“Şəhid ailələri üçün Prezidentin aylıq təqaüdü 220 manatdan 500 manata çatdırılıb”. Bunu Dövlət Sosial Müdafiə Fondunun (DSMF) İdarə Heyətinin sədri Himalay Məmişov deyib.
O həmçinin qeyd edib ki, müharibə əlilləri üçün prezidentin aylıq təqaüdü 1-ci dərəcə üzrə 165 manatdan 400 manata qaldırılıb,1-ci dərəcə əlilliyi olanlara qulluğa görə təqaüd (80manat) təsis olunub, 2-ci dərəcə üzrə 143 manatdan 350 manata, 3-cü dərəcə üzrə isə 110 manatdan 300 manata çatdırılıb. Müharibə əlillərinə müavinətə gəldikdə isə, 1-ci dərəcə üzrə 101 manatdan 220 manata , 2-ci dərəcə üzrə 81 manatdan 180 manata , 3-cü dərəcə üzrə isə 73 manatdan 120 manata çatdırılıb.
Bundan da açıq görsənir ki, dövlətin sosial siyasətində şəhid ailələrinin maddi təminatının yüksəldilməsi əsas pioritetlərdən biridir. Elə bunun nəticəsdir ki, şəhid ailələrinə ayrılan Prezident təqaüdünün həcmi 280 manat artaraq 220 manatdan 500 manata çatdırılıb. Dövlətin şəhid ailələri ilə bağlı sosial siyasəti çoxşaxəlidir və mütamadi olaraq bu istiqamətdə işlər davam etdirilir.
Sosial Xidmətlər Agentliyinin sədri Vüqar Behbudov isə postmüharibə dövründə şəhid ailələri və müharibə əlillərinin mənzil və avtomobillə, sosial xidmətlərlə təminatı işlərinə dair keçirdiyi mətbuat konfransında bildirib ki, bu il daha 1500 şəhid ailəsi və müharibə əlilinə mənzil və fərdi evin verilməsi nəzərdə tutulub. Qeyd edilib ki, 2021-ci ildə 3 min, 44 günlük Vətən müharibəsindən sonra isə 3500 şəhid ailəsi və müharibə əlili mənzil və fərdi evlərlə təmin edilib. Bildirilib ki, Prezident İlham Əliyevin tapşırığına əsasən şəhid ailələri və müharibə əlillərinin mənzil təminatı proqramı 2021-ci ildə 5 dəfə genişlənib və keçən il 3 min mənzilin bu kateqoriyalardan olan şəxslərə verilməsi proqramı icra olunub. Əmək və Əhalinin Sosial Müdafiəsi Nazirliyi tərəfindən ötən dövrdə ümumilikdə 12500-dən çox şəhid ailəsi və müharibə əlilinə mənzil və ya fərdi ev verilib. Dövlət başçısının 25 avqust 2021-ci il tarixli Sərəncamı ilə Vətən Müharibəsi Qəhrəmanlarına və onlardan şəhid olanların ailələrinə də mənzillər verilir. Bu il artıq sosial cəhətdən həssas qruplardan olan ailələrə 500-dən çox mənzil verilib. Cari il ərzində ümumilikdə 1500 mənzil və fərdi evin verilməsi nəzərdə tutulub. Müharibə əlillərinin avtomobillə təminatı tədbirləri çərçivəsində son 4 ildə də 1450-dək, ümumilikdə ötən dövrdə 7400 müharibə əlili avtomobillə təmin edilib. Bu il müharibə əlillərinə 50, 44 günlük Vətən müharibəsindən sonra ümumilikdə 200, ümumilikdə ötən dövrdə 7400 avtomobil verilib. Postmüharibə dövründə 450-dən çox şəhid ailəsi və müharibə əlilinə sanatoriya-kurort və müalicə mərkəzlərinə yollayış verilib, 41 nəfər müharibə əlili peşə reabilitasiyasına cəlb olunub, 60 qazi üçün motivasiya düşərgələri təşkil olunub. Həmçinin Həssas əhali qruplarından olan şəxslər üçün Sığınacaq və Sosial Reabilitasiya Müəssisəsinin Görmə qabiliyyəti məhdudluğu olan şəxslər üçün sosial reabilitasiya və bərpa şöbəsində qazilər tibbi, pedaqoji, idman, mədəniyyət və incəsənət, psixoloji, eləcə də digər sosial reabilitasiya xidmətlərinə cəlb ediliblər.
“Bu qayğı özünü yalnız pensiya təminatının yüksəldilməsində deyil, başqa istiqamətdə də göstərir”
İqtisadçı ekspert Akif Nəsirli “Bakı-Xəbər”ə şərhində bildirdi ki, dövlət şəhid ailələrinin sosial rifahının yüksəldilməsi istiqamətində addımlar atır. “Ümumiyyətlə, Azərbaycanda digər sosial müdafiəyə ehtiyacı olan qruplara nisbətən şəhid ailərinin sosial müdafiəsi yaxşı təmin olunub. Bu qayğı özünü yalnız pensiya təminatının yüksəldilməsində deyil, başqa istiqamətdə də göstərir. Azərbaycanda şəhid ailələrinə Prezident təqaüdü verilir, bundan əlavə də 11 min manat həcmində sığorta haqqı ödənilir, onlar eyni zamanda müəyyən güzəştlərə malikdirlər. Eyni zamanda şəhid ailəli idisə və övladları qalıbsa onlar da ailə başçısını itirdiyinə görə müavinətlə təmin olunurlar”.
A.Nəsirli hesab edir ki, şəhid ailələri sosial təminat baxımından daha yaxşı əhatələnib. Onun sözlərinə görə, şəhid ailələri daha yüksək qayğıya, daha yüksək məbləğdə təqaüdə layiqdir: “Çünki o ailələr oğul itiriblər, ailə başçısını itiriblər. İnsan itkisini heç nə ilə əvəzləmək mümkün deyil. Bu baxımdan da hesab edirik ki, gələcəkdə də şəhid ailələrinin sosial müdafiəsinin təşkili daha səmərəli şəkildə həyata keçiriləcək”.
A.Nəsirli qeyd etdi ki, dövlət ötən dövrlərdə olduğu kimi bu il də şəhid ailələrinin mənzillərlə təmin olunması sahəsində konkret işlər görür. O hesab edir ki, şəhid ailələri və müharibə əlillərinə dövlətin qayğı siyasəti davamlıdır və bu da onlara stimul verir. 44 günlük Vətən müharibəsindən sonra 3500 şəhid ailəsi və müharibə əlili mənzil və fərdi evlərlə təmin edilməsinin müsbət göstərici olduğunu deyən A.Nəsirlinin sözlərinə görə, bu istiqamətdə görülən hər bir iş bu qəbildən olan ailələrə və şəxslərə dövlət qayğısının təzahürüdür: “Şəhid ailələrinin mənzillərlə təmin olunması da onların sosial müdafiəsi istiqamətində atılan yaxşı addımlardan biridir. Ötən dövrdə ümumilikdə 12500-dən çox şəhid ailəsi və müharibə əlilinə mənzil və ya fərdi ev verilib və bu özü də çox müsbət göstəricidir. Şəhid ailələrinə, müharibə əlillərinə dövlət qayğısının davamlı olması onlara güc verir, ruh verir”.
İradə SARIYEVA
