Azərbaycan Mərkəzi Bankının (AMB) İdarə heyətinin sədri Taleh Kazımov iyunun 16-da sığorta şirkətlərinin rəhbərləri ilə görüşüb. Görüş zamanı Azərbaycanın sığorta sektorunun cari vəziyyəti müzakirə olunub.
Xatırladaq ki, bu, AMB-nin yeni sədrinin sığorta şirkətlərinin rəhbərləri ilə ilk görüşüdür. Görüş zamanı sığorta sahəsində qanunvericiliyin təkmilləşdiriləcəyi, bu sahədə yaşanan problemlərin həll ediləcəyi müzakirə olunub.
Danılmaz faktdır ki, sığorta sistemində ciddi problemlər var. Maraqlıdır, AMB-nin yeni sədrinin sığorta şirkətlərinin rəhbərləri ilə ilk görüşü bu sahədə yaşanan problemləri necə həll edəcək, ümumiyyətlə, sığorta bazarını necə inkişaf etdirmək olar?
“Sığorta bazarına rəng qatan, sığorta sektorunun əsas cəlbedici hissəsi olan könüllü sığorta növləri üzrə vəziyyət daha məyusedicidir”
Iqtisadçı Kamran Məmmədli qeyd etdi ki, Azərbaycanın sığorta sistemində ciddi problemlər var. Bu problemlər uzun illərdir həll olunmadığı üçün sığorta sahəsində vəziyyət gərginləşib: “Sığorta bazarına rəng qatan, sığorta sektorunun əsas cəlbedici hissəsi olan könüllü sığorta növləri üzrə vəziyyət daha məyusedicidir. Həmçinin, 1.500 kub sm-dək mühərrik həcminə sahib avtomobillərin, sərnişindaşıma ilə məşğul olan sahibkarların avtonəqliyyat vasitələri üzrə icbari sığortalamaqdan imtina hallarını mövcuddur. Bəzi icbari sığorta növləri üzrə təminat məbləğlərinin mövcud zərərləri əhatə etməməsi vətəndaşların zərərliliyinə səbəb olur. Belə ki, icbari avtomobil sığortası üzrə bir şəxsin ölümü halında 5000 manat sığorta ödənişi verilməsi müəyyən edilir. Həmçinin əmlaka dəymiş zərər üzrə də maksimal məbləğ 5000 manat müəyyən edilib. Nəzərə alsaq ki, bu məbləğlərin müəyyən edilməsindən artıq 10 il müddət keçib, bu baxımdan da məbləğlərə yenidən baxılması mütləqdir. Eyni zamanda, daşınmaz əmlakla bağlı tənzimləmə baxımından hələ də blank formasında sığorta şəhadətnamələrinin əllə doldurulması, sonra sistemə daxil edilməsi, sistem üzrə vətəndaşın əlçatanlığının zəifliyi, Bakı şəhəri üzrə yaşayış evləri üzrə maksimal 25 min manat məbləğdə təminat nəzərdə tutulması kimi hallar bu növün də təkmilləşməsini zəruri edir.
Danılmaz faktdır ki, sığorta hadisəsi baş verdiyi zaman sığortalı şəxs bunun qarşılığında lazım olan dəstəyi görmür. Yəni sığorta ödənişlərini əldə edə bilmir. Nəticədə ciddi problemlər yaranır. Bir sözlə, sığorta sisteminin işləməsi üçün mövcud qanunvericilik bazasının təkmilləşdirilməsinə ehtiyac var".
Həmsöhbətimiz onu da əlavə etdi ki, hazırda ən böyük problem sığorta sisteminə inamsızlıqdır. İnsanlar evini, mülkünü, səhhətini, avtomobilini sığortalayan zaman hansısa problem yaranarsa, ödənişləri geri ala bilmirlər. Əksər hallarda vətəndaşlar süründürməçiliklə qarşılaşır: “Ümid edirəm ki, sığorta sahəsində yaşanan problemlər zamanla öz həllini tapacaq”.
Günel CƏLİLOVA
