Məlum olduğu kimi, Prezident İlham Əliyev 31 Dekabr – Dünya Azərbaycanlılarının Həmrəyliyi Günü və Yeni il münasibəti ilə Azərbaycan xalqına müraciət etdi. Müraciət zamanı dövlət başçısı bir sıra məsələlərə toxunub.
Prezident İ.Əliyev çıxışı zamanı Azərbaycan iqtisadiyyatının inkişafı haqqında danışıb: “İqtisadiyyat təxminən 5 faiz artıb, qeyri-neft sektorunda 9 faizdən çox artıb. Bununla bərabər, bizim ümumi daxili məhsulumuz bu il rekord həddə – 130 milyard dollara çatıb. Bu, tarixi nailiyyətdir. Bununla paralel olaraq bizim xarici dövlət borcumuz xeyli azalıb. Bu vəzifəni bir neçə il bundan qabaq mən hökumət qarşısında qoymuşdum ki, bizim xarici borcumuz ümumi daxili məhsulumuzun 10 faizinin altında olmalıdır. Keçən il 17 faiz idi, bu ilin son nəticələrinə görə 9,5 faizdir. Müqayisə üçün deyə bilərəm ki, bəzi inkişaf etmiş ölkələrdə xarici borc ümumi daxili məhsulun 100, 120, hətta 150 faizini təşkil edir. Yəni biz tamamilə beynəlxalq maliyyə institutlarından asılı deyilik”.
“Azərbaycan MDB məkanında xarici borcun ÜDM payına görə ən yaxşı göstəriciyə malik ölkədir”
Azərbaycanın xarici borcunun azalması haqqında danışan millət vəkili Vüqar Bayramov “Bakı-Xəbər”ə açıqlamasında qeyd etdi ki, xarici borcun tənzimlənməsi Azərbaycanda iqtisadi siyasətin prioritet məsələlərindən biridir: “Azərbaycan MDB məkanında xarici borcun ÜDM payına görə ən yaxşı göstəriciyə malik ölkədir. Eyni zamanda, xarici borcun ÜDM payına görə Azərbaycan dünyada 9 ölkədən biridir. Xarici borcun ümumi daxili məhsulun payına görə tənzimlənməsi və yaxşı həddə saxlanılması iqtisadi təhlükəsizlik baxımından da çox vacibdir. Bu, ölkənin iqtisadi təhlükəsizliyinin formalaşmasına şərait yaradır. Həmçinin, xarici borcun tənzimlənməsi iqtisadi dayanıqlığın inkişafına da töhfə verir”.
Millət vəkili onu da vurğuladı ki, xarici borcun tənzimlənməsi ilə bağlı dövlət proqramı var. Həmin proqram ondan xəbər verir ki, növbəti illərdə də xarici borcun ümumi daxili məhsulda payı tənzimlənən həddə olacaq. Bu da regional və qlobal dəyişikliklərin Azərbaycan iqtisadiyyatına təsirini minimallaşdıracaq.
Günel CƏLİLOVA
