Son günlər topdansatış məntəqələrində soğanın qiymətində böyük artım baş verib. Belə ki, bir neçə gündür soğanın qiyməti təxminən iki dəfə artıb.
Qeyd edək ki, hazırda Bakıda soğanın kiloqramı 1 manata təklif edilir. Ancaq Ağdaş, Şəki, Oğuz, Qəbələnin Nic bazarlarında və bir çox rayonlarda bir kisə soğan 5 manata satılır. Bu isə o deməkdir ki, paytaxtdan fərqli olaraq, bölgələrdə soğanın bir kiloqramı 20 qəpiyə satılır. Fermerlər onu da bildirir ki, ötən illərdən fərqli olaraq bu il məhsul boldur. Maraqlıdır, məhsul boldursa, niyə şəhərdə qiymət bu qədər bahadır?
“Soğanın Azərbaycan bazarında bahalaşmasının səbəbi yalnız məhsulun ixracının artması ilə bağlı deyil”
İqtisadçı Kamran Məmmədli “Bakı-Xəbər”ə açıqlamasında qeyd etdi ki, soğanın Azərbaycan bazarında bahalaşmasının səbəbi yalnız məhsulun ixracının artması ilə bağlı deyil: “Xatırladım ki, ötən ilin yaz aylarında soğan əkini ilə məşğul olan fermerlər bildirmişdilər ki, becərdikləri məhsul hansısa səbəbdən xarab olur, sahələrdə çürüyür. Bu zaman məlum problemə elə də böyük reaksiya verilmədi. Ötən il fermerlər tərəfindən becərilən soğanın gözlənilən səviyyədə məhsul verməməsi soğan istehsalının 26 faiz azalmasına səbəb oldu. Ancaq onu da deyim ki, bu azalmanın fonunda Azərbaycan hökuməti hər hansı bir tədbir görmədi. Ancaq belə vəziyyətdə ötən ilin noyabr ayında soğan ixracına kvota və ya embarqo qoyulmalı idi. Aidiyyəti qurumlar ölkədəki soğan ehtiyatını nəzərə alıb, müvafiq addımlar atmalı idilər. Çox təəssüflər olsun ki, biz bunu müşahidə edə bilmədik. Qeyd etdiyim kimi, ötən il və bu il soğan az istehsal olunub. Buna baxmayaraq, soğan ixracatı kütləvi xarekter daşıyır. Nəticədə ölkədə soğan ehtiyatı azaldı və daxili bazarda qiymət artdı”.
Bölgələrlə şəhərdəki qiymət fərqliliyinə gəlincə, ekspert bildirdi ki, məhsulu yetişdirən fermerin şəhər bazarına birbaşa çıxışı olmadığı üçün bu işlə məşğul olanlar bazara nəzarəti ələ keçirir. Bu da kəskin qiymət fərqinə səbəb olur: “Onu da deyim ki, bu hal təkcə soğanda deyil, əksər kənd təsərrüfatı məhsullarında müşahidə olunur”.
Günel CƏLİLOVA
