Son bir ildə Azərbaycanda avtomobillərin icbari sığortası üzrə ən çox şikayət edilən şirkətlərin adı açıqlanıb. Şikayət edilənlər arasında ilk sırada "AzSığorta" şirkəti olub. Bu barədə Azərbaycan Mərkəzi Bankının açıqladığı şikayət indeksində bildirilib. “Atəşgah Sığorta” 3.53 indeksi ilə ikinci, “İpək Yolu Sığorta” isə 2,16 indeksi ilə üçüncü olub.
Qeyd edək ki, siyahıda yer alan "Azsığorta" və "İpək Yolu Sığorta" şirkətlərinin avtomobillərin icbari sığortası üzvə lisenziyası ləğv edilib. Hər iki şirkət yalnız mövcud müqavilələr üzrə öhdəliklərini icra edir.
Maraqlıdır, avtomobillərin icbari sığortası üzrə niyə "AzSığorta" və digər şirkətlərdən şikayət olunur? Şikayətə səbəb nədir?
“Zərərin qiymətləndirilməsi zamanı şirkətlər sığorta məbləğini daha az verməyə, vətəndaşlar isə əksinə, daha çox almağa çalışırlar, ədalətin bərpa olunması üçün müəyyən işlər görülməlidir”
Sığorta sahəsi üzrə ekspert İlkin İbrahimov “Bakı-Xəbər”ə açıqlamasında qeyd etdi ki, adıçəkilən şirkətlərdən ən çox şikayət olunmasına səbəb zərərin qiymətləndirilməsi ilə bağlı yaşanan problemlərdir: “Mərkəzi Bank istehlakçı hüquqlarının müdafiəçisi kimi şikayət indeksi hazırlayıb. Məqsəd sığorta şirkətlərinin fəaliyyətini öyrənməkdir. Hazırda siyahıda lisenziyası ləvğ olunan sığorta şirkətlərinin öhdəliklərini Sığorta Bürüsu həyata keçirir. O indeksin nə dərəcədə inanılan olduğunu dəqiq deyə bilmərəm. İstənilən halda bu çox yaxşı haldır. Çünki burda sığorta şirkətləri məsuliyyət hiss edirlər ki, sabah müştərilər şikayət edəcək və problemlər işıqlandırılacaq".
Ekspert qeyd edib ki, zərərin qiymətləndirilməsi zamanı şirkətlər sığorta məbləğini daha az verməyə, vətəndaşlar isə əksinə, daha çox almağa çalışırlar: "Burada ədalətin bərpa olunması üçün müəyyən işlər görülməlidir. Sığorta müqaviləsi imzalandıqdan sonra hər hansı bir problem olur və ya sığorta şirkəti ləğv olunursa, o zaman İcbari Sığorta Bürosu həmin müqavilənin sonadək arxasındadır. "İcbari sığorta haqqında" qanunda qeyd edilir ki, İcbari Sığorta Bürosunun üzvü olan və lisenziya alan şirkətlər icbari sığorta şəhadətnaməsi satmaq hüququna malikdir. İcbari sığorta bürosu isə bu məsələlərin texniki tərəfini həll edir. “AzSığorta” şirkətindən şikayətlərin sayının çox olmasının səbəblərinə gəldikdə, bu həm də müştərilərlə davranış tərzi ilə bağlıdır”.
Günel CƏLİLOVA
