"Qəbul etdiyimiz bəyanatda Dağlıq Qarabağ münaqişəsinin həllinin əsaslanmalı olduğu prinsipləri təsdiqlədik". APA-nın məlumatına görə, bu sözləri Rusiya xarici işlər naziri Sergey Lavrov Vyanada ATƏT Xarici İşlər Nazirləri Şurasının iclası çərçivəsində keçirdiyi mətbuat konfransında deyib. O bildirib ki, bəyanat digər həmsədr ölkələrin nümayəndə heyətlərinin rəhbərləri ilə birlikdə qəbul edilib.
Qeyd edək ki, ATƏT-in Minsk Qrupunun həmsədri olan ölkələrin Vyanada Nazirlər Şurasında iştirak edən nümayəndə heyətlərinin rəhbərləri, Rusiya xarici işlər naziri Sergey Lavrov, ABŞ dövlət katibi Reks Tillerson və Fransanın ATƏT yanında daimi nümayəndəsi Veronika Roger Lacan dekabrın 7-də birgə bəyanat yayıb.
Bəyanatda deyilir ki, həmsədr ölkələr Helsinki Yekun Aktı və orada göstərilən güc tətbiq etməmə, güc tətbiqi ilə təhdid etməmə, ərazi bütövlüyü, bərabər hüquqluluq və xalqların öz müqəddəratını təyin etmə prinsiplərini əsas götürərək Dağlıq Qarabağ münaqişəsinin sülh yolu ilə həlli üçün vasitəçilik missiyasında birgə mövqedən çıxış etdiklərini bir daha təsdiq edir.
Lavrovun sözlərinə görə, "Dağlıq Qarabağ münaqişəsində birbaşa dialoq mövcuddur, təəssüf ki, bu hələ ciddi irəliləyişlə nəticələnmir". O bildirib ki, bu il Azərbaycan və Ermənistan prezidentləri arasında bir, nazirlər arasında isə bir neçə dəfə baş tutan dialoq pozitiv haldır: “Biz amerikalı və fransalı həmkarlarla birlikdə kollektiv yanaşmanın olduğu bu istiqamətdə işləməyə davam edəcəyik. Bu sessiyada biz bunu bir daha təsdiq etdik. Verdiyimiz bəyanatda həll üçün nəzərdə tutulan əsas prinsiplər öz əksini tapıb. Tərəflər bunu qəbul edib, lakin hələ addım atılmayıb. Bu asan məsələ deyil, amma bu istiqamətdə işləyəcəyik”.
"ATƏT sədrinin şəxsi nümayəndəsi Dağlıq Qarabağ münaqişəsi ilə əlaqədar ATƏT müşahidəçilərinin sayının artırılması üçün praktik parametrlərin razılaşdırılması istiqamətində çalışır"- deyən S. Lavrov bildirib ki, təmas xəttində ATƏT müşahidəçilərinin sayının artırılması məsələsi 2016-cı ilin mayında Ermənistan və Azərbaycan prezidentlərinin Vyanada həmsədr ölkələrin xarici işlər nazirləri ilə birgə toplantısında və iyunda Sankt-Peterburqda hər iki ölkə prezidentinin və Rusiya prezidenti Vladimir Putinin iştirakı ilə keçirilən görüşdə müzakirə edilib: “Bundan sonra razılaşma prinsipial olaraq ATƏT-ə ötürülüb”.
"Biz Zuyevin Azərbaycanda səfirlik məsələsini nəzərdən keçirmirik…”
"Biz Georgi Zuyevin səfir təyin olunması üçün Azərbaycan hökumətinə heç vaxt aqremanla bağlı müraciət etməmişik". Bu sözləri də Rusiya xarici işlər naziri Georgi Zuyevin səfir təyin olunması üçün Rusiya tərəfinin müraciətinə ermənilərlə əlaqəsi olduğu üçün Azərbaycanın aqreman verməməsi barədə suala cavabında deyib.
O bildirib ki, bu barədə yayılmış xəbərlərlə tanışdır: “Lakin kimin kiminləsə hansısa əlaqələrinin olması və bunun siyasətə necə təsir etməsi məsələsi müasir mədəni tələblərə cavab vermir”.
Rusiya XİN başçısı bildirib ki, hazırkı səfir öz missiyasını bitirən kimi Azərbaycana yeni səfir göndəriləcək.
Qeyd edək ki, bu il iyulun 5-də Rusiya KİV Dövlət Dumasının Azərbaycanda səfir vəzifəsinə Rusiya Xarici İşlər Nazirliyinin Kadrlar Departamentinin direktor müavini Georgi Zuyevin namizədliyini təsdiqlədiyini yazıb.
Bir müddət əvvəl yayılan qeyri-rəsmi məlumatlarda isə bildirilirdi ki, Azərbaycan G. Zuyevin səfir təyin olunması üçün aqreman verməyib.
Lavrov Trampın Qüdslə bağlı qərarı barədə…
"ABŞ prezidenti Donald Trampın Qüdslə bağlı qərarı bütün razılaşmalara ziddir". APA-nın məlumatına görə, bunu Rusiya xarici işlər naziri Sergey Lavrov Vyanda ATƏT Xarici İşlər Nazirləri Şurasının iclası çərçivəsində keçirdiyi mətbuat konfransında deyib.
O bildirib ki, hətta bu qərar dünya ictimaiyyətini iki hissəyə bölübsə belə, bu heç də bərabər hissələrə bölünmə deyil.
