Azərbaycan Dəmir Yolları” Qapalı Səhmdar Cəmiyyəti, “Qazaxıstan Dəmir Yolları Milli Şirkəti” Səhmdar Cəmiyyəti və “Gürcüstan Dəmir Yolları” Səhmdar Cəmiyyəti birgə müəssisə yaradacaq.
Bu, baş nazir Əli Əsədov və Qazaxıstan Respublikasının Baş naziri Alixan Smailov arasında danışıqların yekununda imzalanan “Azərbaycan Dəmir Yolları” QSC, “Qazaxıstan Dəmir Yolları Milli Şirkəti” SC və “Gürcüstan Dəmir Yolları” SC arasında birgə müəssisənin yaradılması və fəaliyyətinin əsas prinsipləri haqqında Saziş”də əksini tapıb.
Eyni zamanda “Azərbaycan Respublikasının İqtisadiyyat Nazirliyi ilə Qazaxıstan Respublikasının Sənaye və İnfrastrukturun İnkişafı Nazirliyi arasında gəmilərin və dəmir yolu lokomotivlərinin təchizatı sahəsində əməkdaşlıq haqqında Memorandum imzalanıb.
"Birgə yaradılan bu müəssisənin əsas zənciri Azərbaycandır"
Liberal İqtisadçılar Mərkəzinin sədri Akif Nəsirli "Bakı-Xəbər"ə şərhində bildirdi ki, üç ölkənin dəmiryollarının Azərbaycan ərazisindən keçməsi çox müsbət hal olacaq. "Bu cür logistik şirkətlərin birləşərək ümumi bir müəssisə yaratması əsasən qarşılıqlı əlaqələrin operativliyinə töhfə verir. Tutalım, ayrı-ayrı ölkələrin dəmir yolu şirkətlərinin bir-biri ilə yük mübadiləsi aparması üçün bunlar əvvəlcədən müəyyən razılaşma əldə etməlidir, amma ümumi bir müəssisə yaradılanda bunlara ehtiyac qalmır. Tutaq ki, Azərbaycandan Qazaxıstana yük daşımaq lazımdır, onda əvvəlcədən birgə yaradılmış şirkətə müraciət olunur. Bununla da məsələ həll olunur. Gürcüstanla da həmçinin. Bu, ilk növbədə ölkələr arasında logistik kommunikasiyaların operativliyini təmin edir.
Digər tərəfdən bu, həm də Mərkəzi Asiya ölkələri ilə Qafqaz ölkələri arasında iqtisadi əlaqələrin, bağların güclənməsinə töhfə verəcək. İkinci bir tərəfdən, göründüyü kimi, birgə yaradılan bu müəssisənin əsas zənciri Azərbaycandır. Eyni zamanda bir tərəfdə Qazaxıstandır, bir tərəfdə isə Gürcüstandır. Gürcüstanla Qazaxıstanı Azərbaycan bir-birinə bağlayır. Bu bağlar nə qədər uzansa Azərbaycana da bir o qədər xeyri var"-deyə A. Nəsirli bildirdi.
O hesab edir ki, bu operativlik nəticəsində Azərbaycanın dəmir yolu şəbəkəsindən daha çox yük keçəcək və yük ötürmə qabiliyyətinin genişlənməsi sayəsində Azərbaycana bu logistik xidmətdən daxil olan vəsaitlərin həcmi artacaq. A.Nəsirlinin sözlərinə görə, bunun eyni zamanda iqtisadi-siyasi tərəfi də var. "Bilirsiz ki, Azərbaycan həm də türk dünyasını bütövləşdirə bilən bir ölkədir. Hesab edirəm ki, gələcəkdə Azərbaycan Qazaxıstan və Gürcüstanın birgə yaratdığı bu müəssisəyə digər ölkələr də qoşulacaq. Məsələn, Zəngəzur dəhlizi açıldıqdan sonra Türkiyənin bura qoşulması yüz faiz reallaşacaq. Mərkəzi Asiyadakı digər türk dövlətləri - Özbəkistan, Qırğızıstan, Türkmənistan, hətta qeyri - türk dövləti olan Tacikistanın da bu müəssisəyə qoşulmaqda maraqlı olması gözləniləndir. Yəni bu hər tərəfdən Azərbaycan, həm də türk dünyası üçün çox faydalı bir layihədir. İnanıram ki, bu tendensiyasının davamı gələcək, bu təşəbbüsə qoşunlarının sayı artacaq. Bundan da həm türk dünyası, həm Qafqaz regionu, həm Azərbaycanın özü həm iqtisadi, həm siyasi, həm də mədəni dividendlər qazanacaq"- deyə A. Nəsirli qeyd etdi.
İradə SARIYEVA
