“Azərbaycan heç vaxt təşkilatda hansısa statusla təmsil olunmaq təşəbbüsü ilə çıxış etməyib”
Ermənistan Parlamentinin xarici əlaqələr üzrə komitəsində Kollektiv Təhlükəsizlik Müqaviləsi Təşkilatının (KTMT) nizamnaməsinə dəyişikliklərin edilməsi barədə müzakirələr keçirilib. Dəyişikliklərə əsasən KTMT-da müşahidəçi və tərəfdaş statusları olacaq. Parlamentdə çıxışı zamanı Xarici işlər nazirinin müavini Şavarş Köçəryan bildirib ki, Ermənistan ona dost olmayan istənilən ölkənin KTMT-də müşahidəçi və ya tərəfdaş statusunu almasını blok edə bilər: “Buna qədər KTMT-də müşahidəçinin ola biləcəyinə dair bənd var idi. Lakin o açıqlanmamışdı. İndi isə təklif var ki, daha yüksək status – tərəfdaş statusu olsun. Onlar arasında fərq var”. Koçaryan vurğulayıb ki, nizamnamədə Ermənistan üçün belə bir statusa malik ölkənin KTMT-ya üzv ölkəyə qarşı hər hansı bir addım atmaması barədə bəndin olması olduqca əhəmiyyətlidir: “Heç bir ölkə KTMT-nın bütün üzvlərinin razılığı olmadan müşahidəçi və ya tərəfdaş statusu ala bilməz". Deputatlar nazirdən Azərbaycanın bu statuslardan hər hansı birini almaq istəyib-istəmədiyi ilə maraqlanıblar. Köçəryan vurğulayıb ki, KTMT-nın məqsədi onun üzvlərinin təhlükəsizliyidir: "Ermənistanın ərazi bütövlüyünü və təhlükəsizliyini birbaşa təhdid edən dövlət varsa, bu statuslardan hər hansı birini almağı bloklamaq üçün daha heç bir əlavə fakt lazım deyil. Təsəvvür edin, Azərbaycan quruma üzv olub. Bu bizim üçün daha qəbuledilməz olardı”. Parlamentinin xarici əlaqələr üzrə daimi komitəsinin sədri Ruben Rubinyan isə qeyd edib ki, Ermənistan heç vaxt Azərbaycanın KTMT-də müşahidəçi və ya tərəfdaş ölkə olmasına razı olmayacaq: “Azərbaycan KTMT-də müşahidəçi olmayacaq, Azərbaycan KTMT-də tərəfdaş ölkə olmayacaq. Nə üçün bu qədər əminəm, çünki Ermənistan heç vaxt tərəfdaş ölkəyə razılıq verməyəcək”. O da məlumdur ki, Azərbaycanın heç vaxt KTMT-yə üzv olmaq istəyi olmayıb. Eyni zamanda, qurumda müşahidəçi və ya tərəfdaş statusu ilə təmsil olunmaq niyyətini bəyan etməyib. Belə olan halda, maraqlıdır, Ermənistan niyə bu qədər narahatdır? Məsələyə münasibət bildirən keçmiş diplomat, politoloq Fikrət Sadıqovun sözlərinə görə, Ermənistan hakimiyyəti sadəcə KTMT-nin nizamnaməsinə dəyişikliklərin edilməsindən xoflanır: “Narahatdılar ki, bu dəyişikliklər guya Azərbaycanın qurumda müşahidəçi statusi ilə təmsil olunmasına hesablanıb. Ancaq bu belə deyil. Azərbaycan heç vaxt KTMT-də hansısa statusla təmsil olunmaq təşəbbüsü ilə çıxış etməyib. Bununla bağlı səslənən fikirlər şaiyə xarakterli olub və reallığa uyğun deyil. Digər tərəfdən Ermənistan rəhbərliyi anlamalıdır ki, KTMT-də əsas koordinator dövlət Rusiyadır. Təşkilatda əsas söz sahibi Kreml hakimiyyətidir. Moskvanın razılığı olandan sonra Ermənistan buna qarşı çıxa bilməz. Sadəcə olaraq, Ermənistan hakimiyyəti görüntü yaratmaq istəyir ki, guya onlar müstəqildir və belə bir təşəbbüs olsa veto qoyacaqlar. Əslində isə Azərbaycanı bu məsələlər narahat etmir. Ona görə ki, qeyd olunduğu kimi, Azərbaycanın belə bir istəyi yoxdur. Eyni zamanda, heç buna ehtiyacı da yoxdur”.
Vidadi ORDAHALLI
