Azərbaycanda yumurtanın qiymətində yenidən artım qeydə alınıb. Ağ yumurta 13 qəpikdən 16-19 qəpiyə, sarı yumurta 16-19 qəpikdən 22-25 qəpiyə yüksəlib. Kənd yumurtasının topdansatış qiyməti isə 25 qəpikdən 27-30 qəpiyə qalxıb. Bəzi mağazalarda isə sarı broyler yumurtalar satışdan çıxarılıb.
Qeyd edək ki, ölkədə bir çox ərzaq məhsullarının qiymətində davamlı artım müşahidə edilir. Bir neçə ay öncə toyuq ətinin qiymətində artım özünü göstərsə də, yemlə bağlı gömrük rüsumunun ləğvi burada öz müsbət təsirini göstərdi.
Dövlət Statistika Komitəsinin məlumatına görə, 2021-ci ilin müvafiq dövrü ilə müqayisədə cari ilin yanvar-iyul aylarında ölkədə quş əti də daxil olmaqla diri çəkidə ət istehsalı 3,0 faiz artaraq 317,1 min ton, yumurta istehsalı 4,0 faiz artaraq 1 milyard 165,1 milyon ədəd olub.
Onu da bildirək ki, Prezident İlham Əliyevin fərmanı ilə bu il iyulun 1-də idxalı əlavə dəyər vergisindən azad edilən xammal və materialların siyahısı təsdiqlənib.
Belə olan halda yumurtanın qiymətində artımın səbəbi nədir, yoxsa bu, marketlərin özlərinin işbazlığıdır?
“Bir qutu yumurtanın satışı 54-55 manat civarında dayanacaq, sabitləşəcək”
Azərbaycan Quş əti, Yumurta İstehsalçıları və İxracatçıları Assosiasiyasının sədri Mürvət Həsənli bildirdi ki, süfrə yumurtasının qiymətinin artması yemin qiymətinin artması ilə bağlıdır: “İkincisi isə, yumurtanı maya dəyərindən çox aşağı qiymətə satırdılar. Yəni 360 yumurtanı 34 manata satanda maya dəyəri 51-52 manat idi. Hazırda maya dəyəri 52-53 manat civarındadır və ona görə də qiymətlər qalxıb. Həmçinin, havaların isti keçməsi ilə bağlı kəndlərdə kənd yumurtasının azalması tələbatın artmasına gətirib çıxardı. Hazırda toyuq fabriklərində, anbarlarda 50 milyondan artıq yumurta var. Elə bir böhran keçirməyə səbəb yoxdur. Gündəlik tələbat artıqlamsı ilə ödənilir".
M.Həsənli onu da əlavə etdi ki, soya paxlasına üzərindən ƏDV, yem qatqılarının üzərindən gömrük rüsumu götürüldü: “Bu, ətin qiymətində 7-8 faiz fərq elədi və qiymətlər aşağı düşdü. Həmin prosesdən sonra bir yeşik yumurtanın maya dəyəri 50-52 manat arasındadır. Qiymətin artması ilə bağlı yayılan xəbərlər şayiə deyil. Sentyabr ayının əvvəlində yumurtaya tələbat artır. Yay aylarında əhalinin istehlakı gündəlik 2 milyon - 2,600 min civarındadırsa, payız-qış aylarında 3 milyon 60 minə qədər artır".
M.Həsənlinin sözlərinə görə, qarşıdakı aylarda yumurtanın qiymətində ciddi artım gözlənilmir: "Yumurta istehsalında böyük rəqabət var. 15-ə yaxın firma ciddi şəkildə yumurta istehsalı ilə məşğul olur. Rəqabətin olduğu yerdə inanmıram ki, qiymətin qalxması fantastik həddə olsun. Hazırda bir qutu yumurtanın maya dəyəri 50-52 manat arasındadır. Bir ay bundan öncə bir qutu yumurtanın topdansatışı 34-38 manat civarında idi, yəni qiymətlər maya dəyərindən aşağı olub. Çünki bazarda təklif çox, tələb isə az idi. Hazırda bir qutu yumurtanın topdansatışı 48 manatdır. Lakin payıza doğru qiymətin qalxması gözlənilir. Fikrimcə, bir qutu yumurtanın satışı 54-55 manat civarında dayanacaq, sabitləşəcək".
Assosiasiya sədri onu da əlavə etdi ki, dünyada yemlərin qiyməti 2 dəfədən çox qalxıb: "Son 1 ildə qarğıdalının 1 tonu 320 manatdan 800 manata, günəbaxan yağı 1600 manatdan 4200 manata, soya 980-1000 manatdan 1600-1700 manata, buğda 280-300 manatdan 600 manata yüksəlib. Lakin ötən ay soya idxalının ƏDV-dən azad olunması nəticəsində soyanın ölkəyə gətirilməsi 1100-1200 manata başa gəlir. Yəni son bir ayda soya ucuzlaşıb. Yemlər ölkəyə əsasən Rusiyadan, Qazaxıstandan, Ukraynadan gətirilir".
Günel CƏLİLOVA
