Prezident səlahiyyətli nümayəndəyə məlum olduğu kimi, dekabrın 22-də Prezident İlham Əliyev Naxçıvan Muxtar Respublikasında Azərbaycan Prezidentinin səlahiyyətli nümayəndəsi vəzifəsinə təyin olunmuş Fuad Nəcəflini qəbul edib və ona müvafiq tapşırıqlarını verib.
Prezident İlham Əliyev tapşırıq verib ki, səlahiyyətli nümayəndə kimi Fuad Nəcəfli insanların qayğısına qalsın, korrupsiya, rüşvətxorluqla mübarizə, şəffaflıq, düzgün kadr siyasətinin həyata keçirilməsi, mərkəzi icra orqanları ilə sıx təmasda fəaliyyətlə bağlı bütün səylərini göstərsin.
Görüşdə həm də Naxçıvanda qazlaşmanın 100 faiz olduğu və ciddi abadlıq işlərinin aparıldığı vurğulanıb.
Prezidentin Naxçıvan Muxtar Respublikasındakı səlahiyyətli nümayəndəsi Fuad Nəcəfli müsahibəsində deyib ki, Prezident İlham Əliyevin tövsiyə və tapşırıqlarına əsasən, xalqla yaxından işləmək, həmçinin indiyə qədər olan problemləri kökündən həll etmək əsas məqsədlərimizdəndir.
O xatırladıb ki, Naxçıvanın blokadası başlayan ilk illərdə vəziyyət olduqca çətin idi:
"Lakin sonradan ölkə rəhbərliyinin - ulu öndər Heydər Əliyevin gördüyü tədbirlər nəticəsində Naxçıvan qismən də olsa, blokadanı yara bilib. Nəqliyyat məsələlərində problem yaşansa da, Naxçıvanda qazlaşdırılma aparılıb, əhali elektrik enerjisi ilə tam təmin olunub.
Prezident İlham Əliyevlə görüşdə onun Zəngəzur dəhlizinin açılması ilə bağlı qətiyyətini hiss etdim".
Prezident İlham Əliyevin respublikamızda apardığı siyasətin tərkib hissəsi – Naxçıvan...
Bəli, bu da bir həqiqətdir ki, son illər ərzində Naxçıvanda ciddi işlər görülüb. Ancaq uzun illər ərzində oradakı irəliləyişlər, həyata keçirilən layihələr avtonom uğur kimi qələmə verilib, ən əsası da Talıbov hakimiyyətinin uğur dəftərinə yazılıb. Bununla da Azərbaycanın bir regionu kimi Naxçıvana göstərilən dövlətin diqqəti yanlış təqdim edilib. Naxçıvan mərkəzdən alınan dotasiya ilə yaşayıbsa, onda oradan görülən bahalı layihələr necə hansısa yerli məmurun uğuru kimi təqdim oluna bilər?
Əslən Naxçıvandan olan siyasətçi, Böyük Dayaq Partiyasının sədri Mirkazım Seyidov “Bakı-Xəbər”ə açıqlamasında bildirdi ki, respublikamızın digər bölgələri kimi, Naxçıvan Muxtar Respublikası da daim Prezident İlham Əliyevin diqqət və qayğısı ilə əhatə olunub: “Ölkəmizdə aparılan quruculuq işlərinin tərkib hissəsi kimi Naxçıvanın inkişafı istiqamətində mühüm tədbirlər həyata keçirilib. Bu gün Naxçıvandakı quruculuq, tikinti, abadlıq işləri birbaşa Prezident İlham Əliyevin respublikamızda apardığı siyasətin tərkib hissəsidir. Həmçinin Naxçıvanda 100 faiz səviyyəsində qazlaşdırma təmin edilib, enerji təchizatı, müasir yollar inşa olunub, yüzlərlə səhiyyə və təhsil ocaqları inşa olunub, yeni iş yerləri yaradılıb. Bu məqsədlə Naxçıvan Muxtar Respublikasına hər il dövlət büdcəsindən böyük həcmdə dotasiya ayrılır. Bütün bunlar ölkə başçısının bu diyara diqqət və qayğısının bariz nümunəsidir”.
Partiya sədri deyir ki, artıq Naxçıvanda köhnə rəhbərliyin yol verdiyi nöqsan və catışmazlıqlar təhlil olunur və onların aradan qaldırılması istiqamətində mühüm addımlar atılır: “Bu günlərdə Azərbaycan Respublikası Prezidentinin Naxçıvan Muxtar Respublikasında səlahiyyətli nümayəndəsi Fuad Nəcəfli mətbuata açıqlamasında bildirib ki, Naxçıvan Ali Məclisində qəbul edilmiş qanun aktları ilə bağlı nöqsanlar var. Onun sözlərinə görə, həmin nöqsanlar nəticəsində qanun aktlarının yerlərdə işləmə mexanizmi düzgün tənzimlənmir. Bəlli oldu ki, büdcədən ayrılan pulların əksər hissəsi mənimsənilib. İndi görün, onların hamısı düzgün, təyinatı üzrə xərclənsəydi nə olardı? Deməli, Talıbov əslində işləri irəli aparmayıb, tormozlayıb.
Naxçıvanda yenidənqurma işlərinə start verilib
Azərbaycan Respublikasının iqtisadiyyat naziri Mikayıl Cabbarov bu günlərdə bildirib ki, 2023-cü ildə sahibkarların iştirakı ilə Naxçıvanda böyük tədbir planlaşdırılır: “Hədəfimiz budur ki, Naxçıvanda reallaşdıra bilmədiyimiz iqtisadi potensialı, insan potensialını, qardaş Türkiyə ilə olan iqtisadi münasibətləri aidiyyatı dövlət orqanlarımız ilə sahibkarlar arasında əlaqələrin səmərəli diskussiyamızı keçirək. Bütün iş adamlarını bu tədbirə qatılmağa dəvət edirəm”.
Sevindirici haldır ki, artıq Naxçıvanda yenidənqurma işlərinə start verilib. Belə ki, burada dövlət qurumlarına aid ilk rəsmi internet səhifəsi “GOV.AZ” zonasına köçürülüb. İlkin olaraq Azərbaycan Respublikasının Xüsusi Rabitə və İnformasiya Təhlükəsizliyi Dövlət Xidməti (XRİTDX) tərəfindən Naxçıvan Muxtar Respublikasında dövlət orqanlarının internet səhifələrinin “GOV.AZ” zonasında qeydiyyatdan keçirilməsi ilə bağlı müvafiq tədbirlər həyata keçirilir. İlkin olaraq Naxçıvan Muxtar Respublikası Rabitə və Yeni Texnologiyalar Nazirliyinin (nmincom.gov.az) rəsmi internet səhifəsinin “GOV.AZ” domen zonasına köçürülməsi məqsədilə Xidmətin əməkdaşları tərəfindən müvafiq təhlillər aparılıb. Saytın audit yoxlamaları aparıldıqdan sonra zonada yerləşdirilməsi təmin edilib, 11 dövlət qurumunun rəsmi internet səhifəsi Naxçıvan Muxtar Respublikası Rabitə və Yeni Texnologiyalar Nazirliyinin proqramçıları tərəfindən yenilənib.
Bu baxımdan da, Naxçıvanda aparılan və bundan sonra aparılacaq bütün abadlıq-quruculuq işləri Azərbaycan dövlətinin uğuru kimi qiymətləndirilməlidir.
Məhəmmədəli QƏRİBLİ Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
