18/10/2019 23:36
728 x 90

Rusiyada “Karabax rodnaya zemlya Azerbayjan” kibritləri...

Əkbər Qoşalı:“Bu gün hansısa bir ölkədə bir kibrit qutusunun üzərində “Karabax rodnaya zemlya Azərbayjan” yazılıbsa və bununla da bir xoşməramlı çağırış edilibsə bu müsbət haldır”

img

“Bu addımı atan insanın hansı millətə mənsub olmasından asılı olmayaq bu bizdə müsbət duyğu yaradır”

Rusiyada kibrit istehsal edən şirkətlərdən biri üzərində “Karabax rodnaya zemlya Azerbayjan” yazılan kibrit istehsal edərək satışa buraxıb. Sosial şəbəkələrdə böyük rezonans doğuran bu məsələ bizim də diqqətimizi çəkdi. Əlbəttə, Azərbaycandan kənarda Qarabağın Azərbaycana aid olması ilə bağlı istənilən çağırış, reklam, nəşr, istehsal edilən məhsul bizim təbliğatımıza, haqq işimizin dəstəklənməsinə xidmət edən amildir. Dağlıq Qarabağ probleminin həllinin qara bir düyünə çevirildiyi və ermənilərin işğal altında saxladıqları torpaqlarımızla bağlı öz xeyirlərinə təbliğat apardıqları bir vaxtda Rusiyada belə bir məhsulun istehsal edilərək satışa buraxılması yalamçı erməni təbliğatına kiçik də olsa bir zərbədir.

 

Ekspertlər qeyd edirlər ki, “Karabax rodnaya zemlya Azərbaycan” adı altında  kibrit istehsal edən şirkətin bu addımı Azərbaycanın haqq işinə verilən bir dəstəkdir. Ekspertlər hesab edirlər ki, Rusiya dövlətinin Dağlıq Qarabağ probleminin həlli məsələsində Rusiya dövlətinin hansı mövqe göstərməsindən asılı olmayaraq, artıq bu ölkənin cəmiyyətində Dağlıq Qarabağın Azərbaycana məxsus torpaq, ərazi olması ilə bağlı fikir formalaşıb.

Milli Qeyri-Hökümət Forumunun idarə heyətinin üzvü, şair-publisist Əkbər Qoşalı baki-xeber.com-a bildirdi ki, bu bizim haqq işimizə dəstək kimi qiymətləndirilməlidir. “Əlbəttə, Ermənitanın Azərbaycan torpaqlarını işğal altında saxlaması və işğal etdiyi ərazilərdə ağılasığmaz vandalizm hərəkətləri həyata keçirməsi faktdır. Bu gün hansısa bir ölkədə bir kibrit qutusunun üzərində “Karabax rodnaya zemlya Azərbayjan” yazılıbsa və bununla da bir xoşməramlı çağırış edilibsə bu müsbət haldır. Bütün hallarda ədalətə, haqqa xidmət edən ən kiçicik iş, hərəkət belə bizim üçün qiymətlidir. Belə başa düşürəm ki, bu kibrit qutusu üzərində yazılan bu sözlər həmin kibritin istehsalı ilə məşğul olan şirkətin, təsisatın rəhbəri ya azərbaycanlıdır, ya da bu işdə azərbaycanlıların təsiri var. Bunu qeyri-azərbaycanlının hərəkəti kimi anlamıram. Bu addımı atan insanın hansı millətə mənsub olmasından asılı olmayaq bu bizdə müsbət duyğu yaradır. Bununla belə, əlbəttə, biz enerji və səylərimizi, cəhdlərimizi bir kibrit qutusuna bağlamadığımızın fərqindəyik.  Dağlıq Qarabağ münaqişəsinin həlli Azərbaycan, dünya azərbaycanlıları üçün taleyüklü məsələdir. Heç nəyi böyüdüb - kiçiltmədən demək istəyirəm ki, hər kəs olduğu yerdə, daşıdığı vəzifə və statusda azərbaycanlılıq məsuliyyətini dərk etməlidir”-deyə Ə.Qoşalı qeyd etdi.

O vurğuladı ki, müxtəlif xarici ölkələrdə Dağlıq Qarabağın Azərbaycan ərazisi olduğunu ehtiva edən istehsallar, təşəbbüslər olub. Bunların hamısının üst-üstə toplanaraq bizim tarixi, hüquqi, mənəvi haqqımızın qələbə çalaraq Dağlıq Qarabağa qovuşmağımıza şərait yaradacağını deyən Ə.Qoşalının sözlərinə görə, işğal altında olan torpaqlarımızda müqəddəs üçrəngli bayrağımız dalğalanacaq.

İradə SARIYEVA

 

Son xəbərlər