Aparılan hesablamalar göstərir ki, bu ilin yanvar-fevral aylarında Azərbaycana dünyanın 138 ölkəsindən 150,4 min və ya əvvəlki ilin müvafiq dövrü ilə müqayisədə 2,1 dəfə çox əcnəbi və vətəndaşlığı olmayan şəxs gəlib. Rəqəmlər göstərir ki, Azərbaycana üz tutan turistlərin sayında yenidən ciddi artım qeydə alınır. Rusiya-Ukrayna müharibəsi fonunda isə ümumiyyətlə bu il ərzində ölkəmizə gələn turistlərin sayında böyük artım proqnozlaşdırılır. Xüsusən də rus turistlərin sayında əhəmiyyətli yüksəliş proqnozlaşdırılır.
Hazırda Rusiyanın tur operatorları xaricdə turizm proqramlarının artırılması üzərində işləməkdə davam edirlər. Bildilirilir ki, bu il rusiyalı turistlərin istirahət edə biləcəyi ölkələrin sayı cəmi 12-dir. Bu fonda “Fun&Sun” tur operatoru Rusiyadan Azərbaycan, Birləşmiş Ərəb Əmirlikləri (BƏƏ), Türkiyə, Tailand, Qətər, Misir, Maldiv adaları, Seyşel adaları, Şri-Lanka, İndoneziya (Bali), Serbiya və Ermənistana birbaşa və ya üçüncü ölkələrlə reyslər təklif edir. Şirkət qeyd edib ki, aprelin 9-dan sonra Rusiyanın dünyanın 52 ölkəsinə, o cümlədən çarter reyslərinə COVİD məhdudiyyətlərini aradan qaldırması səbəbindən mövcud ölkələrin siyahısı genişlənə bilər: "Lakin bu proses vaxt və diqqətli araşdırma tələb edir, çünki bu, digər dövlətlər tərəfindən qoyulan məhdudiyyətlərdən, həmçinin birbaşa və ya əlaqə ilə hava hərəkətini təşkil etmək imkanlarından asılıdır". Hazırda əsas problem Türkiyə və Misir kimi ən kütləvi çıxış istiqamətlərində bazarın ehtiyaclarını ödəmək üçün sərfəli çarter reysi tapmaqdır. Lakin bununla yanaşı qeyd edilir ki, problem artıq həll olunmaqdadır. “Anex Tour” şirkətindən bildirilib ki, aprelin 29-dan "Türk Hava Yolları" (THY) Türkiyəyə uçuşlara başlayacaq. Tur operatorları xaricə səyahət edən turistlərə maksimum xidmət çeşidi və hər şey daxil yemək paketləri seçməyi tövsiyə edib.
Rusiya Turizm Sənayesi İttifaqının vitse-prezidenti Dmitri Qorin isə bildirib ki, Soçidən populyar uçuş istiqamətləri sırasında Azərbaycan da yer alıb. Onun sözlərinə görə, hazırda açıq əlçatan istiqamətlər üzrə yenilənmiş uçuş proqramları formalaşdırılır: "Nəqliyyat qovşağı olan Soçi hava limanının imkanlarından istifadə etmək olar. Hazırda təkcə Türkiyə və BƏƏ-yə deyil, Ermənistan, Özbəkistan, Azərbaycana da uçuşlar var və bu istiqamətlər populyardır". Rusiyanın Azərbaycandakı səfiri Mixail Boçarnikov isə qeyd edir ki, indiki halda Azərbaycan tərəfi qarşılıqlı inkişaf üçün çox münbit şərait yaradıb. O diqqətə çatdırıb ki, Azərbaycan hər zaman rus turistlərin diqqət mərkəzində olub: “Artıq quru sərhədlərini açmaq lazımdır. Bununla daha çox turist səfər edəcək. Ümumiyyətlə, Azərbaycana səfər edən rusiyalı turistlərin sayı artır”. Onun sözlərinə görə, Azərbaycan hər zaman turizm baxımından Rusiya üçün cəlbedici ölkə olub. Səfir qeyd edib ki, pandemiya səbəbindən Rusiyadan Azərbaycana səfər edən turistlərin sayı azalsa da, quru sərhədinin açılması, həmçinin “Mir” ödəniş kartının işə salınması rusiyalı turistlərin Azərbaycana axınının artmasına kömək edə bilər. "Mir" ödəniş sistemindən istifadə Rusiyadan azərbaycanlı miqrantların ölkəmizə vəsait göndərməsini də asanlaşdıra bilər. Qeyd edək ki, Rusiya Mərkəzi Bankı özü də ölkə vətəndaşlarına xaricə gedərkən nağd pul götürməyi tövsiyə edir, çünki yerli sistemin kartları yalnız 7 ölkədə qəbul olunur: "Xaricə səfər zamanı nağd pul və “Mir” kartını qəbul edildiyi ölkələr üçün özünüzlə götürmək tövsiyə olunur. Bunlar Türkiyə, Vyetnam, Ermənistan, Belarus, Qazaxıstan, Qırğızıstan, Tacikistan, Cənubi Osetiya və Abxaziyadır". İndiki vəziyyətdə Azərbaycanın da "Mir" ödəniş sisteminin ölkədə tətbiqi üçün müvafiq addımlar atması zəruri sayılır. Bununla yanaşı, Boçarnikov Rusiyanın bir sıra aviaşirkətin uçuşuna icazə verməsini Azərbaycana təklif edib və bildirib ki, bu, ölkələr arasında hava əlaqəsini aktivləşdirməyə imkan verə bilər. Ekspertlər hesab edir ki, müxtəlif məqsədli turizm səyahətləri ilə bağlı tələbin yüksək olması Rusiyadan və digər ölkələrdən Azərbaycana gələcək turistlərin sayına çox ciddi şəkildə təsir göstərə bilər. Gözlənilir ki, sektorun hazırlıq səviyyəsi, ölkədə mehmanxana nömrə fondunun yetərliliyi, daha çeşidli təkliflərin olması 2022-ci il üçün statistik göstəricilərə müsbət təsir edəcək. Eyni zamanda nəzərə almaq lazımdır ki, 85-dən artıq ölkə ilə səyahət məhdudiyyətlərinin aradan qaldırılması da turizm axınında müsbət saldonun yaranmasına səbəb olacaq. Bu baxımdan, ekspertlərin fikrincə, dövlət-özəl sektor əməkdaşlığı dərinləşdirilməlidir. Hava daşımaçılığında liberallaşdırma siyasəti və hava limanlarının qovşaq rolunu oynaması üçün dövlətin subsidiya və dəstək mexanizmləri işlənib hazırlanmalıdır. Dünyanın əksər aviaşirkətlərinə bərabərhüquqlu biznes şərtləri yaradılmalıdır. İpək yolu layihəsi daha geniş tətbiq olunmalıdır. Tranzit turistlərin ölkədaxili səyahətləri stimullaşdırılmalıdır. Eləcə də mədəni turizm, işgüzar turizm, sağlamlıq turizmi, aqro turizm və digər alternativ turizm növlərinin inkişafı üçün bütün imkanlar təmin olunmalıdır. Turizmin inkişafına dəstək fondunun yaradılması da reallaşmalıdır.
Ramil QULİYEV
