Macarıstanın xarici işlər və ticarət naziri Peter Siyarto bəyan edib ki, ölkəsi Azərbaycandan yaşıl elektrik enerjisi təchizatına qoşulmağı planlaşdırır. O hesab edir ki, bu baxımdan ən vacib ölkə Azərbaycandır.
Macarıstan rəsmisinin sözlərinə görə, Bakı Gürcüstanı enerji ilə təmin edəcək, oradan isə enerji Rumıniyaya gedəcək: “Azərbaycan böyük həcmdə yaşıl elektrik enerjisi istehsal edəcək və bu, Gürcüstana, oradan isə sualtı boru kəməri ilə Rumıniyaya tədarük ediləcək. Və biz razılaşdıq ki, Macarıstan bu iddialı plana qoşulsun, çünki layihənin Aİ-nin dəstəyini alması üçün ən azı iki üzv ölkənin iştirakı lazımdır. Beləliklə, Macarıstanı bizim qismən istifadə edə biləcəyimiz və qismən də tranzit marşrutu kimi çıxış edə biləcəyimiz yaşıl elektrik enerjisi ilə təmin etmək mümkün olacaq”.
Macarıstanın xarici işlər və ticarət nazirinin fikrincə, bu sxemdə iştirak Budapeştə karbon neytrallığı məqsədlərinə nail olmaq imkanı verəcək. O, həmçinin əlavə edib ki, yaxın vaxtlarda tərəflər bu məsələ ilə bağlı birgə razılaşma variantını öyrənməyə hazırlaşır: “Mövcud vəziyyət yeni enerji mənbələrinin kəşf edilməsinin və onların tədarükə daxil edilməsinin vacibliyini açıq şəkildə göstərir. Bu baxımdan ən vacib tərəfdaş Azərbaycandır”.
Görünən odur ki, Macarıstan indidən Qara dənizin dibi ilə Azərbaycandan elektrik enerjisi idxalını planlaşdırır.
“Peter Siyartonun açıqlaması onu göstərir ki, Macarıstan Azərbaycanın enerji resurslarına xüsusi maraq göstərir”
Məsələyə münasibət bildirən millət vəkili Vüqar Bayramovun fikrincə, Macarıstanın bu addımı önəmli qərardır: “Ümumilikdə, Azərbaycanın Avropa İttifaqı ölkələrinə elektrik enerjisi ixrac etməsi müzakirə edilən məsəələlərdən biridir. Məhz Qara Dənizin dibi ilə elektrik enerjisinin Avropaya ixrac olunması ilə bağlı layihə hazırlanır. Avropa İttifaqı da Azərbaycanın həmin layihədə iştirakında maraqlıdır. Digər tərəfdən, Zəngəzur dəhlizi reallaşandan sonra dəhliz vasitəsi ilə həm də elektrik enerjisinin ixracı nəzərdə tutulub. Nəticə etibari ilə bu, Avropanın Azərbaycanın alternativ enerji mənbələrindən faydalanmasına şərait yaradacaq. Macarıstan da bu sahədə Azərbaycanla əməkdaşlıq edən ölkələrdən biridir. Macarıstan Avropa ölkəsi olaraq Azərbaycandan elektrik enerjisi idxal etməkdə maraqlıdır. Çünki Qara Dəniz vasitəsi ilə reallaşdırılan layihə Avropa İttifaqının enerji sisteminə inteqrasiya olunacaq. Bu da imkan verəcək ki, Azərbaycan istehsal etdiyi elektrik enerjisini birbaşa Avropa bazarına ixrac etsin. Peter Siyartonun məlum açıqlaması onu göstərir ki, Macarıstan Azərbaycanın enerji resurslarına xüsusi maraq göstərir”.
Millət vəkili onu da əlavə etdi ki, bütün bunlar Azərbaycanın Avropa üçün əhəmiyyətini daha da artırır.
Vidadi ORDAHALLI
