Açıqlanan statistik rəqəmlərə əsasən, bu ilin yanvar-fevral aylarında Azərbaycanda tikinti materiallarının istehsalının ümumi dəyəri 121,4 milyon manat olub. Qeyd edək ki, bu, ötən ilin eyni dövrü ilə müqayisədə 83,8 % çoxdur.
Son 1 ildə emal edilmiş mərmər travertin, alebastr və onlardan məmulatların istehsalı 4 dəfə, asfaltın istehsalı 70,7 %, tikinti kərpicinin istehsalı 62 %, betondan yığma tikinti konstruksiyaların istehsalı 59,5 %, hörmə üçün hazır beton qarışığının istehsalı 52,1 %, tikinti gipsinin istehsalı 35,7 % artıb, sementdən, süni daşdan və ya betondan tikinti blokları və kərpiclərinin istehsalı 8,8 %, tikinti əhənginin istehsalı isə 43,1 % azalıb.
Qeyd etdiyimiz kimi, son iki ayda Azərbaycanda tikinti materiallarının istehsalı artıb. Adətən hər hansı bir məhsulun istehsalı artarsa, onun qiyməti enir. Ancaq tikinti materiallarında belə bir hal müşahidə olunmur. Əksinə, tikinti materiallarının qiyməti günü-gündən bahalaşır.
“Tikinti materiallarının istehsalının artması birmənalı olaraq azad olunmuş torpaqlarımızda aparılan tikinti-bərpa işlərilə bağlıdır”
NBA Konsaltinq şirkətinin rəhbəri, daşınmaz əmlak məsələləri üzrə ekspert Nüsrət İbrahimli bildirdi ki, tikinti materiallarının istehsalının artması birmənalı olaraq azad olunmuş torpaqlarımızda aparılan tikinti-bərpa işlərilə bağlıdır: “Məlumdur ki, əvvəllər ölkədəki sement zavodları tam gücü ilə işləmirdi. İndi isə tam gücü ilə işləyir. Çünki məhsulun böyük hissəsi işğaldan azad olunmuş torpaqlarımızın bərpasına yönəldilir. Həmçinin, uzun müddət idi ki, karyerlərin də böyük hissəsi tam gücü ilə işləyə bilmirdi. Hazırda isə yaranmış situasiya onlara da imkan verir ki, öz istehsal potensiallarını artırsınlar. Dəmir konstruksiya materiallarının da böyük hissəsi Qarabağa yönəldilir”.
Həmsöhbətimiz onu da vurğuladı ki, tikinti materialları bazarında bahalaşma çoxdan müşahidə olunur. Amma son iki həftədə də qiymətlərdə dəyişikliklər var. Bu, əsasən ölkəyə Rusiya və Ukraynadan idxal olunmuş bir sıra məhsullarda qeydə alınır.
Günel CƏLİLOVA
