Milli Bankın sədri Elman Rüstəmov bəyan edib ki, Azərbaycanda inflyasiyanın səviyyəsi 2021-ci ildə hədəf diapazonunda qalacaq, yəni 4 faiz civarında.
Onun sözlərinə görə, bir qədər proqnoz horizontunun dəyişməsinə baxmayaraq, marta illik inflyasiya 4,1% təşkil edib və inflyasiyanı hədəf diapazonundan kənarlaşdıra biləcək amillər müşahidə edilmir. E.Rüstəmov qeyd edib ki, ilin birinci rübündə orta illik inflyasiya 2,2 faiz olub: “Martda isə illik inflyasiya 4,1 faiz təşkil edib və inflyasiyanı hədəf diapazonundan kənarlaşdıra biləcək amillər müşahidə edilmir”.
Azərbaycanda son günlər istehlak mallarında qiymət artımlarının baş verməsi qarşıdakı aylarda və növbəti ildə bu prosesin hansı istiqamətdə davam edəcəyini gündəmə gətirir. Məsələ ondadır ki, bir sıra qida və digər məhsullarda nəzərəçarpacaq dərəcədə bahalaşma müşahidə edilir. İlin hələ 4 ayı geridə qalıb. Belə olan halda, nə dərəcədə əmin olmaq olar ki, bu il ölkədə inflyasiya 4 faiz çivarında olacaq?
“Bu il Azərbaycanda inflyasiya səviyyəsi ikirəqəmli olmayacaq, amma 4 faizdən yüksək olacaq”
Məsələyə münasibət bildirən iqtisadçı-alim, professor Əli Əlirzayev bu il ölkədə inflyasiyanın 4 faiz olacağı ilə bağlı proqnoza birmənalı prizmadan yanaşmadı: “Əvvəla 4 faizlik inflyasiya da kiçik rəqəm deyil. Bu o deməkdir ki, hər 100 manatın 40 manatı inflyasiya hesabına formalaşır. Digər tərəfdən, inflyasiyanı, onun əsas səbəblərini, inkişaf istiqamətlərini hansı məhsullar üzrə kimə və hansı əhali qruplarına necə təsir edəcəyi baxımından qiymətləndirmək lazımdır. Məsələ ondadır ki, bəzi məhsulların bahalaşması, yaxud da ucuzlaşması inflyasiyaya təsir etmir. İnflyasiyaya, birinci növbədə, əhalinin alıcılıq qabiliyyəti təsir edir. Alıcılıq qabiliyyəti azalırsa, bu o deməkdir ki, bazara çıxarılan pulun miqdarı məhsulun həcminə uyğun gəlmir. Nəticədə alıcılıq qabiliyyəti azalır. Prinsip etibarilə alıcılıq qabiliyyətinin aşağı düşməsi inflyasiyanın qarşısını almalıdır. Onsuz da pandemiya şəraitində əhalinin alıcılıq qabiliyyəti aşağı düşüb. Bir sıra müəssisələr işləmir. İşləyən müəssisələr də potensialından tam istifadə edə bilmir. İşğaldan azad edilmiş rayonlara qoyulan vəsaitlər digər bazarlara təsir edir. Bu baxımdan bu il inflyasiya 4 faiz civarında olacaqsa, bu pis olmaz. Ancaq inflyasiyanın 4 faiz civarında qalacağı real görünmür. Hesab edirəm ki, Azərbaycanda gizli inflyasiya ehtimalı böyükdür və bu baş verə bilər. Çünki dəfələrlə belə hallar olub. Fikrimcə, bu il Azərbaycanda inflyasiya səviyyəsi ikirəqəmli olmayacaq, amma 4 faizdən yüksək olacaq”.
Professor onu da qeyd etdi ki, pandemiya ilə bağlı vəziyyətin necə dəyişəcəyi də inflyasiyaya təsir edəcək.
Vidadi ORDAHALLI
