Məlum olduğu kimi, Dünya İqtisadi Forumunun prezidentinin təşəbbüsü ilə Prezident İlham Əliyevin forumun prezidenti Borge Brende ilə videokonfrans formatında görüşü olub.
Prezident İlham Əliyev B.Brendeyə işğaldan azad olunmuş ərazilərimizdə həyata keçirilən infrastruktur layihələri, investisiyaların cəlb olunması barədə məlumat verib. Dövlət başçısı bildirib ki, həmin ərazilərdə yenidənqurma prosesi gedir, qarşıda nəhəng iş durur və böyük bir ərazi tamamilə yenidən qurulacaq. Bildirilib ki, indi səylərin əsas istiqaməti ərazilərin yenidən qurulması olacaq və bu, həmçinin, ölkə iqtisadiyyatının qeyri-enerji sektoruna, xüsusilə tikinti sahəsinə təkan verəcək. İki gün əvvəl “ağıllı kənd” konsepsiyası ilə yenidən qurulacaq kəndlərin təməlinin qoyulduğunu vurğulayan dövlət başçısı işğaldan azad edilmiş əraziləri “yaşıl zona” elan etdiyini, həmin ərazilərdə “ağıllı şəhər”, “ağıllı kənd” konsepsiyasından istifadə olunacağını, şəhərlər üçün baş planların hazırlandığını, enerji istehsalı, elektrik enerjisi, avtomagistrallar, dəmir yolları, hava limanları ilə bağlı infrastruktur layihələrinin həyata keçirildiyini deyib və bu sahədə Dünya İqtisadi Forumu ilə əməkdaşlığın perspektivlərinə toxunub.
Görüşdə Dünya İqtisadi Forumunun Dördüncü Sənaye İnqilabı mərkəzləri şəbəkəsinin afilə edilmiş Azərbaycan Mərkəzinin fəaliyyəti vurğulanıb. Həmçinin, işğaldan azad edilmiş ərazilərin qurulmasında Dördüncü Sənaye İnqilabı Mərkəzinin rolu mazakirə olunub.
Bütövlükdə, işğaldan azad edilmiş ərazilərdə Dördüncü Sənaye İnqilabı Mərkəzinin rolunun genişləndirilməsi perspektivlərini ekspertlər necə dəyərləndirirlər?
“Həm işğaldan azad edilən ərazilərin bərpası sürətlənəcək, həm də bu, iqtisadi inkişafa təkan olacaq”
Məsələyə münasibət bildirən ekspert Rəsul Cahangirlinin sözlərinə görə, Dünya İqtisadi Forumunun Dördüncü Sənaye İnqilabı Mərkəzinin işğaldan azad edilmiş ərazilərdə fəaliyyəti çox önəmli nəticələrə yol açacaq: “Prinsip etibarilə bunun perspektivi var. Məsələ ondadır ki, işğaldan azad edilmiş ərazilərin bərpası innovativ metodlara əsaslanır. Həmin ərazilər “ağıllı şəhər”, “ağıllı kənd” konsepsiyasına uyğun olaraq bərpa ediləcək. Azərbaycan bununla bağlı öz mövqeyini ortaya qoyub və bərpa işlərində xarici şirkətlərin iştirakı üçün hərtərəfli şərait yaradılacağını bəyan edib. Heç şübhəsiz ki, bərpa prosesində Dünya İqtisadi Forumu da bu və ya digər dərəcədə iştirak edəcək. Çünki Azərbaycanla yüksək səviyyəli əməkdaşlıq mövcuddur. Orada yaradılan hərtərəfli şərait Dördüncü Sənaye İnqilabı Mərkəzi üçün iqtisadi baxımdan cəlbedici olacaq. Bu isə, öz növbəsində, yeni-yeni imkanlar yaradacaq. Həm işğaldan azad edilən ərazilərin bərpası sürətlənəcək, həm də bu, iqtisadi inkişafa təkan olacaq”.
Bir sözlə, ekspert hesab edir ki, bu layihənin böyük perspektivi var.
Vidadi ORDAHALLI
