Məlum olduğu kimi, Prezident İlham Əliyevin imzaladığı “Əhalinin sosial rifahının yaxşılaşdırılması sahəsində əlavə tədbirlər haqqında” Sərəncam ölkəmizdə son beş ildə artıq dördüncü sosial islahat paketinin icrasına başlanmasını, yeni ildə yeni sosial islahat mərhələsinə keçidi təmin edir.
Sərəncamla minimum aylıq əməkhaqqı 1 yanvar 2023-cü ildən 15 faiz artırılaraq 300 manatdan 345 manata çatdırılıb. Dövlət büdcəsindən maliyyələşdirilən sahələrdə çalışan işçilərin aylıq tarif (vəzifə) maaşları da bir ay müddətində bu Sərəncama uyğunlaşdırılacaq və minimum əməkhaqqı artımı vahid tarif cədvəlinin (VTC) bütün pillələri üzrə əməkhaqlarında artımları təmin edəcək. Ümumilikdə minimum əməkhaqqı və VTC üzrə işləyənlərin əməkhaqqı artımı 700 min nəfəri əhatə edəcək. Minimum əmək haqqı bu il üçün müəyyən olunan yaşayış minimumunu (246 manat) da 40,2 faiz üstələyir. Yeni Sərəncama əsasən, minimum pensiya 280 manata çatdırılacaq, müavinət və təqaüdlər artırılacaq. Beləliklə, minimum aylıq pensiyanın məbləği də 16,7 faiz artırılaraq 240 manatdan 280 manata çatdırılacaq. Bu artım 100 minədək pensiyaçını əhatə edəcək.
Ümumilikdə, bu artımlar təxminən nə qədər əhalini əhatə edəcək? Məsələn, 100 min nəfərədək vətəndaşın minimum pensiyası artacaq. 700 minədək vətəndaşın əmək haqqı artacaq. Bax bu artımlar vətəndaşlar üçün nə deməkdir? Minimum əmək haqqının artımı insanların rifahında nə kimi dəyişiklik yaradacaq? Təxminən neçə manatlıq fərq yaradacaq? Minimum əmək haqqının 345 manat olması nəticəsində insanların aylıq yaşayışı neçə manat səviyyəsində yaxşılaşacaq? Yaxud da minimum pensiyanın 40 manat artaraq 280 manat olması pensiyaçının aylıq həyatında neçə manatlıq yaxşıya doğru dəyişiklik yaradacaq?
“Bu, o deməkdir ki, bu şəxslərin gəlirləri 50 manat civarında artacaq”
Məsələyə münasibət bildirən millət vəkili Vüqar Bayramov artıma bir neçə prizmadan yanaşdı: “Minimum əmək haqqının artırılması ilə bağlı ölkə prezidentinin sərəncamı 2023-cü ildə yeni sosial paketin tətbiqinə başlanması kimi xarakterizə olunmalıdır. Bütün bunlar mərhələli şəkildə digər sektorlarda da artımlara təkan verəcək. Artım bu kateqoriyadan olan bütün vətəndaşların sosial vəziyyətinə müsbət təsir edəcək. Xüsusən də aztəminatlı insanlar üçün bunun əhəmiyyəti böyükdür. Çünki burada söhbət minimum əmək haqqı və pensiyaların artırılmasından gedir. Ən çox bu şəxslərin artımlara ehtiyacı vardı. Burada sözügedən kateqoriyadan olan şəxslərin gəlirləri 50 manat civarında artacaq. Bu da bir sıra zəruri vasitələrin əldə edilməsinə imkan yaradacaq. Bu isə o deməkdir ki, sözügedən artımlar həm minimum əmək haqqı, həm də minimum pensiya alanların sosial rifahına müsbət təsir göstərəcək. Çünki son sərəncam sosial təminata daha çox ehtiyacı olan vətəndaşlarımızın sosial müdafiəsinin gücləndirilməsi baxımdan vacibdir. 700 min vətəndaşımızı əhat edəcək minimum əmək haqqıdakı artım üçün dövlət büdcəsindən əlavə 450 milyon manat ayrılcaq. Minimum pensiyadakı artımı da nəzərə alsaq maaş və pensiyalar üzrə artımdan 800 mindən çox vətəndaşımız birbaşa faydalana biləcəklər. Bu o deməkdir ki, hansı sektorda çalışmasından asılı olmayaraq minimum əmək haqqı alan bütün vətəndaşlarımızın maaşları artacaq. Artımlar özəl sektoru da əhatə edəcək. Yəni, yalnız dövlət sektorunda deyil, özəl sahədə də bu ildən 345 manatdan az əmək haqqı verilə bilməz. Onu da qeyd edim ki, son sərəncam ilə Azərbaycan müstəqillik tarixində ilk dəfə olaraq minimum əmək haqqı 200 dollarlıq həddi keçdi. Minimum əmək haqqı bu il üçün müəyyən olunan yaşayış minimumunu 40,2 faiz üstələyəcək. Bu sərəncam eyni zamanda digər sahələrdə də artım üçün baza yaradacaq. Son sərəncam 2023-cü ildə də sosial təminat məsələlərinin prioritet olacağını bir daha təsdiq edir. Sosial proqramlarda artımlar il ərzində davam etdiriləcək”.
Bir sözlə, millət vəkili məlum qərarın müsbət effekt verəcəyi qənaətindədir.
Vidadi ORDAHALLI
