Açıqlanan statistik rəqəmlərə əsasən, Azərbaycana "Aİ-95" benzininin idxalı yanvar-fevralda kəskin artıb. Bu ilin yanvar-fevral aylarında Azərbaycana 7,292 mln. ABŞ dolları dəyərində (12,397 mln. manat) 12 174,23 ton avtomobil benzini ("Aİ-95" və "Aİ-98") idxal edilib.
Dövlət Statistika Komitəsinin apardığı hesablamalarına görə, ötən ilin eyni dövrü ilə müqayisədə idxal olunan benzinin həcmi 68,3%, dəyəri isə 21,4% artıb. Hesabat dövründə təkcə "Aİ-95" ("Premium") markalı avtomobil benzinindən ölkəyə 7,104 mln. dollarlıq (12,077 manat) 11 934,35 ton idxal olunub ki, bu da illik müqayisədə həcm ifadəsində 78,3%, dəyər ifadəsində isə 28,4% çoxdur.
Qeyd etdiyimiz kimi, "Aİ-95" benzininin idxalı artıb. Ancaq bu dövrdə ölkəmizdə "Aİ-92” markalı benzinin istehsalı azalıb. 2021-ci ilin birinci rübünə aid olan məlumata əsasən, "Aİ-92” markalı avtomobil benzini istehsalı 28 faiz azalaraq 247,4 min tona düşüb.
Maraqlıdır, "Aİ-95" benzininin idxalı niyə artıb və "Aİ-92” markalı benzinin istehsalı nə səbəbdən azalıb?
“...daha bahalı və keyfiyyətli "Premium” benzinindən istifadə etməli olurlar”
İqtisadçı-ekspert Kamran Məmmədli qeyd etdi ki, yerli benzinin keyfiyyəti istehlakçıları qane etmədiyi üçün idxalda artım müşahidə edilir: “Çoxlu sayda sürücü benzinin keyfiyyətindən narazılıq edir. Təbii ki, benzinin keyfiyyətinin aşağı olması avtomobilin müxtəlif qurğularına zərər verir. Həmçinin, benzinin keyfiyyətsiz olması ətraf mühitə atılan zərərli maddələrin miqdarının çox olmasına səbəb olur. Təbii ki, belə olan halda, sürücülər keyfiyyətli benzin almağa üstünlük verirlər. Avtomobil sahibləri məcburiyyət qarşısında qalıb daha bahalı və keyfiyyətli "Premium” benzinindən istifadə etməli olurlar. Mövcud vəziyyət dəyişməyəcəyi təqdirdə idxal benzininin istehlakında artım davam edəcək”.
Günel CƏLİLOVA
