"Bu il 12371 yanğın qeydə alınıb, 109 nəfər xilas edilib" FHN İslam Oyunlarında 1505 nəfər şəxsi heyət və 207 ədəd texnikadan istifadə edib
"Bu il yanğın nəzarəti məqsədi ilə sosial, sənaye, nəqliyyat, kənd təsərrüfatı obyektlərində və xidmət sahələrində 38 mindən çox yanğın-texniki müayinə aparılıb". APA-nın məlumatına görə, bunu bu gün Fövqəladə Hallar Nazirliyinin (FHN) yaradılmasının 12-ci ildönümü münasibətilə dekabrın 14-da keçirilən genişləndirilmiş kollegiya iclasında fövqəladə hallar naziri Kəmaləddin Heydərov deyib.
K. Heydərov bildirib ki, aşkarlanmış çatışmazlıqların aradan qaldırılması üçün obyekt sahiblərinə 210 mindən artıq tələbi özündə əks etdirən göstəriş və xəbərdarlıq verilib: "60 mindən artıq fəhlə və qulluqçu yanğın təhlükəsizliyi barədə təlimatlandırılıb".
Fövqəladə hallar naziri qeyd edib ki, xilasedicilər yol-nəqliyyat qəzası, silah-sursat aşkarlanması, texnogen mənşəli bina və qurğuların dağılması və uçması, mənzildə qaz sızması, təhlükəli bioloji hadisələrin qarşısının alınması, mənzildə və liftdə köməksiz vəziyyətdə qalma daxil olmaqla, 1138 müxtəlif axtarış və qəza-xilasetmə əməliyyatlarında iştirak ediblər: "Fövqəladə hadisələrin və bədbəxt hadisələrin aradan qaldırılması zamanı 423-ü uşaq olmaqla, 1442 nəfər zərərçəkmişə ilk yardım və təxirəsalınmaz yardım göstərilib. Dövlət Yanğından Mühafizə Xidmətinin xilasediciləri tərəfindən 43 dəfə nəqliyyat və digər qəzalarla bağlı çıxışlar olub, 79 nəfər deformasiyaya uğramış nəqliyyat vasitələrindən çıxarılaraq xilas edilib".
"Cari ildə Fövqəladə Hallar Nazirliyinin maddi-texniki bazasının möhkəmləndirilməsi istiqamətində işlər davam etdirilib" – deyən fövqəladə hallar naziri bildirib ki, bu il əməliyyat şəraiti diqqət mərkəzində saxlanılıb, yanğın hadisələrinin qarşısı alınaraq ağır fəsadlarla nəticələnməsinə imkan verilməyib: "Hesabat dövründə respublika ərazisində 12371, o cümlədən Bakı şəhərində 3965 yanğın hadisəsi qeydə alınıb. Onlardan cəmi 8 yanğın yüksək saylı çağırışla söndürülüb. Hər gün orta hesabla 37 yanğın hadisəsi qeydə alınıb, hər 3 gün ərzində yanğınlarda 1 nəfər xilas edilib. 2016-cı ilin analoji dövrü ilə müqayisədə yanğınlarda xilas edilənlərin sayı 69 nəfər artıb".
K. Heydərov qeyd edib ki, bu il baş verən meşə yanğınları zamanı 25 min hektara yaxın meşə sahəsi, əkin sahələrində baş vermiş yanğınlar zamanı isə 85 min hektara yaxın ərazi yanğından mühafizə olunub: "Pambıq qəbulu məntəqələrinin yanğından mühafizə məntəqələrindən 16-da yanğından mühafizə qüvvə və bölmələrinin növbə çəkməsi təşkil edilib, pambıq sahələri və tayalarında baş vermiş 40 yanğının operativ söndürülməsi təmin olunub".
Fövqəladə hallar naziri nəzərə çatdırıb ki, hesabat dövründə yanğınların söndürülməsi zamanı 98 dövlət obyekti, 296 özəl obyekt, 289 çoxmərtəbəli, çoxmənzilli bina, 532 fərdi ev, 284 müxtəlif təyinatlı texnika mühafizə olunub, 109 nəfər yanğından xilas edilib: "Yanğınlar zamanı mindən artıq vətəndaş təhlükəsiz ərazilərə təxliyə olunub".
K. Heydərov qeyd edib ki, bu il 3400-dan çox mənzil və fərdi evdə qazla bağlı yanğından təhlükəsizliklə əlaqəli nöqsanlar aşkar edilib, həmin nöqsanların aradan qaldırılması üçün qaz istismar idarələrinə məlumat verilib: "İslam Həmrəyliyi Oyunları və "Formula 1" oyunları zamanı görülmüş tədbirlər nəticəsində tədbirlər keçirilən obyektlərdə yanğınlar baş verməyib".
“Bu il IV İslam Həmrəyliyi Oyunları və "Formula-1" Azərbaycan Qran-prisi ilə bağlı yarışlar keçirilən obyektlərdə və digər ərazilərdə baş verə biləcək fövqəladə hadisələr zamanı insanların təhlükəsizliyinin təmin edilməsi məqsədilə ərazilər öyrənilib, təxliyə planları işlənilib, fövqəladə halların baş vermə ehtimalı qiymətləndirilib”. Bu sözləri də K.Heydərov bildirib.
K. Heydərov deyib ki, hər bir obyekt üzrə FHN-nin əsas qüvvə və vasitələrinin hesabatı aparılıb, yanğınsöndürmə, xilasetmə texnika və avadanlıqların yerləşməsi yerləri müəyyənləşdirilib, nazirliyin ehtiyat qüvvələrinin cəmlənmə rayonları təmin edilib: “Yarışlara cəlb olunan könüllülərə hər hansı fövqəladə hadisə baş verəcəyi təqdirdə atılacaq addımlar, tamaşaçıların təxliyəsi barədə məlumat verilib. Şərti xəsarət almış xəstələrə ilkin tibbi yardımın göstərilməsi və şərti yanğın zamanı alovun qarşısının alınması üsulları əyani göstərilib. Ümumilikdə IV İslam Həmrəyliyi Oyunlarına nazirliyin 1505 nəfər şəxsi heyəti və 207 ədəd texniki vasitəsi, Formula-1 Azərbaycan Qran-prisinə isə 835 nəfər şəxsi heyət və 74 texniki vasitə cəlb edilib”.
