Ölkədə taxıl biçini, demək olar ki, yekunlaşıb. İyunun 26-dək ölkə üzrə 456.556 hektar sahədə növbəti mövsüm üçün proqnozlaşdırılan taxıl əkini sahələrinin 50,6 faizində yay şumu aparılıb. Ancaq bu ilin yanvar-fevral aylarında Azərbaycanda müşahidə edilmiş kəskin quraqlığa görə təqribən 100 min hektar ərazidə taxıl əkinləri məhv olub. Bunu kənd təsərrüfatı naziri İnam Kərimov Real TV-yə müsahibəsində bildirib,
O qeyd edib ki, eyni hal 2020-ci ildə də yaşanılıb və gələcəkdə quraqlığa görə bu kimi halların yaşanması gözlənilir.
Maraqlıdır, 100 min hektarda əkilən məhsul məhv olubsa, bu hal məhsuldarlığa necə təsir edəcək?
“Taxıl telefon, TV, elektrik avadanlığı deyil ki, istehsal edə bilməyək, doğru sistem qurulsa, idxaldan asılılığı 30 faizə qədər azaltmaq mümkün ola bilər”
Iqtisadçı Natiq Cəfərli qeyd etdi ki, ölkədə 1 milyon hektar sahədə dənli bitkilər, 600 min hektarda buğda, 400 min hektarda isə arpa əkilib: “Açıqlanan rəsmi məlumata əsasən artıq 100 min hektarda əkilən məhsul məhv olubsa, deməli, bu il son məhsulun həcmi xeyli azalacaq. Məhsuldarlığın aşağı düşməsinə iqlimin, quraqlığın, təbii ki, təsiri var. Ancaq ən böyük problem əldə olan resurslardan belə normal istifadə edə bilməməkdir. Bu sahədə 2 önəmli problem var:
1. Məmurların, onlara bağlı şirkətlərin suya ehtiyacı adi adamlardan öncə ödənilir, məhdudiyyətsiz su alırlar. Bundan başqa, torpaq suvarma kanallarında su itkisi 40-50 faizdir.
2. İnsanlıq 10 min il əvvəl Mesopotamiyada primitiv alətlərlə və üsullarla necə suvarmağı öyrənibsə, məmləkətdə indi də eyni qaydada torpaq sulayırlar.
Danılmaz faktdır ki, ölkə buğdaya olan tələbatının sadəcə 25 faizini daxili istehsalla ödəyir, 75 faiz xaricdən asılıyıq. Taxıl telefon, TV, elektrik avadanlığı deyil ki, istehsal edə bilməyək, doğru sistem qurulsa, bu asılılığı 30 faizə qədər azaltmaq mümkün ola bilər”.
Günel CƏLİLOVA
