Açıqlanan statistik rəqəmlərə əsasən, Azərbaycanda aprel ayının 1-nə cəmi depozit bazasının həcmi 23 milyard 825,9 milyon manat olub. Bu, ötən ilin eyni dövrü ilə müqayisədə 1,1 faiz azalıb, əvvəlki ayın müvafiq göstəriciləri ilə müqayisədə isə 1,4 faiz artb.
Manatla olan depozitlərin həcmi 10 milyard 732,5 milyon manat (cəmi depozitlərin 45 faizi), xarici valyutada olan depozitlərin həcmi isə 13 milyard 93,4 milyon manat (cəmi depozitlərin 55 faizi) təşkil edib.
Fiziki şəxslərin əmanətləri isə bu ilin mart ayında əvvəlki aya nisbətən 232 milyon manat azalıb. Belə ki, fevral ayında vətəndaşların banklardakı əmanətləri 8 milyard 379 milyon manat olsa da, bir ay sonra bu göstərici 8 milyard 147 milyon manata düşüb.
Ekspertlər hesab edirlər ki, fiziki şəxslərin əmanətlərinin həcminin azalması bank sektoru üçün xoşagələn vəziyyət deyil.
“...bank sektoru üçün arzuolunan deyil”
Millət vəkili Vüqar Bayramov bildirdi ki, banklarda 4 milyard 101 milyon manat xarici valyutalarda, 4 milyard 46 milyon vəsait isə manatla saxlanır: “Xarici valyutada saxlanan əmanətlərin payı cüzi çox olsa da, etiraf etmək lazımdır ki, son illər depozitlərin valyuta strukturu xeyli dərəcədə yaxşılaşıb. Bu isə milli valyutanın 2017-ci ilin fevral ayından etibarən stabil qalması və manatla əmanətlərə xarici valyutaya nisbətən daha çox dividendin ödənilməsi ilə bağlıdır. Fiziki şəxslərin əmanətlərinin azalması tələbli depozit məbləğlərinin aşağı düşməsi ilə bağlı olsa da, bütün hallarda, bank sektoru üçün arzuolunan deyil. Digər tərəfdən, depozitlər üzrə dividend faizlərini son illər aşağı endirən əksər bankda kredit faizləri yüksək olaraq qalmaqdadır. Bu da depozit ödənişləri ilə kredit faizləri arasında kəskin fərqin hələ də qaldığından xəbər verir. Bu baxımdan, bank sektorunda rəqabəti gücləndirməklə depozit və kredit siyasətləri arasındakı mütənasibliyin möhkəmləndirilməsinə ehtiyac var. Bu, passiv vəsaitlərin banklara cəlb edilməsi və kredit şərtlərinin yumşalmasına səbəb olacaq”.
Günel CƏLİLOVA
