14/12/2019 06:00
728 x 90

Azərbaycan Yüksəlişlə kadr ehtiyatları bankının yaradılması yollarında…

“Mən Prezidentin “Yüksəliş” müsabiqəsinin élan edilməsi ilə bağlı imzaladığı sərəncamı təqdir edirəm”

img

Fərəc Quliyev:“Ümumiyyətlə, ölkədə kadr ehtiyatı bankının yaradılması dövlətin idarə olunması üçün çox mühümdür”

Məlum olduğu kimi Prezident İlham Əliyev “Yüksəliş” müsabiqəsinin təsis edilməsi haqqında sərəncam imzalayıb. Sərəncama əsasən, intellektual səviyyəsi və idarəçilik keyfiyyətləri yüksək olan perspektiv rəhbər şəxslərin müəyyən edilməsini, dəstəklənməsini və ölkədə kadr ehtiyatı bankının yaradılmasını təmin etmək məqsədilə “Yüksəliş” müsabiqəsi təsis edilir.

Qeyd edək ki, Azərbaycan Respublikası Prezidenti Administrasiyasının Humanitar siyasət məsələləri şöbəsinin müdiri Fərəh Əliyevanın sədrliyi ilə Təşkilat Komitəsi yaradılır. Təşkilat komitəsinin üzvlüyündə vergilər naziri Mikayıl Cabbarov, gənclər və idman naziri Azad Rəhimov, təhsil naziri Ceyhun Bayramov, əmək və əhalinin sosial müdafiəsi naziri Sahil Babayev,  Azərbaycan Respublikasının Birinci vitse-prezidentinin köməkçisi Anar Ələkbərov, Milli Məclisin deputatı Ülvi Quliyev, Dövlət İmtahan Mərkəzinin Direktorlar Şurasının sədri Məleykə Abbaszadə, İctimai Televiziya və Radio Yayımları Şirkətinin baş direktoru Balakişi Qasımov təmsil olunacaq.

Təşkilat Komitəsi müsabiqənin keçirilməsinə ümumi rəhbərliyi və nəzarəti həyata keçirməli, müsabiqə üzrə əlaqələndirmə işlərinin həyata keçirilməsi ilə əlaqədar işçi qrup yaratmalı və Azərbaycan Respublikası gənclər və idman nazirinin müavinini işçi qrupun rəhbəri təyin etməli, müsabiqənin keçirilməsi qaydalarını təsdiq etməli, işçi qrup Müsabiqənin keçirilməsini təmin edəcək qurumu müəyyən etməlidir.

Müsabiqə üzrə cari işlərin həyata keçirilməsi üçün səlahiyyətli orqan qismində Azərbaycan Respublikasının Gənclər və İdman Nazirliyi müəyyən edilib.

Millət vəkili Fərəc Quliyev baki-xeber.com-a bildirdi ki, intellektual səviyyəsi və idarəçilik keyfiyyətləri yüksək olan perspektiv rəhbər şəxslərin müəyyən edilməsini, dəstəklənməsini və ölkədə kadr ehtiyatı bankının yaradılmasını təmin etmək məqsədilə “Yüksəliş” müsabiqəsinin élan edilməsi çox müsbət haldır. F.Qulieyvin sözlərinə görə, respublikada kadr ehtiyatları bankının yaradılması uzun illərdir aktualdır. “Mən Prezidentin “Yüksəliş” müsabiqəsinin élan edilməsi ilə bağlı imzaladığı sərəncamı təqdir edirəm. Hesab edirəm ki, bu olduqca vacib bir məsələdir. Mən özüm iki dəfə prezident seçkilərində iştirak etmişəm və həmin dövrlərdə də əsas məsələ kimi ölkəmizdə kadr ehtiyatları bankının yaradılması diqqətimdə olub. Ümumiyyətlə, intellektual səviyyəsi və idarəçilik keyfiyyətləri yüksək olan perspektiv rəhbər şəxslərin müəyyən edilməsi, dəstəklənməsi və ölkədə kadr ehtiyatı bankının yaradılması dövlətin idarə olunması üçün çox mühümdür. İdarəçilik məsələsində kadr bankı yaradılarkən yalnız Şimali Azərbaycanda deyil, dünyanın hər yerində yaşayan və çalışan, fərqlənən soydaşlarımızı da bu kadrlar sırasına daxil etməliyik. Azərbaycanda həyata keçirilən kadr islahatları, xüsusən də son dövrlər bir sıra nazirliklərə və qurumlara yeni nazirlərin, rəhbərlərin gətirilməsi göstərir ki, artıq Azərbaycanda bu işə başlanılıb. Düşünürəm ki, kənd təsərrüfatı naziri İnam Kərimov, əmək və əhalinin sosial müdafiəsi naziri Sahil Babayev, Gömrük Komitəsinin sədri Səfər Mehdiyev, Diaspor Komitəsinin sədri Fuad Muradov, Qaçqınlarla İş üzrə Komitənin sədri Rövşən Rzayev, eləcə də baş nazir Novruz Məmmədov olduqca uğurlu seçimdir”.

F.Qulieyev onu da qeyd etdi ki, “Yüksəliş” müsabiqəsi həyata keçirildikdən sonra biz daha bacarıqlı, intellektli, haqqı olan və güclü kadrların dövlətin idarəedilməsində iştirakının şahidi olacağıq.

İradə SARIYEVA

 

Son xəbərlər