Azərbaycanın ən böyük qış-yay turizm mərkəzi olan “Şahdağ Turizm Mərkəzi” 2022-ci il üzrə maliyyə vəziyyətini açıqlayıb. Qurum turizmin inkişafı məqsədilə dövlətdən həl il 12-14 milyon manat həcmində dəstək alsa da, yenə də ili böyük zərərlə tamamlayıb.
Belə ki, 2022-ci ildə şirkətin təsərrüfat fəaliyyətindən gəlirləri 9,6 milyon manat olub, bu, əvvəlki illə müqayisədə 3,5 milyon manat artıqdır. Şirkətin sair gəlirləri isə əksinə, yarım milyon manat azalaraq 783 min manata düşüb. Eyni vəziyyətdə dövlətin mərkəzə yardım üçün ayırdığı vəsait də 2021-ci ildəki 13,8 milyon manatdan, 2022-ci ildə 12 milyon manat olub. Mərkəzdə satışın maya dəyəri də 12 milyon manat olub. 2022-ci ilin sonuna “Şahdağ Turizm Mərkəzi”nin cəmi aktivləri 10 milyon manat azalaraq 312 milyon manatdan 302 milyon manata düşüb. Şirkətin cəmi kapitalı 309 milyon manatdan 300 milyon manata enib. Bu ilki zərəri də nəzərə alanda, şirkət indiyədək üst-üstə 97 milyon manat zərər edib.
Belə olan halda, heç bir kommersiya əsası olmayan bu müəssisəyə dövlət büdcəsindən 12 milyon manat yardımın ayrılması nə dərəcədə doğrudur?
“Şahdağ Turizm Mərkəzi”ni idarə edənlər arxayındılar ki, büdcədən dotasiya ayrılacaq və o üzdən işlərində dönüş yaratmaqda maraqlı deyillər”
Sözügedən məsələ ilə bağlı “Bakı-Xəbər”ə açıqlama verən iqtisadçı-ekspert Fuad İbrahimovun fikrincə, davamlı olaraq zərərlə işləyən belə müəssisələrə yardımların edilməsi doğru deyil: “Əgər bir təşkilat davamlı olaraq zərərlə işləyirsə, deməli, nələrsə yerində deyil. Özü də davamlı olaraq ora maliyyə dəstəyi verilirsə, dotasiya ayrılırsa, orada rəqabətyönümlü biznes mühitünün qurulması, xidmətin göstərilməsi qeyri-mümkündür. Bəli, bura əhalinin qış istirahəti üçün gözəl məkandır. Yerli əhali, xarici turistlər “Şahdağ Turizm Mərkəzi”nin imkanlarından istifadə edirlər. Ancaq bu mərkəzin idarəçiliyində elastiklik yoxdur. O cümlədən, orada istirahət edənlərin sayı artsa da, bu, qiymətlərin azalmasına gətirib çıxarmır. Bütün bunların və digər çatışmazlıqların üst-üstə yığılması getdikcə zərərin miqyasının daha da böyüməsinə öz təsirini göstərir. Aydın məsələdir ki, idarəçilikdə elastiklik olmadığı üçün və üstəlik arxayınçılıq əvvəl-axır belə nəticələnməli idi. “Şahdağ Turizm Mərkəzi”ni idarə edənlər arxayındılar ki, büdcədən dotasiya ayrılacaq və o üzdən işlərində dönüş yaratmaqda maraqlı deyillər. Bu cür idarətmə mexanizmi ilə uğur qazanmaq mümkün deyil. Ona görə də idarəetmə mexanizmi dəyişdirilməlidir. “Şahdağ Turizm Mərkəzi”ni idarə edən heyət dəyişdirilməlidir. Ümumiyyətlə, bu müəssisə dövlətin dotasiyasından çıxarılmalıdır və idarəetmə verilməlidir normal ixtisaslaşmış bir biznes şirkətinə. Bununla da biz, yaranan problemdən xilas ola bilərik. “Şahdağ Turizm Mərkəzi” kimi ziyanla işləyən müəssisələr az deyil. Özləri pul qazanır, amma dövlətdən dotasiya da qoparırlar. Baxmayaraq ki, ölkədə sözügedən məsələlərin tənzimlənməsi ilə bağlı İnvestisiya Fondu yaradılıb, amma yenə də dəyişən bir şey yoxdur. Görürük ki, hələ də istədiyimizə nail ola bilməmişik. Ona görə də bu məsələdə yeganə yol idarəetmənin ixtisaslaşmış biznes operatoruna verilməsidir”.
Vidadi ORDAHALLI
