Məlum olduğu kimi, Prezident İlham Əliyevin imzaladığı sərəncama əsasən minimum əmək haqqı 345 manata çatdırılıb. Sərəncama əsasən, minimum pensiya 280 manata çatdırılacaq, müavinət və təqaüdlər də artırılır. Bütün bu artımlar yanvarın 1-dən hesablanacaq.
Burada diqqəti çəkən məqam odur ki, məlum sərəncamla Azərbaycanda müstəqillik tarixində ilk dəfə olaraq minimum əmək haqqı 200 dollarlıq həddi keçdi. Minimum əmək haqqı bu il üçün müəyyən olunan yaşayış minimumunu 40,2 faiz üstələyəcək. Bu sərəncam eyni zamanda digər sahələrdə də artım üçün baza yaradacaq.
Bütün bu deyilənlərin fonunda, müstəqillik tarixində ilk dəfə olaraq minimum əmək haqqının 200 dollardan çox olması nə deməkdir? MDB məkanında buna oxşar nəticə daha hansı ölkədə var?
Məsələyə münasibət bildirən millət vəkili Aydın Hüseynovun sözlərinə görə, minimum əmək haqqının 200 dollardan çox olması bütövlükdə sosial nöqteyi-nəzərdən önəmli hadisədir: “Əlbəttə ki, minimum əmək haqqının 200 dolları keçməsi çox müsbət bir haldır. MDB-nin çox az ölkəsində buna oxşar nəticə var. Həmin ölkələrin də təbii resursları qat-qat böyükdür. Məsələnin başlıca müsbət tərəflərindən biri odur ki, manatın daxili bazardakı alıcılıq qabiliyyəti, nominal dəyəri real iqtisadi əsaslara söykənir. O baxımdan hesab edirəm ki, sözügedən artım bütün kateqoriyalara öz müsbət təsirini göstərəcək. Məsələ ondadır ki, həm dövlət, həm də özəl sektorda çalışanları əmək haqları artacaq. Ümumilikdə bu, 1 milyon 900 min nəfəri əhatə edəcək. Yəni, özəl sektorda da məvaciblərin buna uyğunlaşdırılması prosesi gedəcək. Bu, o deməkdir ki, həmi vahid tariflə müəyyənləşən iş strukturlarında, eləcədə digər strukturlarda bu öz təsirini göstərəcək. Bu da nəticə etibari ilə aztəminatlı təbəqənin alıcılıq qabiliyyətinə müsbət təsir edəcək. Bunun sayəsində sözügedən kateqoriyadan olan şəxslərin alıcılıq qabiliyyəti artacaq. Həmçinin, gözlənilən inflyasiya risqlərinin də onların büdcəsinə təsiri olmayacaq. Bu, inflyasiyanın doğuracağı və onların ailə büdcələrinə edəcək təsirləri aradan qaldırır. Ötən illərdə baş verən inflyasiyanın gəlirlərə mənfi təsirlərini azaldacaq. Digər tərəfdən, minimum əmək haqqı ilə yanaşı, əmək pensiyanın da artırılması bu, bütün pensiya alan kateqoriyaya, eləcədə müavinətlərə, digər bu kimi sosial müavinətlərin verildiyi bütün sahələrdə artımı müəyyənləşdirmiş olacaq. Onu da nəzərə almaq lazımdır ki, sözügedən kateqoriyaya aid olan şəxslər gəlirlərini ölkə daxilində xərclədiyi üçün ümumi iqtisadi aktivliyin artmasına müsbət təsir edəcək. Bir sözlə, bu istiqamətdə atılan addımlar, görülən işlər gəlirləri aşağı olan vətəndaşların həyat şəraitinin yüksəldilməsi baxımından əhəmiyyətli addımdır. Ümumilikdə, onların sosial durumuna müsbət təsir edəcək”.
Vidadi ORDAHALLI
