“Böyük aqroparkların yaradılmasının əsas məqsədi ərzaq təhlükəsizliyini təmin etməkdir”. Bunu aprelin 20-də Prezident İlham Əliyev Azərbaycan Televiziyasına müsahibəsində deyib.
Dövlət başçısı bildirib: “Təbii ki, eyni zamanda, kiçik fermer təsərrüfatlarının inkişafı ilə bağlı praktiki işlər görülür. Bu iki istiqamət üzrə kənd təsərrüfatı inkişaf edir.
Aqroparkların üstünlüyü ondan ibarətdir ki, burada daha bol məhsul yetişdirilir və məhsuldarlıq da daha yüksəkdir. Bu, təbiidir, çünki burada ən müasir aqrotexniki tədbirlər tətbiq olunur”.
Azərbaycanda aqroparkların yaradılması ölkəmizin ərzaq təhlükəsizliyinin təmin edilməsinə necə təsir göstərəcək?
Tanınmış iqtisadçı-ekspert Elşad Ömərov “Bakı-Xəbər”ə bildirdi ki, ölkəmizdə aqroparkların yaradılmasının ərzaq təhlükəsizliyinin təmin edilməsi baxımından əhəmiyyəti böyükdür. “Hesab edirəm ki, aqroparkların təşkili və istifadəyə verilməsi bir sıra istiqamətlər üzrə ölkə iqtisadiyyatının rəqabətqabiliyyətliliyinin artırılmasına şərait yaratmalıdır. Bir tərəfdən, təbii ki, bu həm ərzaq təhlükəsizliyi ilə bağlı olan məsələdir, həm də iqtisadi və milli təhlükəsizliklə əlaqədar bir istiqamətdir. Çünki ərzaq bazarında, istehlak bazarında idxalın yüksək səviyyədə olması ölkə üçün çox ciddi problemdir. Eyni zamanda, idxal olunan məhsulların xeyli hissəsinin keyfiyyət göstəricilərinin aşağı olması da sözsüz ki, bütövlükdə, milli təhlükəsizliyə aid olan bir problem kimi çıxış edir və burada mütləq şəkildə biz ölkədə istehsal prosesinin formalaşdırılmasına, təkmilləşdirilməsinə ciddi diqqət göstərməliyik. Bu baxımdan hesab edirəm ki, aqroparkların yaradılması ölkəmizdə ərzaq təhlükəsizliyinin təmin edilməsinə imkanlar açacaq”.
E.Ömərovun sözlərinə görə, həm də aqroparkların açılması bölgələrdə yeni iş yerlərinin açılması deməkdir və bunun da bölgələrdə sosial-iqtisadi problemlərin həllində oynayacağı rol danılmazdır. “Eyni zamanda, aqroparklarda açılan iş yerləri yüksək keyfiyyətli mütəxəssislərin hazırlanması ilə bağlı olan prosesləri stimullaşdıracaq, o proseslərə təkan verəcək. Demək, digər istiqamətlərdə də canlanma müşahidə edilməlidir. Bununla yanaşı həmin aqroparklardakı iş yerləri kifayət qədər yüksək əməkhaqqı verilən iş yerləri olacaq. Bu da ölkədə alıcılıq qabiliyyətinin yüksəlməsinə, daxili bazarın genişlənməsinə şərait yaratmalıdır. Son nəticədə alıcılıq qabiliyyətinin artırılması və daxili bazarın genişlənməsi iqtisadiyyatın inkişafına da təkan verməlidir.
Ona görə də burada biz sistemli şəkildə proseslərin reallaşmasına çalışmalıyıq. Hesab edirəm ki, aqroparklar, bütövlükdə, ölkə iqtisadiyyatının rəqabətinin xeyli dərəcədə artırılmasına şərait yarada bilər. Eyni zamanda, bir məqama da diqqət yetirmək lazımdır ki, aqroparklarda istehsal olunan məhsulların bütün istehsal zənciri üzrə maksimum şəkildə ölkədə lokallaşmasına nail olmaq lazımdır”.
İradə SARIYEVA
