Azərbaycan dövlətinin sosial siyasətinin əsasında vətəndaşın sosial rifah halının yüksəldilməsi dayanır. Heş şübhəsiz, bu yöndə Prezidentin imzaladığı bütün sənədlərin hədəfi vətəndaşın yaşayışının yüksək səviyyədə təmin edilməsidir.
Ölkəmizdə aztəminatlı ailələrin sosial rifah halının yüksəldilməsi üçün müxtəlif tədbirlər görülür, o cümlədən də onlara ünvanlı sosial yardım verilir.
Əmək və Əhalinin Sosial Müdafiəsi Nazirliyindən mətbuata verilən məlumata görə, 2023-cü il üçün ehtiyac meyarının həddi ötən ilə nisbətən 23 faiz artırılmaqla 246 manat müəyyən olunub ki, bu artımla ünvanlı yardımların da məbləği artacaq.
Qurumdan bildirilib ki, ailənin orta aylıq gəliri ailə üzvlərinin hər biri üzrə ehtiyac meyarının cəmindən aşağı olduqda ailəyə arada yaranan fərq qədər yardım təyin olunur. Beləliklə, ehtiyac meyarının artması aztəminatlı ailələrə təyin olunan ünvanlı yardımın da artmasına səbəb olur.
Ümumilikdə ünvanlı sosial yardımlarının bir ailəyə düşən orta aylıq məbləğinin 2022-ci ilin müvafiq göstəricisi ilə müqayisədə bu il 36 faiz artaraq təxminən 535 manat olacağı gözlənilir.
Ekspertlərə görə, aztəminatlı ailələrə verilən ünvanlı sosial yardımın məbləğinin 36 faiz artacağı ilə bağlı məlumat müsbətdir. Ekspertlər qeyd edir ki, bu da dövlətin sosial qayğı siyasətinin tərkib hissəsidir və sosial paketə daxildir.
“...Əhalinin sosial müdafiəyə ehtiyacı olan həssas qurupunun...”
“Liberal İqtisadçılar” İB-nin sədri Akif Nəsirli bizimlə söhbətində bildirdi ki, ehtiyac meyarı yalnız bir göstərici olaraq ünvanlı sosial yardımların təyin edilməsində istifadə olunur. “Təbii ki, bu göstəricinin də artırılması ünvanlı sosial yardımların armasına gətirib çıxaracaq. Belə ki, ünvanlı sosial yardımın təyin edilməsi zamanı ehtiyac meyarı meyarı hər bir ailə üzvünə tətbiq edilir. O ehtiyac meyarından aşağı olan səviyyə, məbləğ hər bir ailə üzvü üçün yardım şəklində verilir. Ona görə də ehtiyac meyarının 23 faiz artması ilə ünvanlı sosial yardımların ümumilikdə ailələrə düşən məbləği orta hesabla 36 faiz artacaq. Bu, bütövlükdə təqdirəlayiq haldır. Yəni əhalinin sosial müdafiəyə ehtiyacı olan həssas qurupunun müdafiəsi istiqamətində bu müsbət haldır. Minimum əməkhaqqı 15 faizdən bir qədər çox, minimum pensiya 15 faiz artırılıb, amma ünvanlı sosial yardım 36 faiz artırılacaq. Digər artım göstəricilərinə baxanda, ünvanlı sosial yardımın artım faizinin daha artıq olacağı göstərilir”.
A.Nəsirli hesab edir ki, ünvanlı sosial yardımın məbləğinin artırılması həsas təbəqədən olan insanların həyat şəraitinin yaxşılaşdırılmasında müsbət addım olacaq. Bununla belə, A.Nəsirli hesab edir ki, ünvanlı sosial yardımların verilməsi mexanizmi təkmilləşməlidir. Onun sözlərinə görə, ünvanlı sosial yardımın əhatəsi genişləndirilməli və onun daha əlçatan olması təmin olunmalıdır. A.Nəsirli qeyd etdi ki, ünvanlı sosial yardım almaq istəyənlər üçün qaydaların yumşaldılmasına ciddi ehtiyac var.
Leyla QARAXANLI
