Məlum olduğu kimi, ipoteka ilə mənzil almaq üçün yeni qaydalar müəyyən edilib. Yeni qaydalara əsasən, adında mənzil olan və ipoteka almaq istəyən şəxslər daha çox ilkin ödəniş etməli olacaqlar. Yeni qaydaya görə, mənzil sahibi olan vətəndaşlar ipoteka ilə almaq istədikləri evin dəyərinin ən azı 30 faizini ilkin ödəniş kimi ödəməlidirlər.
Yeni qaydalar Mərkəzi Bankın kredit risqləri, o cümlədən iri kredit risqləri ilə bağlı prudensial normativ və tələblərində təsbit olunub.
Bu qərar mənzil almaq istəyən şəxslərin narazılığına səbəb olub.
- Ramil Osmanlı: “Evi olanlar üçün ilkin ödəniş 30 faizdən də yüksək olmalıdır”
Daşınmaz əmlak üzrə ekspert Ramin Osmanlı bildirdi ki, evi olanlar üçün ilkin ödəniş 30 faizdən də yüksək olmalıdır: “İpoteka proqramının bir sıra istiqamətlər üzrə təkmilləşdirilməsinə ehtiyac var. İpoteka proqramı ilə bağlı hələ islahatlar aparılmalıdır. Yeni qaydanın əsas hədəfi, hər dəfə eyni adamın bu proqramdan faydalanmağındansa, digər şəxslərin də mənzil sahibi olmağına kömək etməkdir. Yeni qanun balanslaşdırma siyasəti aparmağı hədəfləyir. Bununla mənzilə ehtiyacı olanlar da ipoteka proqramından faydalana bilər. Yeni qaydaya əsasən, evi olanlar ipoteka ilə almaq istədikləri evin dəyərinin ən azı 30 faizini ilkin ödəniş kimi ödəməlidirlər. Məncə, bu hələ azdır. Evi olan şəxslər üçün ilkin ödəniş bir qədər də yüksək olmalıdır”.
- Natiq Cəfərli: “Birdən-birə 30 faiz ödəniş tələb olunması çətinliklər yaradacaq, bu da ipoteka bazarında müəyyən qədər durğunluğa səbəb olacaq”
İqtisadçı ekspert Natiq Cəfərli bildirdi ki, adında mənzil olan şəxslərin ipoteka krediti götürməsi mümkündür: “Qanun bunu qadağan etmir. Sadəcə olaraq, onlar sosial ipotekadan və güzəştli ipotekadan istifadə edə bilməzlər. Qanun bunu məhdudlaşdırır. Amma ümumilikdə, əgər normal ipoteka faizlərindən istifadə edirlərsə, adında mənzil olan şəxslərə belə bir qadağa yoxdur. Ümumiyyətlə, yeni qaydalar mənzillərə çıxış imkanlarını çətinləşdirəcək. Adına mənzil olan şəxslərin öz övladlarına və ya yaxınlarına mənzil alması mümkündür. Azərbaycanda bu, geniş yayılmış praktikadır. İndi həmin şəxslərin ipoteka ilə mənzilə çıxış imkanları məhdudlaşacaq. Birdən-birə 30 faiz ödəniş tələb olunması çətinliklər yaradacaq. Bu da ipoteka bazarında müəyyən qədər durğunluğa səbəb olacaq”.
Günel CƏLİLOVA
.jpg)
