“Mənzilin kirayəyə verilməsi ilə əlaqədar əldə edilən gəlirdən 14 faiz gəlir vergisi ödənilməlidir". Bu barədə Dövlət Vergi Xidmətindən kirayə mənzil bazarında vergidən yayınmalara qarşı hansı mübarizə tədbirlərinin görüldüyü ilə bağlı sorğuya cavab olaraq bildirilib.
Qeyd edilib ki, mənzilin kirayəyə verilməsi ilə əlaqədar kirayə haqqını ödəyən fiziki şəxs vergi ödəyicisi kimi uçotda olmadıqda, kirayəyə verən fiziki şəxs özü vergi ödəyicisi kimi uçota alınmalı və bu fəaliyyətdən əldə etdiyi gəlirdən 14 faiz dərəcə ilə gəlir vergisini hesablamalıdır.
Onu da əlavə edək ki, bu qayda tək kirayə evlərə deyil, eyni zamanda, iaşə obyektlərinin icarəyə verilməsinə də şamil olunur.
Kirayə evlərdən 14 faiz gəlir vergisinin ödənilməsi mənzil sahiblərinin narazılığına səbəb olub. Onlar təklif edirlər ki, gəlir vergisi 14 faiz deyil, 5 faiz olsun. Həmçinin, kirayə evlərdə yaşayanlar da bu qaydanın kirayə evlərin aylıq qiymətinə təsir edəcəyindən narahatdırlar.
“Verginin 14 faiz olması vətəndaşları vergi verməkdən yayındırır, kirayə müqaviləsi bağlanmır”
Əmlak məsələləri üzrə ekspert Ramil Qasımzadə bildirdi ki, əmlak sahiblərindən tutulan vergi 5 faiz olarsa, bu, məqbul hesab olunur: “Faizin aşağı olması tək mənzillərin kirayə verilməsi ilə bağlı deyil. Eyni zamanda, ictimai iaşə obyektlərinin də icarəyə verilməsinə şamil olunur. Elə obyektlər var ki, onlar icarəyə verilərkən 14 faiz kirayə vergisi tutulur. Pandemiya zamanı müvəqqəti olaraq bu rəqəm 7 faizə endirilib. Verginin 14 faiz olması vətəndaşları vergi verməkdən yayındırır. Kirayə müqaviləsi bağlanmır. Bu da gələcəkdə kirayə verənlə kirayədə qalan arasında müxtəlif problemlərin yaranmasına səbəb olur. Hesab edirəm ki, kirayə evlərdən 14 faiz vergi tutulması çox yüksəkdir. Bu rəqəm 5 faizdən 2 faizə kimi endirilərsə, daha yaxşı olar”.
Həmsöhbətimizin sözlərinə görə, elə mənzil var ki, kirayə haqqı 10 min manatdır. Vəsaitin 14 faizi vergiyə tutulanda yetərincə böyük rəqəm edir. Mənfəət vergi ödəyiciləri var ki, onlara hazırda güzəştlər tətbiq edilir. Onlar indi 20 faizlik verginin 75 faizindən azaddırlar: “Yəni mənfəət vergi ödəyiciləri məbləğin 5 faizini ödəyirlər. Evini kirayə verən vətəndaş daha çox mənfəət vergisi ödəməyə maraq göstərir. Məlumdur ki, orada faiz aşağıdır. İqtisadiyyat Nazirliyində bu məsələyə baxılmalıdır”.
Günel CƏLİLOVA
