Azərbaycandakı kommersiya bankları kredit faizlərini aşağı salmamaq siyasətini hər vasitə ilə davam etdirirlər. Baxmayaraq ki, bankların maliyyə durumu çox yaxşı vəziyyətdədir.
Müşahidələr göstərir ki, bu il də banklarda müsbət dinamika davam edib. Təkcə bu ilin 3 ayı ərzində bank işçilərinin sayı 11 faiz artaraq 20834 nəfər təşkil edib. Həmçinin Azərbaycanda bankların balans kapitalı 6 faiz artaraq 5,062 milyard manat olub. Digər tərəfdən, bankların Mərkəzi Banka borcu 15 faiz azalıb. Hansı ki, əvvəllər bankların Mərkəzi banka borcu daha çox idi. Ölkədəki banklara depozit qoyuluşu isə 31 faiz artıb. Belə ki, depozit qoyuluşu onların öhdəliklərinin 81 faizi qədər - 27,056 milyard manat təşkil edib.
Bütün bu müsbət göstəricilərə rəğmən, banklar bu il də kredit şərtlərinin yumuşaldılması, faizlərin aşağı salınması ilə bağlı heç bir addım atmır. Nəinki atmır, heç buna yaxın da durmaq istəmirlər. Halbuki, buna yetərincə imkanlar var.
Maraqlıdır, maliyyə imkanları ola-ola banklar kredit faizlərini niyə aşağı salmır?
“Halbuki, kredit faizləri yüksək olduqca, onun geri qayıtma risqləri artır”
Məsələyə münasibət bildirən millət vəkili Aydın Hüseynovun açıqlamasından belə məlum oldu ki, banklar bilərəkdən faizləri aşağı salmaq istəmir: “Bu isə yanlış yanaşmadır. Bankların yanaşması faizi yüksək tutmaq üzərində qurulub. Hesab edirlər ki, faizlər nə qədər yüksək olsa, gəlitləri daha çox olacaq. Halbuki, banklar faizi aşağı salıb bu minvalla dövriyəni artırsalar, bu, daha məqbul olacaq. Məsələ ondadır ki, kredit faizləri yüksək olduqca, onun geri qayıtma risqləri artır. Kredit alan tərəfin sonra onu geri qaytarmasında çətinliklər yaranır. Ancaq faiz aşağı olduqda, kreditin geri qaytarılma imkanları artır. Çünki bu zaman risq dərəcələri aşağı olur. Nəticədə bank yenidən həmin vəsaitləri dövriyyəyə cəlb edir. Dövriyyə nə qədər çox artırsa, gəlirlər də ona müvafiq olaraq artır. Əfsuslar olsun ki, banklar bütün bunları nəzərə almaq istəmir. O baxımdan hesab edirəm ki, bankların gəlirləri artdığı üçün onlar faiz stavkalarını aşağı salmalıdır. Belə olarsa, həm bankların gəlirləri artacaq, həm də sahibkarların iqtisadi inkişafa daha çox fayda vermək imkanı olacaq”.
Millət vəkili hesab edir ki, faizlər aşağı olarsa, bu, bütün tərəflərin xeyrinə olacaq və ölkədəki iqtisadi inkişafa öz töhfəsini verəcək.
Vidadi ORDAHALLI
