Hazırda ölkə əhalisinin ən azı 50 faizi kəndlərdə yaşayır. Ölkə iqtisadiyyatında qeyri-neft sektorundan sonra ixracda aqrar sektor ikinci yeri turur. Təəssüf ki, idxalda da kənd təsərrüfatı məhsullarının payı yüksək səviyyədə qalmaqdadır. Baxmayaraq ki, dövlətin bu sahəyə dəstəyi ilbəil artır. Məsələn, 2021-ci ildə Kənd Təsərrüfatı Nazirliyi tərəfindən 310 milyon manat subsidiya ödənilib. Bu da əvvəlki illə müqayisədə 27 faiz çoxdur. 2022-ci ildə bu rəqəmin bir qədər də artacağı gözlənilir.
Ancaq son 3 ildə Azərbaycanda bir sıra aqrar məhsulların istesalında dalbadal geriləmə müşahidə edilir. Bu il aqrar sahədə istehsalın artmamasının səbəbi taxıl istehsalının 20 faizdən çox azalması ilə bağlıdır. Taxıl istehsalı ötən ilin birinci yarısında 2,63 milyon ton olduğu halda, cari ildə 2,1 milyon tona qədər azalıb. Əsas bitkiçilik məhsullarından olan taxıl istehsalının azalması kənd təsərrüfatı məhsullarının istehsalındakı artımı dayandırıb.
Qeyd edək ki, ölkəmizdə taxıl məhsullarının əsas hissəsinin yığımı sentyabrda başa çatır. Az miqdar hissə isə dekabra qədər yığılaraq tamamlanır.
Açıqlanan statistik rəqəmlərdən də bəlli olur ki, Azərbaycanda bu il taxıl istehsalı azalıb.
“Bundan sonra ölkə daxilində konkret parametrlərə uyğun ərzaq buğdası istehsal ediləcək və bu da stimullaşdırılacaq”
İqtisadçı-ekspert Cəfər İbrahimli bildirdi ki, ölkəmizdə ərzaq buğdası az istehsal olunur: "Ərzaq buğdası istehsalının özünəməxsus tələbləri, aqrotexniki qaydaları var. Bu, torpağın tərkibindən, əkilən toxumdan, suvarma sistemindən və digər amillərdən asılıdır. Ərzaq buğdasının öz standartları mövcuddur. Azərbaycanda daha çox yemlik buğda istehsal edilir. Ölkədə hər il təxminən 2 milyon ton buğda istehsal olunur, 1,3 milyon ton buğda isə xaricdən gətirilir. Biz ərzaq buğdasını əsasən Rusiyadan alırıq".
Ekspertin sözlərinə görə, Prezident İlham Əliyevin imzaladığı "Ərzaqlıq buğda ilə özünütəminetmə səviyyəsinin yüksəldilməsinə dair bir sıra tədbirlər haqqında" fərmana əsasən gələn ildən başlayaraq 5 il müddətində məhsul subsidiyası tətbiq olunacaq. Bundan sonra isə ölkə daxilində konkret parametrlərə uyğun ərzaq buğdası istehsal ediləcək və bu da stimullaşdırılacaq: "Sənədə əsasən, müasir suvarma sistemlərinin tətbiq edildiyi təsərrüfatlarda istehsal edilən ərzaqlıq buğda dövlət tərəfindən satın alınacaq. Başqa sözlə, fermerlərin istehsal etdikləri ərzaqlıq buğdanı dövlət satın alacaq. Təhvil verilən ərzaq buğdasına görə fermer məhsul subsidiyası da alacaq. Burada hər il ərzaqlıq buğdanın tədarük qiyməti dövlət tərəfindən müəyyən ediləcək".
Günel CƏLİLOVA
