Futbol üzrə Azərbaycan millisi AVRO-2020-nin seçmə mərhələsində dördüncü oyununu keçirib. Səfərdə Xorvatiyaya 1:2, evdə Macarıstana 1:3, Slovakiyaya isə 1:5 hesabı ilə uduzan yığma komanda Uels kollektivinin qonağı olub. Kardiff şəhər stadionunda baş tutan matç meydan sahiblərinin qələbəsi ilə yekunlaşıb - 2:1. Bununla da, baş məşqçi Nikola Yurçeviçin rəhbərliyi altında çalışdırılan futbol millimiz seçmə mərhələdəki dördüncü oyununda da uduzub. Bu qənaətə gəlmək olarmı ki, milliyə gətirilən bu əcnəbi məşqçi ilə də bağlı bəslənən ümidlər özünü doğrultmayıb?
Tanınmış futbol şərhçisi Kənan Məstəliyev “Bakı-Xəbər”ə açıqlamasında bildirdi ki, son oyunda millimiz bir qədər normal futbol oynasa da, məğlubiyyətə xal verilmədiyindən, yekun nəticəni əsas götürməliyik: “Uelsin tərkibində dünyanın ən bahalı klublarında forma geyinən oyunçular təmsil olunsa da, onlar elə də yüksək səviyyəli, yəni bizi əzəcək səviyyədə oyun nümayiş etdirmədilər. Qapımıza buraxılan hər iki qol futbolçuların hazırlığının yaxşı səviyyədə olmaması səbəbindən baş verdi. Birində sırf qapıçının, digərində isə müdafiəçilərin kobud səhvləri nəticəsində qapımızda qol gördük. Qrupdakı cədvələ baxanda görünür ki, bizim arxada qalan 4 oyundan hətta bir qələbəmiz belə yoxdur. Biz heç öz meydanımızda keçirdiyimiz görüşlərdən belə heç-heçə ilə ayrıla da bilməmişik. Yeni məşqçinin millimizə nəsə qazandıra biləcəyini əvvəlcədən də təxmin etmirdik. Bunu düşünənlər nə qədər yanlışlıq etdiklərini gördülər. Yurçeviç karyerasında heç vaxt baş məşqçi olmayıb. O indiyə qədər baş məşqçilərin köməkçisi kimi işləyib. Qurban Qurbanovdan sonra Azərbaycan yığmasını çalışdırmaqla bağlı bir çox məşqçilərə bu iş təklif edilsə də, onlar imtina edib. Çünki normal futbol anlayışı olan məşqçi bunun nə olduğunu bilir. Yurçeviç üçün istənilən yığmada baş məşqçi olmaq göydəndüşmə olduğundan, bu təklifi qəbul edib. Onun futbol savadına qəti şübhəm yoxdur. Düzülüşü, əvəzləmələri normal idi. Bizə taktika quran yox, baş məşqçi lazımdı. Yığma komandanı motivasiya edə biləcək bir baş məşqçi. Yəni yeri gələndə oyunçularda düşüncə dəyişikliyini etməyə qadir olan şəxs gərəkdi. Birmənalı şəkildə deyə bilərəm ki, həmin insan Yurçeviç deyil. Hədəf olaraq Azərbaycan yığmasının Avropa 2020-də iştirakını seçmək absurddu. Hərçənd ki, AFA-da bu fikri dilə gətirənlər olub. Komandamız buna qəti hazır deyil. Qarabağ futbol klubunun əldə etdiyi ardıcıl uğurlar ölkə futbolundakı bərbad durumun üstünü bir qədər örtə bilir, amma futbolumuz açınacaqlı vəziyyətdədir. Ölkənin yüksək liqasında cəmi 8 komanda oynayır, onların da hamısı de-fakto Bakını təmsil edir. Region komandalarımız yox səviyyəsindədir. Birinci divizionda isə vəziyyət həvəskar səviyyəsindədir. Bir sözlə, ölkənin futbol strukturu məhv vəziyyətindədir. Yığma da ölkədəki futbolun piramidasıdı. Ölkənin futbol strukturundakı vəziyyəti özündə əks etdirir. Bu vəziyyət aradan qalxmasa, yaxşı milli komada gözləməyə dəyməz. Bu məşqçi ilə ciddi uğurlara imza atılacağını gözləməyə dəyməz. Hətta qarşıdakı oyunlardan bir xal qazansaq belə, bizim üçün böyük uğur ola bilər. Aşağıdan yuxarıya ciddi dəyişikliklərə ehtiyac var. Olmasa, faciəvi durum davam edəcək”. Məhəmmədəli QƏRİBLİ
