İlham Əliyev Gürcüstan azərbaycanlıları üçün bu ölkədə yeni proseslərin açılmasına baza yaratdı

Tarix: 07.11.2015 / 02:47
Bölmə: Gündəm

Marneuli görüşündə Marqvelaşvilinin Gürcüstan azərbaycanlıları barədə dediklərinin nəticələri uzun illər özünü göstərəcək

Gürcüstanda rəsmi səfərdə olan Azərbaycan Prezidenti İlham Əliyev Marneuli şəhərində azərbaycanlılarla görüşüb. APA-nın Gürcüstan bürosunun məlumatına görə, görüşdə Gürcüstan prezidenti Georgi Marqvelaşvili də iştirak edib. Görüşdə çıxış edən Prezident İlham Əliyev bildirib ki, Marneuliyə ilk səfərini 2004-cü ildə edib və indi bölgədə böyük iqtisadi və infrastruktur dəyişiklikləri getdiyini görüb.

O, Gürcüstana iki günlük səfərinin uğurlu keçdiyini deyib: "Gürcüstan-Azərbaycan əlaqələri yüksək sürətlə inkişaf edir. Dünən Bəyannamə imzaladıq və bu sənəddə əməkdaşlığın bütün aspektləri öz əksini tapıb. Bizim əməkdaşlığımızın gözəl tarixi və gələcəyi var. Əlaqələrimiz strateji səviyyəyə qalxıb. Bu gün mən Marneuliyə gəlmişəm. Əminəm ki, bizim Gürcüstanda fəaliyyətimiz əlaqələrin inkişafında mühüm rol oynayacaq. Gürcüstanda yaşayan azərbaycanlılar, həm də Azərbaycanda yaşayan gürcülər, bizim əməkdaşlığımızı daha da möhkəmləndirir".

G.Marqvelaşvili isə azərbaycanlıların Gürcüstan dövlətçiliyinin inkişafına böyük töhfə verdiyini deyib: "Azərbaycan və Gürcüstan dövlətlərinin dostluğu və qarşılıqlı münasibətləri yüksək səviyyədədir. Azərbaycan Gürcüstan iqtisadiyyatının inkişafına böyük sərmayə qoyub. Bunu qiymətləndirməmək olmaz. Bu, Azərbaycanın qardaş ölkə kimi Gürcüstana göstərdiyi qayğıdır".

Görüşdə Gürcüstan parlamentinin deputatı Mahir Dərziyev, Azərbaycanlıların Mədəniyyət Mərkəzinin rəhbəri Fazil Həsənov, Dəmyə-Görarxı kənd icra nümayəndəsi Heydər Musayev və başqaları çıxış edərək həyata keçirilən işlərdən və azərbaycanlıların problemlərindən söz açıblar.

"Dünən Gürcüstanda apardığım danışıqlar da göstərir ki, Gürcüstan-Azərbaycan əlaqələri yüksək sürətlə inkişaf edir" - deyə Prezident İlham Əliyev bildirib. O deyib ki, Gürcüstan-Azərbaycan əməkdaşlığının böyük tarixi var: "Bu gün Gürcüstan və Azərbaycan qardaş ölkə kimi regionda böyük layihələr icra edir və bundan sonra da bu layihələri həyata keçirmək üçün əlimizdən gələni edəcəyik".

Dövlət başçısı qeyd edib ki, həm Gürcüstan, həm də Azərbaycan çoxmillətli, çoxkonfensiyalı ölkələrdir: "Bizim ölkələrimizdə xalqlar sülh və əminamanlıq şəraitində yaşayır. Bu bizim böyük uğurumuz və nailiyyətimizdir. Biz çox istəyirik ki, Gürcüstanda yaşayan azərbaycanlılar və Azərbaycanda yaşayan gürcülər ölkələrinin ictimai-siyasi həyatında mühüm rol oynasınlar və öz ölkələrinin dəyərli vətəndaşları kimi inkişafa töhfə versinlər, eyni zamanda öz tarixi köklərini unutmasınlar. Mən istəyirəm ki, Gürcüstanda yaşayan azərbaycanlılar rahat yaşasınlar, onların iş yerləri ilə təmin edilməsi üçün daha ciddi addımlar atılsın, onlar özlərini yaxşı hiss etsinlər və Gürcüstanın dəyərli vətəndaşları kimi ölkənin ümumi inkişafına öz töhfələrini versinlər. Gürcüstanda yaşayan azərbaycanlılar həmişə Gürcüstan dövlətçiliyinə dəstək veriblər və yaxşı vətəndaş olublar. Belə də olmalıdır, çünki siz bu torpaqlarda əsrlər boyu yaşamısınız. Bu gün xalqlarımızı birləşdirən tarixi əlaqələr, çoxəsrlik dostluq, qardaşlıq münasibətləri, eyni zamanda bugünkü Gürcüstan-Azərbaycan əlaqələri, əlbəttə, sizin də həyatınıza müsbət təsirini göstərir".

Prezident Marneuli Gənclər Mərkəzində və Çay Evində həyata keçirilən layihələri, gürcü dilinin öyrənilməsini müsbət dəyərləndirib: "Siz bu dili bilməklə Gürcüstanın dövlətçiliyinə töhfə verirsiniz".

Azərbaycan Prezidenti Gürcüstanda fəaliyyət göstərən Azərbaycan şirkətlərini bu ölkədə yaşayan azərbaycanlılar üçün yaxşı şərait yaratmağa çağırıb: "Onlar Gürcüstana investisiya qoymağa davam etməlidir, yeni iş yerləri, logistika mərkəzləri, ictimai yerlər yaradılmalıdır. Biz gələcəkdə də çalışacağıq ki, siz yaxşı yaşayasınız və həm Azərbaycanı, həm də Gürcüstanı sevəsiniz".

"Mən çox sevinirəm ki, hörmətli Azərbaycan Prezidenti İlham Əliyevlə birlikdə azərbaycanlı vətəndaşlarımızla görüşə gəlmişik. Azərbaycanlılar Gürcüstan dövlətçiliyini yaradanlardan biridir və biz dostluğumuzu daha da möhkəmləndiririk". Bu sözləri isə görüşdə Gürcüstan prezidenti Georgi Marqvelaşvili deyib. O bildirib ki, azərbaycanlıların kompakt yaşadığı bölgələrdə mühüm layihələr həyata keçirilir. Dövlət başçısı gürcü dilinin azərbaycanlılar tərəfindən öyrənilməsinə sevindiyini söyləyib: "Azərbaycanlılar Gürcüstan cəmiyyətinə inteqrasiyaya can atırlar. Sizin istedadınız bizə lazımdır. Bu istək və tələbat həmişə hiss olunur və biz sizə həmişə dəstək olacağıq".

G.Marqvelaşvili bəyan edib ki, Gürcüstan öz azərbaycanlıları ilə güclüdür: "Gürcüstanda dövlət dilini öyrənməyiniz həm də sizin mədəniyyətinizin, ana dilinizin inkişafı deməkdir. Siz Gürcüstan vətəndaşı olaraq öz mədəniyyətinizi, tarixinizi və adət-ənənələrinizi unutmamalısınız".

Prezident azərbaycanlılar yaşayan bölgələrdə kənd təsərrüfatı və infrastruktur sahələrinin getdikcə inkişaf etdiyini vurğulayıb: "Mən Gürcüstanda azərbaycanlıların yaşadığı bölgələrdə kənd təsərrüfatının, infrastrukturun getdikcə inkişaf etdiyini görürəm. İndi Gürcüstanın Ümumi Daxili Məhsulunun 9 faizini azərbaycanlılar verir. Bizə yeni imkanlar lazımdır ki, Avropa bazarına daxil olaq. Gürcüstanda bunun üçün potensial var. Ölkəmizdə kənd təsərrüfatı sahəsində yeni və Avropa standartlarına uyğun standartların tətbiqi böyük əhəmiyyət kəsb edir. Bu regionda iqtisadiyyatın inkişaf etdirilməsi və turizmin inkişafı vacibdir. Marneulidə və regionun digər bölgələrində yeni inkişaf perspektivləri işlənilməlidir. Bölgədə yeni layihələr həyata keçirilməlidir. Yüklərin daşınması, enerji və logistik layihələr Gürcüstan üçün səmərəli və faydalıdır".

Prezident İlham Əliyev bildirib ki, Gürcüstan bizim üçün Avropaya çıxış yoludur. Prezident həm təhlükəsizlik, həm də inkişaf baxımından hər iki ölkənin bir-birinə bağlı olduğunu bildirib: "Bizim uğurlu inkişafımız Gürcüstansız mümkün deyil. Gürcüstan bizim üçün Avropaya çıxış yoludur. Gürcüstanın da sürətli inkişafı Azərbaycanın güclü inkişafına bağlıdır. Biz yaxın dost və tərəfdaşıq, birgə layihələr icra edirik. Dünən razılığa gəldik ki, həm bölgədə, həm də dünyada nəqliyyat sahəsində birgə siyasət aparaq. Belə olan halda, ölkələrimiz arasında yük daşımalarının həcmi bir neçə dəfə artacaq. Bu dəhliz bu bölgədən keçir və əlbəttə, burada yaşayan hər bir insan bundan faydalanacaq".

"Mən keçən dəfə Marneulidə olanda tapşırıqlar verdim ki, mövcud problemlər tezliklə həllini tapsın. Şadam ki, son illər ərzində bir neçə mühüm məsələ öz həllini tapıb. Əlbəttə ki, 2004-cü ildə Azərbaycanın imkanları bugünkü kimi deyildi, bizim o qədər də maliyyə imkanlarımız yox idi. Ancaq imkan daxilində çalışırdıq ki, burada yaşayan azərbaycanlılar da Azərbaycanın inkişafından bəhrələnsinlər" - deyə İlham Əliyev bildirib.

Gələcəkdə daha böyük işlərin görülməli olduğunu deyən dövlət başçısı qeyd edib ki, ilk növbədə infrastruktur layihələri həyata keçirilməlidir.

"Əhalinin qaz və içməli su təminatı təmin edilməlidir, kənd yolları abadlaşdırılmalıdır. Bildiyiniz kimi Azərbaycan Dövlət Neft Şirkəti (SOCAR) nəinki azərbaycanlıların yaşadığı bölgələrdə, ümumiyyətlə Gürcüstanın müxtəlif yerlərində son illərdə böyük qazlaşdırma proqramı icra edir və böyük vəsait qoyur ki, Gürcüstanda qazlaşdırma maksimum dərəcədə yüksək sürətlə aparılsın. Keçən dəfə mən burada olanda SOCAR-ın burada bir dənə də olsun yanacaqdoldurma məntəqəsi yox idi. Bu gün isə mənə verilən məlumata görə, 100-dən çox yanacaqdoldurma məntəqəsi var. SOCAR Gürcüstanın Qara dəniz limanında böyük terminal əldə edib və buraya böyük investisiya yatırıb. Enerji layihələri, elektrik xətlərinin birləşməsi, Cənub Qaz Dəhlizinin inkişafı - bütün bunlar yeni iş yerlərinin açılmasına gətirib çıxaracaq".

Prezident İ.Əliyev təhsillə bağlı məsələlərin xüsusi əhəmiyyət daşıdığını da bildirib: "Mən istəyirəm ki, Gürcüstanda bir dənə də təmirsiz Azərbaycan məktəbi qalmasın. Düzdür, Azərbaycanda da hələ təmirsiz və qəzalı vəziyyətdə olan məktəblər var. Son 10 ildə Azərbaycanda 3 mindən çox məktəb tikilib və təmir edilib. Nəzərə alsaq ki, Azərbaycanda 5 minə yaxın məktəblər var, görərsiniz ki, nə qədər böyük işlər görülüb. Amma bizdə də, sizdə də bu problemlər var və biz çalışacağıq ki, bu məsələ öz həllini tapsın.

Hesab edirəm ki, SOCAR bu problemlərin həllində əsas investor rolunda çıxış edəcək. Ümumiyyətlə, bu şirkətin həm Azərbaycanda, həm də işlədiyi bütün ölkələrdə çox böyük sosial məsuliyyəti var. SOCAR bu ölkələrdə məktəb, uşaq bağçası, infrastruktur layihələrin icrası ilə məşğuldur. Gürcüstanda ilk növbədə bu işlər görülməlidir, çünki burada azərbaycanlılar yaşayır. Gürcüstanda yaşayan azərbaycanlılar haqqında daim düşünürəm, onlar mənim üçün əziz və doğmadır. Ən böyük arzum odur ki, onlar bu torpaqda daim rahat və firavan yaşasınlar".

Dövlət başçısı yeni iş yerlərinin açılması, kənd təsərrüfatının inkişafı üçün əlavə tədbirlərin görülməsinin vacibliyini vurğulayıb. O qeyd edib ki, bu işlər Gürcüstan dövlətinin iştirakı ilə görülməlidir.

Xəbər xidməti

DİGƏR XƏBƏRLƏR

Tarix: 30.10.2026 / 06:41

Yəhudilər erməni monastırına tüpürdülər

Tarix: 29.10.2026 / 17:00

Bir Millət, İki Dövlət, Bir Ürək: Türkiyə Cümhuriyyətinin 103-cü ildönümü münasibətilə İctimai Nəzarət Təşkilatının Təbrik Bəyannaməsi

Tarix: 28.10.2026 / 12:51

ROZA TÖREKULOVNA AYTMATOVANIN ƏZİZ XATİRƏSİNƏ

Tarix: 28.10.2026 / 08:35

Türkiyədəki “sərmayə olayı” Pasifik Holding-i də vurdu - aktivləri donduruldu

Tarix: 28.10.2026 / 06:26

Türkiyədə səs-küylü “Starlink əməliyyatı” - 85 nəfər saxlandı

Tarix: 27.10.2026 / 13:54

"Bakı bu cür beynəlxalq forumlar vasitəsilə mədəniyyətlərarası dialoqa mühüm töhfə verə bilər" - Ozodbek Nazarbekov

Tarix: 27.10.2026 / 13:30

Penitensiar Xidmətə yeni rəis təyin edildi

Tarix: 27.10.2026 / 10:28

Dubay məhkəməsi Rusiya neftinin satışından 700 milyon dollardan çox vəsaiti dondurub - işin içində azərbaycanlılar da var…

Tarix: 26.10.2026 / 06:58

Vuçiç seçkidə məğlubiyyətini rəsmən bəyan etdi

Tarix: 24.10.2026 / 08:38

Serbiyada etirazlar pik həddə - gənclər Vuçiçi devirməyə qərarlıdır

Tarix: 22.10.2026 / 15:01

44 günün fövqündə: milli iradənin və tarixi yaddaşın təntənəsi

Tarix: 20.10.2026 / 22:19

İran XİN sözçüsü Azərbaycana tövsiyə verməyə qalxdı - həm də insan haqları mövzusunda…

VİDEO

Tarix: 17.10.2026 / 17:10

Aydın Quliyev Mətbuat Şurasında seçkilərə qatılmamasının səbəblərini qurultayda açdı... - VİDEO

Tarix: 27.11.2025 / 11:10

Biri ermənini öpür, biri sovet bayrağı qaldırır... Günümüzə baxın! - VİDEO

Tarix: 12.11.2025 / 11:05

Lavrov işdən kənarlaşdırılır, yoxsa oyun qurulur? - VİDEO

Tarix: 02.11.2026 / 23:02

Bunu səfir Birol Akgünə açıq məktubum kimi də oxuya bilərsiniz - Aydın QULİYEV yazır...

Tarix: 29.10.2026 / 17:35

Məhkəmə hakimlərinin yeni "Etik Qaydaları"nda bir vacib məqam unuduldu...

Tarix: 29.10.2026 / 17:05

Ramiz Mehdiyevin təltiflərdən məhrum edilməsinin hüquqi mexanizmləri var...

Turizm regionlarımızın inkişaf mənbələrindən birinə çevrilir...