Kərimlinin köhnə-yeni iddiaları: xalqın gözü tərəzidir, o tərəzidə isə sənin çəkin qramla ölçülür
Dünən yenə bülbül kimi ağız-ağıza vermişdilər. Sevinc Osmanqızının ənənəvi qonağı yenə AXCP sədri Əli Kərimli idi.
Mövzu nə idi? Hər şey, indiyədək dəfələrlə dartışılmış, necə deyərlər, bütün mövzular. Ötən ilin Gəncə hadisələrindən tutmuş şəhid pilotumuz Rəşad Atakişiyevin dəfninə qədər.
Düzü, Osmanqızı nə qədər çalışsa da, yönləndirsə də, Kərimlinin iddiaları sabun köpüyündən başqa bir şey deyildi.
Kərimli nələrdən danışdı? Söhbətə ötən ilin Gəncə hadisələrindən başlayıb, həbs olunanların təqsirsiz olduğunu bildirir, hadisənin mahiyyətini gizlətməyə çalışır. Amma Kərimli bilir, ürəyinin dərinliyində də bilir ki, Gəncədə baş verən hadisələr dövlətə və dövlətçiliyə qarşı atılan addım idi. Kərimli onu da gözəl bilir ki, bu hadisələr bir daha Prezident-Xalq birliyini sübut etdi. Həmin vaxt İqtidar-Xalq birliyi, səmimi münasibəti özünü büruzə verdi. AXCP sədri bilməmiş deyil: polisə qarşı zor tətbiq etmək, polisə əl qaldırmaq Azərbaycan qanunlarına və dövlətinə əl qaldırmaq deməkdir. Bu, Azərbaycanda sabitliyi pozmaq, insanları itaətsizliyə və terrora çağırmaqdır. Həmin şəxslər ölkədə iğtişaş yaratmağa, terror törətməyə cəhd ediblər. Bilir, çox gözəl bilir. Axı özü də ixtisasca hüquqşünasdır.
“Ölkədə senzuranın yaranmasına imkan vermirik”. Əcəb məntiqdir. Axı kim istəyir ki, ölkədə senzura tətbiq edilsin? Sosial şəbəkələrə giriş sərbəstdir, İnternet azaddır, elə Kərimlinin özü bu azadlıqdan gen-bol istifadə edərək trol ordusuyla şər makinasını işə salıb çamur atmaqdadır. Məgər bu azadlığı elə bu iqtidar verməyibmi ona?
Mitinq keçirə bilmirik deyir. Və ardınca da deyir ki, mitinqlə heç nəyə nail olmaq mümkün deyil. Adam hələ də ötən əsrdə ilişib qalıb. Mitinq niyə təyin olunur və ictimai sifariş halını alır? Kərimli bilməmiş deyil, təbii ki, bu və ya digər məqamlarla bağlı xalqın narahatlığı yarananda. İndi cəmiyyətdə mitinq əhval-ruhiyyəsi yoxdur. Təkcə bu ilin əvvəlindən Azərbaycanda təkcə sosial yönümlü islahatlar, pensiya və maaşların artımı, xalqın rifah halının yüksəlməsi, on minlərlə yeni iş yerinin açılması…məgər bunlar hansısa mitinq üçün əsas ola bilər? Yox!
Anormal məntiqlə müxtəlif qüvvələr bu islahatları öz adlarına çıxır. Burada məqsəd hakimiyyəti bu islahatlardan çəkindirmək, ya da bu islahatları öz adına çıxmaqdır. Adi bir zəlzələ zamanı insanların dərdinə şərik çıxmaq əvəzinə deyirlər ki, filan vaxt mitinq edəcəyik. Bir məqamı da qeyd edim. Tutaq ki, uşaqpulu ilə bağlı qanunvericilik hazırlanır, deyirlər ki, gəlin mitinq edək, sizə uşaq pulu verdirəcəyik.
Təsəvvür edin, təkcə bu ilin əvvəlindən cənab Prezidentin xalqın rifahı naminə sosial yönümdə imzaladığı neçə-neçə sərəncamı Kərimli xalqı ələ almaq kimi qiymətləndirir. Adam bazar təfəkküründən əl çəkə bilmir. Xalqı ələ almaq deyil bu, anlamaq çətin deyil. Bu öz xalqına xidmətdir. Bu, xalqına sevgidir. Bu yüksək idarəetmə və humanizmin təntənəsidir. Və Prezidentin özünün də dediyi kimi, bu tip sərəncamların ardı da olacaq.
Hə, mitinqdən danışırdıq axı. Kərimli özü də bilmədən özünü ifşa edir. Bir qədər keçmişə qayıdaraq 2016-cı il Konstitusiya dəyişikliyinə qarşı xalqın böyük “etirazı”ndan dəm vurur. Əvvəla, Konstitusiya dəyişikliyi sosial sifariş idi. İkinci, Kərimli deyir ki, xalq bu dəyişikliyə qarşı idi. Ardınca da bildirir: “Çox təəssüf ki, 2016-cı il konstitusiya dəyişikliyi ilə bağlı xalqdan güclü dəstək almadıq. Bizim mitinqə 10-12 min (əslində bu rəqəmi də şişirdir) adam gəldi, dəstək almadıq. Biz ən azı 100 min nəfərin mitinqə qatılacağını gözləyirdik”. Axı xalqın gözü tərəzidir. O tərəzidə isə sənin çəkin qramla ölçülür. Xalq hansı keyfiyyətinə görə sənə dəstək versin ki? Çox gözəl bilirsən ki, xalq öz sözünü elə dəyişikliyə “hə” deməklə verdi.
“Son vaxtlar sıralarımıza min nəfər üz olub”. Bu o qədər absurd fikir və rəqəmdir ki, sübuta ehtiyacı yoxdur. AXCP sıralarına 1000 yox, 10 nəfər üz qəbul edilsəydi, indi həmin adamlarla bağlı Kərimlinin İnternet resurslarında, FACEBOOK səhifəsində çeşidli xəbərlər gəzirdi. Biz bu priyomları bilirik axı. Amma proseslər əksinədir.
Əli Kərimli və kiçik komandasının ölkənin siyasi həyatında heç bir rola malik olmadıqları günümüzün inkarolunmaz reallığıdır. İndiyə qədər qatıldıqları bütün seçki marafonlarından boynubükük ayrılan, siyasi sistemin təkmilləşdirilməsi, islahatlar həyata keçirilməsi və ölkənin inkişafı ilə bağlı hər hansı təşəbbüs irəli sürməyən, yalnız xarici maraq qruplarından aldıqları maddi dəstək və qeyri-real vədlər qarşılığında partiyaçılıq oynayan radikal ünsürlərin Azərbaycan xalqının iradəsi ilə heç bir əlaqəsi yoxdur. Çoxdan Facebook müxalifətinə çevrilən Kərimlini elə oradakı dəstəkçiləri də tərk edirlər. Əsasən Facebook üzərindən aparılan bu mitinqə çağırış kampaniyaları da uğursuzluğa düçar olur ki, cəmi 100-200 bəyənmə qazınır.
Hakimiyyəti trol saxlamaqda ittiham edən Kərimlilinin sosial şəbəkələrdə saxladığı muzdlu “trol” və saxta profil dəstəsi haqqında dəfələrlə yazılıb, hətta ona yaxın adamlar mətbuata açıqlamalarında bununla bağlı maraqlı məlumatlar veriblər. Bu profillərdən Kərimlinin guya böyük ictimai nüfuza və güclü dəstəyə malik siyasətçi olması haqqında rəy yaratmaq üçün istifadə olunur. Amma bununla nüfuz qazanmaq absurddur. Siyasət real aləmin sənətidir, virtual yox!
Və bir həqiqət də odur ki, həm sosial şəbəkələrin, həm də xəbər saytlarının şərhlər bölməsində saxta profillərin Əli Kərimlinin ünvanına yazdıqları təriflərlə onun əsl xislətini gizlətmək mümkün deyil.
Kərimli dünənki çıxışının sonunda şəhid pilotumuz Rəşad Atakişiyevdən, onun dəfninə gedə bilməməsindən danışır. Məncə düz edirlər. Heç bir hüzr yiyəsi istəməz ki, əzizinin dəfni şouya çevrilsin. Əli Kərimlinin məqsədi də bu idi. Əks halda pilotumuzun nəşi tapılana qədər bircə dəfə də olsa onun qayınatası Qabil Hüseynlini ziyarət edərdi. O ki qaldı onun son tezisinə, ordumuzun mənəvi dəstəyə ehtiyacına, bəli, buna hər zaman ehtiyac var. Amma sənin dəstəyinə, qətiyyən!
Səbuhi MƏMMƏDLİ
