Şirkətlər bazar obyektlərinin içindəki dükanları niyə sığortalamır?

Kamran Məmmədli: “Azərbaycanda sahibkar düşünür ki, vergi verməməlidir, sığorta haqqı ödəməməlidir, ancaq…”

img

Biznesin inkişafı, sahibkarlıq mühitinin cəlbedici olması üçün vacib amillərdən biri də risqlərin sığortalanmasıdır. Bu risqlər həm yerli və beynəlxalq iqtisadi proseslər, maliyyə bazarındakı dəyişkənliklərlə, həm də müxtəlif qəza, yanğın, təbii fəlakətlər və sair kimi gözlənilməz hadisələrlə bağlı  ola bilər.

Risqlər sığortalanırsa, bu zaman sahibkar heç bir itki yaşamadan fəaliyyətini davam etdirəcəyinə əmin olaraq biznesə başlayır. Ticarətlə məşğul olan şəxslər hər hansı bir risqi nəzərə alıb, sığortanın üstünlüklərindən yararlanmaq istəyir. Lakin regionlarda və paytaxt Bakıda böyük bazarların daxilində fəaliyyət göstərən mağazalar sığorta oluna bilmir. Mağaza sahibləri həm obyektləri, həm də mallarını təhlükə və risqlərdən qorumaq üçün sığorta etmək istəyirlər. Ancaq sığorta şirkətləri bu işə yaxın durmur. Dükan sahibləri gələcəkdə hansısa fövqəlhadisə zamanı maliyyə sıxıntısı yaşamamaq üçün mallarını sığorta etmək istəyir. Lakin sığorta şirkətləri bazarın daxilində fəaliyyət göstərən dükanları sığorta etməkdən imtina edir.

  • “Sığorta şirkətləri sahibkardan vergi ödənişlərindəki şəffaflığa dair sənəd tələb edir, həmin sənəd olarsa…”

Iqtisadçı Kamran Məmmədli qeyd etdi ki, sığorta biznes mühitinin mühüm parametrlərindən biridir, xüsusilə də risqlərin  olduğu sahələrdə sığortaya ehtiyac var: “Məlumat üçün bildirim ki, risq hesablanmazdan öncə vergi eyniləşdirmə nömrəsi üzrə əməliyyatlar aparılmalıdır. Bundan sonra sığorta şirkətləri  istənilən obyekti sığorta etməlidir. Sığorta şirkətləri sahibkardan vergi ödənişlərindəki şəffaflığa dair sənəd tələb edir. Həmin sənəd olarsa sığorta şirkətləri daşınar əmlakı sığorta etməkdən yayınmaz. Sadəcə, Azərbaycanda sahibkarlar çox zaman vergi və sığorta ilə bağlı məsələlərə itki kimi yanaşırlar. Orta və uzunmüddətli strategiyaları olmur, risqlərdən sığorta planları olmur. Dünya təcrübəsində sığorta mexanizminin əsas funksiyası, xüsusilə bazarlarda volatilliyin müşahidə olunduğu dövrlərdə və ya hər hansı bir fövqəladə hallarda zərərlərin kompensasiyasına hədəflənib. Bu da biznes mühitinin mühüm elementidir. Azərbaycanda isə sahibkar düşünür ki, vergi verməməlidir, sığorta haqqı ödəməməlidir, sonda isə hər hansı zərər dəyirsə onu dövlət kompensasiya etməlidir. Bu isə düzgün deyil”.

Günel CƏLİLOVA

Peşə etikası

Son xəbərlər