“İzvestiya” qəzeti Rusiya Avtomobil Sığortaçılar İttifaqına (RSA) istinadən yazır ki, Rusiya tərəfdaş ölkələrlə əməkdaşlıqda alternativ beynəlxalq avtomobil sığortası sistemini inkişaf etdirməyi planlaşdırır. Bu təşəbbüs ölkənin bu sistemə üzvlüyünün mümkün xitamını nəzərə alaraq “Yaşıl Kart”la əvəz edib və 2024-cü il yanvarın 1-dən tətbiqi planlaşdırılır.
Qeyd edilir ki, Belarus ilə razılıq əldə olunub, Türkiyə və Azərbaycanla danışıqlar aparılır. Hər bir büro ilə ayrıca müqavilələr bağlanır. Bəlkə də onların əsasında tam hüquqlu müstəqil sığorta sistemi yaratmaq mümkün olacaq. RSA-nın hesabatında deyilir ki, “Yaşıl Kart”ın tətbiqi 2024-cü il yanvarın 1-dən planlaşdırılır.
Qeyd edək ki, “Yaşıl Kart” Rusiyanın OSAGO-ya oxşar beynəlxalq sığorta polisidir. 1 iyun 2023-cü il tarixindən etibarən Rusiyanın “Yaşıl Kart” sənədləri bəzi digər ölkələrdə etibarlılığını davam etdirsə də, Avropa İttifaqı, Böyük Britaniya və İsveçrədə qüvvəsini itirdi. 30 iyun 2023-cü il tarixindən etibarən Rusiya və Belarusun sertifikatları əksər ölkələrdə etibarlılığını dayandırır.
Bir sözlə, beynəlxalq avtomobil sığorta sistemində Rusiyanın avtomobul sığortası Aİ-də, Böyük Britaniyada, Norveçdə artıq işləmir. Rusiya da bununla bağlı alternativ sığorta sistemi qurur və bir sıra ölkələri bura cəlb etmək istəyir. Maraqlıdır, Azərbaycan bura qoşula bilərmi? Qoşulsa necə olacaq?
“Azərbaycanın, xüsusən inkişaf etmiş ölkələrin dəstəklədiyi sistemlər çərçivəsində fəaliyyətini davam etdirilməsi daha məqsədəuyğundur”
Məsələyə münasibət bildirən millət vəkili Vüqar Bayramov “Bakı-Xəbər”ə açıqlamasında buna birmənalı yanaşmadı: “Ümumiyyətlə, Azərbaycan həm beynəlxalq layihələrdə, həm də bütövlükdə regional məsələlərdə milli maraqlar aspektindən çıxış edir. Yəni öz strateji hədəflərinə uyğun olaraq istiqamətləri müəyyənləşdirir və orada təmsil olunur. Təbii ki, Azərbaycan beynəlxalq sistemlərə inteqrasiya olunmuş şəbəkələrin, o cümlədən sığorta sistemi olan layihələrin üzvüdür və bunları dəstəkləyir. Ancaq hər halda Azərbaycan xüsusən Avropa İttifaqı daxil olmaqla inkişaf etmiş ölkələrin üzv olduğu və dəstəklədiyi sistem çərçivəsində öz fəaliyyətini qurub. O cümlədən, sığorta sistemində fəaliyyətin genişlənməsi müşahidə olunur. Ona görə də Rusiyanın avtomobil sığortası ilə bağlı yaratdığı sistemə qoşulmaq məsələsi ətraflı dəyərləndirilməlidir. Bunun bizim iqtisadi maraqlara nə dərəcədə uyğun olması təhlil olunmalıdır. Eyni zamanda, onun müsbət və mənfi tərəfləri müqayisə edilməlidir. Xüsusən də avtosığorta sektoruna təsirini qiymətləndirdikdən sonra hər hansı bir qərarın verilməsi mümkündür. Yəni ondan sonra qoşulmaq və yaxud da qoşulmamaq barədə qərar verilməlidir. Ancaq bütövlükdə, Azərbaycan daha çox beynəlxalq sistemlər çərçivəsində bu istiqamətdə öz işini görür. Ona görə də düşünürəm ki, ölkəmizin, xüsusən də inkişaf etmiş ölkələrin dəstəklədiyi sistemlər çərçivəsində fəaliyyətini davam etdirilməsi daha məqsədəuyğundur. Üstəlik, Belarusdan fərqli olaraq, Azərbaycan Avrasiya İqtisadi İttifaqının üzvü deyil. Bir sözlə, sözügedən məsələdə sırf Azərbaycanın iqtisadi maraqlarına uyğun qərar verilməlidir”.
Vidadi ORDAHALLI
