Beynəlxalq Bankın müştərilərlə qəribə iş təcrübələri -xüsusən də 60-65 yaşlılarla...

Əkrəm Həsənov: “Vətəndaş bankın ona göstərdiyi bu münasibətlə bağlı şikayət etmək hüququna malikdir”

img

Banklar müştərilərin maraqlarını əsas götürüb onlara daha rahat, daha səmərəli xidmət üsulları təklif etmək və müştəri məmnunluğuna səbəb olan addımlar atmaq əvəzinə, çox zaman müştərilərin maraqlarına zidd davranışlar sərgiləyirlər. Bəzi bankların açıq şəkildə olmasa da, gizlin şəkildə yaş kateqoriyasına görə müştərilər arasında ayrıseçkilik etməsi də tamamilə qanunaziddir.

 

Adının çəkilməsini istəməyən daimi oxucularımızdan biri redaksiyamızla əlaqə saxlayaraq bu günlərdə Beynəlxalq Bankın qəribə iş təcrübəsi ilə qarşılaşdığını bildirdi.   

Müştərinin dediyinə görə, təxminən 20 gün əvvəl sosial şəbəkədə Azərbaycan Beynəlxalq Bankının Tamkart taksit kartının təqdimatına rast gəlib və  şərtlər cəlbedici olduğundan, sifariş verməyi qərara alıb: “Dərhal bankın saytına daxil olub online sifariş formasını doldurdum. Bir neçə gün keçdikdən sonra bank əməkdaşı mənə zəng etdi və təvəllüdüm, iş yerim və maaşımla maraqlandı. Anket formasında bunların hamısını göstərməyimə baxmayaraq, bir də bank işçisinə bunları şifahi şəkildə bildirdim. Əməkdaş qeyd etdi ki, bankın mənə kart verməsində bir problem görünmür və mən istədiyim filiala yaxınlaşıb onu ala bilərəm. Evimə Nəsimi filialının yaxın olduğunu bildirdim, qeydə aldığını dedi. Ertəsi gün 28 May küçəsindəki həmin filiala getdim. Uzun növbədən sonra pəncərəyə yaxınlaşdığımda bank işçisi mənə bildirdi ki, sistem mənim maaşımı 200 manat göstərir, halbuki, rəsmi maaşım 600 manatdır və müraciətimdə də bu rəqəmi göstərmişdim. Lakin mənə deyildi ki, sistem belə göstərdiyi üçün heç nə edə bilməzlər. Evə qayıtdıqdan sonra, təbii olaraq, iş yerimlə məsələni aydınlaşdırmaq qərarına gəldim. Mühasib xanım deyilənlərin yanlış olduğunu, maaşımın rəsmi şəkildə 600 olaraq qeyd edildiyini bildirdi, hətta mənə əmək müqaviləsinin fotosunu da göndərdi. Bundan sonra Beynəlxalq Bankın “qaynar xətt”inə zəng vurub məsələni necə həll edə biləcəyimi soruşdum. Zəngə cavab verən əməkdaş bildirdi ki, son altı ayın maaş göstəricilərini əks etdirən arayışı banka təqdim etməliyəm. İşdən bu arayışı alıb yenidən banka getdim. Arayışı təqdim etdiyim Ülkər adlı xanım sistemə baxıb dedi ki, maaşınız burada 600 manat göstərilir və bu arayışa ehtiyac yoxdur. Bunun mənə onların öz əməkdaşları tərəfindən deyildiyini bildirdim. Təxminən saat yarım vaxt “öldürəndən” , bir sıra öhdəlik və xəbərdarlıq sənədlərinə imza atdırandan sonra xanım bildirdi ki, 62 yaşın astanasında olduğum üçün mənə Tamkart verə bilməzlər, çünki kart 5 illikdir, məni isə 65 yaşımda işdən çıxara bilərlər.

Maraqlıdır, belə bir qanun varsa, niyə kartı sifariş edərkən anket doldurduğum və təvəllüdümü göstərdiyim halda mənə bu haqda heç bir söz deyilmədi? Üstəlik, bundan sonra da şəxsən banka getmişdim və şəxsiyyət vəsiqəmi təqdim etmişdim. Beynəlxalq Bankın bu yarıtmaz iş prinsipinə niyə ciddi irad tutulmur?” - deyə müsahibimiz bildirdi.

  • “Hətta bankı məhkəməyə verə və ona vurulan mənəvi zərərin əvəzini tələb edə bilər”

Beynəlxalq Bankın vətəndaşa qarşı sərgilədiyi qəribə münasibəti şərh edən bank məsələləri üzrə tanınmış ekspert Əkrəm Həsənov bizə bildirdi ki, banklar istənilən kampaniya, layihə ilə bağlı müştəriyə düzgün məlumat verməyə borcludurlar. Ə.Həsənovun sözlərinə görə, banklar kredit siyasətini müstəqil özləri müəyyənləşdirirlər. Onların öz siyasətlərinə uyğun olaraq, kimə kredit verib-verməmələrini özləri müəyyən edirlər: “Özü də kredit vermək risqdir. Çünki banklar öz maliyyələri ilə kredit vermirlər ki, bu işi müştərinin, əmanətçilərin pulu ilə edirlər. Bu baxımdan, banklar sərbəstdirlər və öz daxillərində meyarlar müəyyən edə bilərlər ki, filan yaş qrupundan olan vətəndaşlara kredit vermirik, yaxud krediti daha sərt tələblərlə veririk. Amma, digər tərəfdən, banklar hansı məhsulu bazara çıxarıb onu reklam edirlərsə və orada yaş məhdudiyyəti varsa, bu, bəyan edilməlidir. Yaş kateqoriyasını əvvəlcədən elan etmədən həmin məhsulun, kredit növünün reklamını aparırlarsa, bu artıq “Reklam haqqında” Qanuna uyğun olaraq, yalan reklam sayılır, buna görə bank məsuliyyətə cəlb oluna bilər. Bu baxımdan ki, antiinhisar və istehlakçıların hüquqlarının müdafiəsi dövlət xidməti həmin bankı cərimələyə bilər. Vətəndaş bankın ona göstərdiyi bu münasibətlə bağlı şikayət etmək hüququna malikdir. Hətta bankı məhkəməyə verə və ona vurulan mənəvi zərərin əvəzini tələb edə bilər. Çünki bank reklam etdiyi məhsulun, kredit növünün hansı yaş qruplarına verilib-verilmədiyini öz reklamında elan etməlidir ki, vətəndaşlar öz yaş kateqoriyalarına uyğun müraciət etsinlər” - deyə Ə.Həsənov qeyd etdi.

İradə SARIYEVA

Son xəbərlər