Son vaxtlar hakimiyyətə qarşı radikal mövqeyi ilə tanınan Əli Kərimlinin rəhbərlik etdiyi AXCP daha ifrat şəkildə radikallıq nümayiş etdirməyə start verib. Hətta vəziyyət o həddə çatıb ki, partiya funksionerləri dünyanın heç bir ölkəsi tərəfindən qəbul edilməyən, İslam aləmi tərəfindən belə lənətlənən İŞİD kimi terrorçu təşkilata simpatiyalarını açıq ifadə etməkdən çəkinmirlər. AXCP fəalları sözügedən radikal təşkilatı Azərbaycana dəvət edir, onların ölkəmizdə “kəsəcəyi başlar”la bağlı əməllərini təqdir edirlər. Bu fikirləri konkret fakta söykənərək bəyan edirik.
Siyasi mühacir adı ilə Fransaya sığınan, AXCP-nin ən fəal üzvlərindən sayılan və ən əsası, Əli Kərimlinin doğma əmioğlusu olan İnqlab Kərimovun öz Facebook hesabında yazdığı statusa diqqət edək: “İŞİD heç də hər adamın başını kəsmir...İŞİD 5 manata sifarişlə məhkəmə zalını dolduranların başını kəsir...İŞİD adını dindar qoyub, cindarlıqla məşğul olanların başını kəsir.... İŞİD adını müxalifət qoyub, nazirliklərə dal qapıdan girib-çıxanların başını kəsir...Və düşünürəm ki, düz də edir...Azərbaycana XOŞ gəlirsən, İŞİD...”
Göründüyü kimi, İnqlab Kərimov İŞİD-in Azərbaycana “gəlişini” alqışlayır, hətta onlara kimlərin başını kəsməklə bağlı konkret ünvanlar da göstərir. İnqlab Kərimov partiyada rəhbər post tutmasa da, sıradan biri də deyil. Hələ ölkədə olarkən onun adı Əli Kərimlinin əsas maliyyə qaynağı kimi çəkilirdi. Xaricə mühacirət etdikdən sonra da fəal AXCP-çi kimi çıxış edir. Dəfələrlə söyüş ritorikasını özündə əks etdirən mövqe ortaya qoyub. Partiyanın ianə toplamaqla bağlı marafonlarının təşkilatçısı qismində çıxış edir. Yəni müşahidələrimiz onu deməyə əsas verir ki, Əli Kərimli İnqilab Kərimovdan imtina edə bilməz. İŞİD-lə bağlı yazılan postu İnqilab Kərimovun mövqeyinin partiya tərəfindən də dəstəkləndiyi qənaətini yaradır. Çünki şəxsiyyəti bəlli olan bir çox AXCP fəalı terroru dəstəkləməklə bağlı ortaya qoyulan mövqeyə onu təqdir edən “like” işarəsini qoyub. Bəllidir ki, AXCP sədrinin İnqilab Kərimovun məlum statusundan məlumatı var. Elə isə niyə həmin postun silinməsi ilə bağlı göstəriş verməyib? Bu nəticəyə gəlinir ki, həmin mövqe birbaşa Əli Kərimlinin özü tərəfindən də dəstəklənir. Bizim üçün bu o qədər də qəribə görünmür. Çünki Əli Kərimli radikal dindarlarla çoxdandır siyasi izdivac içərisindədir. Təsadüfi deyil ki, radikal dindar kimi tanınan Taleh Bağırzadə və onun tərəfdarlarının alovlu müdafiəçisi qismində çıxış edir. İŞİD-ə bəslənən sipmatiya isə yeni xəttidir. Belə nəticəyə gəlmək olur ki, Əli Kərimli və onun tərəfdarları hakimiyyətə qarşı mübarizədə hətta şeytanla belə əməkdaşlıq etməyə hazırdılar. Ən maraqlısı isə budur ki, İnqilab Kərimov bu fikirləri özünü demokratiyanın beşiyi sayan Fransadan səsləndirir. O ölkədən ki, dəfələrlə İŞİD-in terror əməllərindən zərər çəkib. Məhz həmin fikirlərə görə Fransanın əlaqədar qurumlarının əlində İnqilab Kərimovun məsuliyyətə cəlb edilməsi üçün tam hüquqi əsaslar var. Ortada terroru dəstəkləmə və terrora çağrış kimi açıq mövqe var. Yaxşı olardı, Əli Kərimlinin özü bu məsələyə münasibət bildirsin. Necə ola bilir ki, hakimiyyətlə heç bir rəsmi bağlantısı olmayan bir gənclə AXCP fəalları arasında yaranmış fikir ayrılığını həmin gəncin əlində bir ov silahının olmasını əsas götürərək hakimiyyətin siyasi partiyaya qarşı terror hazırlığı kimi qələmə verir, amma bu məsələdə susur? Hər halda, İŞİD-i Azərbaycana dəvət etməklə həmin əməlin təhlükəlilik dərəcəsi müqayisə oluna bilməz. Yəqin ki, Əli Kərimlinin son vaxtlar hakimiyyətlə hədə dilində danışmasının kökündə duran amillərdən biri də məhz radikal dindar qruplarından aldığı dəstək və onlarla əməkdaşlığa hazır olması ilə bağlıdır. Əli Kərimli ilə yaxından əməkdaşlıq edən Qərbin müəyyən dairələri xüsusilə bu mövqe ilə tanış olmalıdır. Qoy görsünlər ki, dəstəklədikləri AXCP Azərbaycandakı dünyəvi quruluşu hansı dövlət forması ilə əvəz etməyə hazırlaşır, siyasi rəqibləri ilə necə haqq-hesab çürütməyi təqdir edir...
Məhəmmədəli QƏRİBLİ
