Bu günlərdə dövlət qulluqçularının orta aylıq nominal əməkhaqqı açıqlanıb. Məlumata görə, dövlət qulluqçularının orta aylıq nominal əmək haqqı əvvəlki ilə nisbətən 40,1 faiz artaraq 1785,1 manat təşkil edib. Bu isə o deməkdir ki, dövlət qulluqçularının orta aylıq məvacibi 1700 manatdır. Ancaq Azərbaycanda orta aylıq əmək haqqı 900 manatdır.
Dövlət qulluqçularının orta aylıq əmək məvacibi ilə orta aylıq əmək haqqı arasında niyə 800 manat fərq var? Belə bir fərqin yaranmasının səbəbi nə ilə bağlıdır?
“Dövlət qulluqçularının orta aylıq məvacibi ilə orta aylıq əmək haqqı arasında fərqin olmaması üçün minimum əmək haqqı artmalıdır”
Iqtisadçı ekspert Xalid Kərimli “Bakı-Xəbər”ə açıqlamasında qeyd etdi ki, Azərbaycanda minimum əmək haqqı aşağıdır. Belə ki, minimum əmək haqqı 345 manatdır. Azərbaycanda çox böyük kütlə var ki, aşağı maaş alır. Əhalinin böyük əksəriyyəti isə, demək olar ki, 400-600 manat arasında əmək haqqı alır. Orta aylıq əmək haqqı isə 900 manat müəyyən edilib. Ancaq bu məbləği alanlar elə də çox deyil".
İqtisadçı onu da əlavə etdi ki, özəl sektorda əmək haqqı məsələsi hələ də şəffaflasmayıb. Özəl sektorda qeydiyyatsız işləyənlərin sayı ötən illərlə müqayisədə azalıb. Ancaq yenə bu sahədə problemlər var. Əsas problem isə qeydiyyatla işləyən işçilərin əmək haqqının tam olaraq rəsmiləşməməsidir. Məsələn, kimsə 800 manat əmək haqqı alır, ancaq rəsmi olaraq 400 manat yazılır. Bu səbəbdən də əmək haqqı aşağı görsənir.
Ekspertin sözlərinə görə, dövlət qulluqçularının orta aylıq məvacibi ilə orta aylıq əmək haqqı arasında da fərqin olmaması üçün minimum əmək haqqı artmalıdır. Azərbaycanda əmək haqqı problemi var. Bu danılmaz faktdır. Nəzərə almaq lazımdır ki, minimum əmək haqqının artırılması paraktik olaraq bütün dərəcələr üzrə artımlara səbəb olacaq.
Iqtisadçı bildirdi ki, əmək haqlarının artımı dövlət və özəl sektora da təsir edir. Lakin statistikaya baxdıqda, bəzi sahələrdə yüksək əmək haqqı olduğunu müşahidə edirik. Gəliri çox olan, şəffaflaşma gedən sahələrdə daha çox əmək haqqı artımı olacaq.
Günel CƏLİLOVA
