Əslində şəhid pilotumuzun qayınatası, politoloq Qabil Hüseynliyə haqq qazandırmaya bilmirsən. Onun kürəkəni, pilot Rəşad Atakişiyevin dəfn mərasimi ilə bağlı çağırışı Elmar Hüseynovun dəfn mərasimindən öncəki vəziyyəti xatırlatdı. Yadınızdadırsa, o vaxt Əli Kərimli israrla təklif edirdi ki, Elmarın tabutunu götürüb bütün şəhəri gəzdirsinlər. O vaxt Kərimlinin müttəfiqi olan Lalə Şövkət və bir neçə digər partiya sədri də bu təklifi dəstəkləyirdilər. O da yadınızdadırsa, Elmarın atası Sabir Hüseynov önə çıxıb, “imkan verin, övladımı dəfn edim” deyə, Kərimliyə təpgi göstərmişdi, “oğlumun cənazəsiylə kimsə siyasi bazarlıq etməsin” demişdi.
Görünür, illərin təcrübəlisi Qabil müəllimdə informasiya var ki, bugünkü tədbirdə kimsə, nəsə planlaşdırıb. Ya da, planlaşdıra bilər. Gərginlik yaşanar. Adam ailəsinin üzləşdiyi faciədən kimlərinsə sui-istifadə edə biləcəyindən narahatdı. Buna görə onu indiki vaxtında qınamaq, təhqir etmək yolverilməzdi.
Nəinki Qabil müəllim, Azərbaycanda qaraguruh müxalifəti tanıyan hamı gözəl bilir ki,
onlar həmişə şou düzəltməklə gündəmdə qalmağa çalışıblar. Yadızdadrmı, onların ötən ilin 17 noyabr Milli Dirçəliş günü ərəfəsində qanunsuz olaraq Şəhidlər Xiyabanında keçirməyə cəhd göstərdikləri aksiya?
Həmin vaxt Əli Kərimli və dəstəsi sözün həqiqi mənasında şou göstərməyə nail olmaq istədilər. Şəhidlər Xiyabanını və müqəddəs şəhidləri ziyarəti öz siyasi məqsədlərinə tabe etməyə çalışdılar. Bu da ictimaiyyətdə birmənalı qarşılanmadı. Əli Kərimli, Cəmil Həsənli kimi adamların kim olduqlarını hər kəs çox aydın görür. Bunlar öz şəxsi maraqlarını xalqın, millətin maraqlarından daim uca tutublar. Bu insanlar öz varlıqlarını, həyatda olduqlarını sübut etmək üçün cılız şou düzəltməkdə görürlər.
İndi də əllərinə yaxşı girəvə düşüb. Qarabağ, şəhid mövzusu gündəmdədir. Və bu müqəddəs gündəmə girib, bu günü öz çirkin niyyətləri istifadə etməyə cəhdləri də mümkündür. Düzdür, onların hər hansı bir cəhdi mərasimə yığışan insanlar tərəfindən sərt etirazla qarşılanacaqdı. Hətta mərasimdən belə qovulacaqdılar. Amma şəhid dəfnini siyasi şouya çevirmək günahdır, onu sakit, dərin hüznlə dəfninə nail olmaq lazımdır. Və belə də oldu.
O ki qaldı Qabil müəllimə, bir şeyə əminəm. Onu heç kim bu açıqlamanı verməyə məcbur etməyib. Nəinki məcbur etməyib, heç təklif də olunmayıb. Çünki o, keçmiş cəbhədaşlarını hamıdan yaxşı tanıyır.
Səbuhi MƏMMƏDLİ
