardaş türk ölkələri ilə əlaqələri genişləndirməsidir”
Millət vəkili Vüqar Bayramov “Bakı-Xəbər”ə açıqlamasında qeyd etdi ki, ötən illərlə müqayisədə Azərbaycana ərzaq idxalında artım müşahidə olunur: “Məlumat üçün bildirim ki, 2022-ci ildə Azərbaycanın ümumi idxalı 14,2 milyard dollar olub. Bu əvvəlki illə müqayisədə 22,4 faiz çoxdur. Ümumi idxalın, o cümlədən, MDB ölkələrindən ərzaq gətirilməsi hallarının artmasının bir çox səbəbləri var. İlk olaraq deyim ki, inflyasiya səviyyəsi və region bazarındakı qiymət artımı idxalın ümumi həcminə təsir göstərir. Belə olan halda idxalın ümumi həcmi istər-istəməz artır”.
Həmsöhbətimiz onu da əlavə etdi ki, bəzi MDB ölkələrinin, xüsusilə Rusiya və Belarusun Avropa bazarına çıxış imkanı məhdudlaşıb. Onlar alternativ bazarlara öz məhsullarını göndərməyə çalışır. Bu da, təbii ki, ümumi idxalın həcminə təsir edir: “MDB ölkələrində idxalın artmasının bir səbəbi də Azərbaycanın Türk Dövlətləri Təşkilatında təmsil olunan qardaş türk ölkələri ilə əlaqələri genişləndirməsidir. Xüsusən də, Qazaxıstan və Özbəkistanla ticarət əlaqələrində ciddi artımlar qeydə alınıb. Məlumdur ki, bu ölkələr MDB-nin üzvü olduğu üçün idxalın həcminin artmasına təsir edir. Nəzərə almaq lazımdır ki, MDB ölkələri bizim qonşu ölkələrimizdir. Burada nəqliyyat xərclərinin az olması və məhsullar üzrə ƏDV-dən azad olma həm də MDB-dən idxal olunan məhsulların ucuz başa gəlməsinə səbəb olur”.
Millət vəkili hesab edir ki, idxalın artması ümumilikdə iqtisadi dövriyyənin artması və iqtisadi inkişafla əlaqədardır. Bu bir təbii artımdır.
Günel CƏLİLOVA
