Azərbaycan əksər iqtisadi parametr üzrə hətta inkişaf etmiş ölkələri necə üstələyir…

Kamran Məmmədli: “Azərbaycan bölgədə böyük infrastruktur layihələrini uğurla reallaşdıran ölkə kimi tanınır”

img

“Bu gün istənilən meyar üzrə, istənilən parametr üzrə heç kimdən asılı deyilik, iqtisadi sahədə qabaqcıl yerlərdəyik – istər xarici borc baxımından, istər iqtisadi artım baxımından və adambaşına düşən valyuta ehtiyatları baxımından".  Bunu Prezident, Yeni Azərbaycan Partiyasının Sədri İlham Əliyev partiyanın VII qurultayındakı çıxışında deyib.

Dövlət başçısı qeyd edib ki, biz istənilən meyar üzrə qabaqcıl yerlərdəyik və bu sahədə şəffaflığı təmin etdik: “Mənə məlumat verildi ki, çox mötəbər təşkilat tərəfindən dünyanın 60-dan artıq suveren fondlarının təhlili aparılıb və Azərbaycan Dövlət Neft Fondu bütün parametrlər, bütün meyarlar üzrə beşinci yerdədir. Mən demişəm bu siyahı dərc edilsin, hər kəs görsün ki, hansı ölkələrin suveren neft fondları, yaxud da ki, ehtiyat fondları orada göstərilir. Görün biz kimləri qabaqlamışıq? Davos İqtisadi Forumunun hesabatına baxın, biz iqtisadi inkişaf baxımından, infrastruktur layihələri baxımından inkişaf etmiş ölkələri qabaqlamışıq. Kimsə bizə kömək edib? Yox. Bunu borca girib etmişik? Yox. Bizim xarici borcumuz ümumdaxili məhsulun cəmi 18-19 faizini təşkil edir. Bir də ki, bizim valyuta ehtiyatlarımız xarici borcumuzdan 5-6 dəfə çoxdur. Biz istəsək sabah, birisi gün, bir aydan sonra bütün xarici borcumuzu ödəyə bilərik. Yəni bu nailiyyətləri öz zəhmətimiz hesabına qazanmışıq, əraziləri işğal olunmuş ölkə kimi qazanmışıq, çox çətin geosiyasi vəziyyətdə olan ölkə kimi qazanmışıq. Bu, Vətən müharibəsi üçün iqtisadi sahədə, siyasi sahədə, daxili sabitlik sahəsində hazırlıq idi”.

  • “İqtisadiyyatımızın inkişafı ölkəmizin beynəlxalq nüfuzunu yüksəltməklə yanaşı, regionun lideri kimi Azərbaycanın geosiyasi mövqelərini daha da möhkəmləndirir”

Azərbaycanın iqtisadi inkişafı barədə danışan iqtisadçı-ekspert Kamran Məmmədli qeyd etdi ki, ölkə iqtisadiyyatının bütün sahələrinin sürətli inkişafı, o cümlədən, yerli və xarici investisiyalar, müasir texnologiyalar, təkmil idarəetmə rəqabətqabiliyyətli məhsul istehsal edən müəssisələrin yaradılmasına, yeni iş yerlərinin açılmasına imkan verəcək: “Azərbaycan bölgədə böyük infrastruktur layihələrini uğurla reallaşdıran ölkə kimi tanınır. İqtisadiyyatımızın inkişafı ölkəmizin beynəlxalq nüfuzunu yüksəltməklə yanaşı, regionun lideri kimi Azərbaycanın geosiyasi mövqelərini daha da möhkəmləndirir”.

Günel CƏLİLOVA

Son xəbərlər