Suriyalı analitiklərin fikrincə, ölkədəki böhran artıq çoxdan iqtidar-müxalifət çərçivəsini aşaraq beynəlxalq konfliktə bağlanıb. Daha əvvəl Ərəb dşvlətləri Liqasında Suriya üzrə müşahidə missiyasında yer almış Ənvər Malik Anadolu Agentliyinə açıqlamasında deyib ki, Əsəd rejimi itki verməkdə davam edir və prezident sarayı hər an müxalifətçilər tərəfindən tutula bilər: "Rusiyanın artan dəstəyi və Ər-Riyadla Moskva arasında ugursuz vasitəçilik göstərir ki, Moskvanın Səudiyyə Ərəbistanı ilə əsəd arasında münasibətləri yumşaltmaq cəhdləri nəticə verməyib”- deyən suriyalı analitik "Moskvanın bugünkü pozisiyası ilə Suriyanın bölünməsi planları arasında bir əlaqə varmı” sualına belə cavab verib:”Suriyanın bölünməsi Rusiyanın məqsədləri sırasına daxildir, lakin bu təklif ən sonda - onun öz maraqlarının müdafiəsinə ehtiyac yarandıqda səsləndirilə bilər. Moskvanı hazırda ən çox narahat edən Rusiya Suriya piroqundan pay götürmədən Əsədin devrilə biləcəyidir. Bundan əlavə, prezident Putin Əsəddən həm də öz məqsədlərinə çatmaq üçün beynəlxalq aləmə təzyiq vasitəsi kimi istifadə edir”.
Başqa bir analitik – "Ənsar Şam” müxalifət qruplaşmasının komandiri Rusiyanın Suriyada hərbi mövcudluğunun yenilik olmadığını bildirir, lakin qeyd edir ki, bu mövcudluq rejim oz ərazilərinin əhəmiyyətli hissəsini itirdikdən sonra burda dayaqlarını xeyli möhkəmlədib. "Rusiya Aralıq dənizində mövcudluğu məsələsində Krımla olduğu qədər israrlıdır”- deyən müxalifət komandiri iki Rusiya sualtı qayığının Suriyanın Tartus liman şəhərinə 600 hərbçi gətirdiyini deyir və bu hərbçilərin müxalifətçilərin iki gün əvvəl raket hücumuna məruz qoyduğu Lazkiyədəki hərbi aerodromda yerləşdirildiyini bildirir.
Suriyalı hərbi strateq, istefada olan general-mayor Fayiz əd-Dübeyri isə deyir ki, Rusiya aralıq dənizində platsdarm əldə etməyə çalışır, bu marağının yeganə qarantı isə Əsəddir:”Prezident Barak Obama Suriyada kimyəvi silahların məhvindən sonra Əsədi qeyri-legitim elan etdi. Bu isə o deməkdir ki, Qərb Suriya ilə bağlı Rusiyaya hər hansı sanksiya tətbiq edən deyil”. Əd-Düveyri onu da deyib ki, Rusiyanın Suriyanı işğal etməsini gözlənilən sayır və buna onu ABŞ və Avropa ölkələrinin təhrik etdiyini düşünür.
Beynəlxalq hüquq eksperti, professor Visaməddin Əl-Ukla isə BMT-nin ölkələrin daxili işlərinə qarışmanı yasaqlayan Konvensiyasına istinad edərək bildirir:”Moskva və Dəməşq arasında Tartus limanının bir hissəsinin istifadəsinə dair razılaşmadan başqa hərbi sahədə heç bir əməkdaşlıq sazişi yoxdur. Bu razılaşma isə ona bu ölkədə hərbi mövcudluq səlahiyyəti vermir. O üzdən Rusiyanın buraya genişmiqyaslı müdaxiləsi, 1980-ci illərdə Əfqanıstanda olduğu kimi, işğal sayılmalıdır. Bu cür müdaxilə regionda çox təhlükəli nəticələrə gətirmək iqtidarındadır. Eyni zamanda bu müdaxilə BMT-də legitimliklə bağlı mübahisələrin də qalxmasına səbəb olacaq”.
Beləliklə, özünü Əsədin yeganə dəstəkçisi kimi göstərməyə çalışan Rusiyanın əsl məqsədləri ətrafında müzakirələr qızışır. Bu isə bu ölkə ətrafında daha bir təhlükəli durumun yarandığından xəbər verir.
Baki-xeber.com
